भजन.
85.
कोरहतय्‌गु भजन, लय्‌ तइम्‍हय्‌सिगु निंतिं हे परमप्रभु, छिं थःगु देशयात माया यानादीगु दु, छिं इस्राएलयात हाकनं भिं यानादीगु दु। 
छिं थः मनूतय्‌गु पाप क्षमा यानादीगु दु, इमिगु फुक्‍क मभिंगु ज्‍या माफ यानादीगु दु। सेला 
छिं थःगु तं छखे चीकादीगु दु। छि थःगु तःधंगु तंपाखें लिहां झाःगु दु। 
हे जिमित उद्धार यानादीम्‍ह परमेश्वर, जिमित हाकनं स्वीकार यानादिसँ, जिपिं खनाः तं चायादीगु त्‍वःतादिसँ। 
छु छि जिपिं खनाः न्‍ह्याबलें तंचायाच्‍वनादीगु ला? छिगु तं गुबलें क्‍वलाइ मखु ला? 
जिमित हाकनं बल्‍लाकादिसँ, थः मनूतय्‌त लय्‌ताय्‌कादिसँ। 
हे परमप्रभु! जिमित थःगु सदां दयाच्‍वनिगु माया क्‍यनादिसँ, अले जिमित थःगु उद्धार बियादिसँ। 
परमप्रभु परमेश्वरं छु धयादी व जिं न्यने। छाय्‌धाःसा वय्‌कलं थः विश्वास याये बहःपिं लिसे शान्‍तिया खँ ल्‍हाइ। तर इपिं हाकनं मूर्ख लँय्‌ मवनेमा। 
धात्‍थें हे वय्‌कःया उद्धार वय्‌कःयात मानय्‌ याइपिनिगु न्‍ह्यःने हे दु, अथे जुयाः वय्‌कःया महिमा झीगु देशय्‌ च्‍वनाच्‍वनेमा। 
सदां दयाच्‍वनिगु दया माया व विश्वास थःथवय्‌ मिलय्‌ जूगु दु, धार्मिकता व शान्‍ति थवंथः चुप्‍पा नइ। 
पृथ्‍वीं विश्वास पिहां वइ, अले धार्मिकता स्वर्गं क्‍वय्‌ स्‍वइ। 
छु भिं परमप्रभुं व हे बियादी, अले झीगु जमिनं थःगु बालि बी। 
धार्मिकता परमप्रभुया न्‍ह्यः न्‍ह्यः वनी, अले वय्‌कःया निंतिं लँ दय्‌की।