भजन.
76.
आसापया भजन, लय्‌ तइम्‍हय्‌सिगु निंतिं -- तारं थाइगु बाजनय्‌ हालेगु परमेश्वरयात यहूदाय्‌ सकसिनं म्‍हस्‍यू। इस्राएलय्‌ वय्‌कःया नां तःधं। 
शालेमय्‌ वय्‌कः च्‍वनिगु खः। सियोन पर्वतय्‌ वय्‌कःया छेँ दु। 
वय्‌कलं अन थः शत्रुतय्‌गु च्‍याना च्‍वंगु बाण, ढाल, तरवार, व फुक्‍क ल्‍वाभः त्‍वथुलादिल। सेला 
छि न्‍ह्याबलें दयाच्‍वनिगु पहाड स्‍वयाः झःझः धाः, अले तसकं तःजि। 
बल्‍लाःपिं शत्रुतय्‌गु फुक्‍क ल्‍वाभः लाकाकाये धुंकल। इपिं सी न्‍ह्यलय्‌ लाये धुंकल। इमि सुं छम्‍हय्‌सिनं नं झीगु विरोधय्‌ ल्हाः ल्ह्वने मफये धुंकल। 
हे याकूबया परमेश्वर! छिं छकः हक्‍कूबलय्‌ इमि फुक्‍क सल व सल गयाः वःपिं सीपिं थें जुल। 
हे परमप्रभु, छि हे छम्‍ह जक खः भय काये बहःम्‍ह। छि तंम्‍वइबलय्‌ छिगु न्‍ह्यःने सु च्‍वनेफु? 
हे परमेश्वर, मभिंगु ज्‍या यानाच्‍वंपिन्‍त सजाँय बीत व पृथ्‍वीइ क्‍वत्‍यय्‌काच्‍वने माःपिन्‍त बचय्‌ यायेत स्‍वर्गं थःगु न्‍याय न्‍यंकेत दनादीबलय्‌ पृथ्‍वी ग्‍यानाः सुम्‍क च्‍वन। सेला 
मनूतय्‌सं गुलि तं क्‍यनी, उलि हे छिगु नां तःधनी। लडाइँ पाखें बचय्‌ जूपिन्‍सं छिगु नखः हनी। 
छिमिसं छिमि परमप्रभु परमेश्वरया नामय्‌ छु भाकल यानागु खः, व पूवंकि। वय्‌कःया प्‍यखेरं च्‍वंपिं सकसिनं भय कायेबहःम्‍ह वय्‌कःयात देछा छायेत हति। 
वय्‌कलं शासकतय्‌गु घमण्‍डयात नचुकादी। पृथ्‍वीया जुजुत वय्‌कः खनाः ग्याइ।