भजन.
75.
आसापया भजन, लय्‌ तइम्‍हय्‌सिगु निंतिं -- “स्‍यंके मते” धाःगु रागय्‌ हालेगु म्‍ये। जिमिसं सुभाय्‌ बी हे परमेश्वर, जिमिसं सुभाय्‌ बी। छाय्‌धाःसा छि जिमिगु तापाक मदु। मनूतय्‌सं छिगु अजूचायापुगु ज्‍या कनाजुइ। 
छिं धयादीगु दु, “जिं न्‍यायया निंतिं ल्‍वःगु ई ल्‍ययागु दु। जिं पक्षपात मजुइक न्‍याय याये।” 
भ्‍वखाय्‌ ब्‍वयाः मनूत व पृथ्‍वी वाराक्‍वारा संसां, जिं धाःसा थुकिया जगयात लिधंसा बियातये। सेला 
घमण्‍डीतय्‌त जिं धाये -- “घमण्‍ड याये मते।” दुष्‍टतय्‌त जिं धाये -- “फुर्ति याये मते। 
स्‍वर्गया विरोधय्‌ ल्‍हाः ल्‍ह्वने मते। अले विरोधी खँ ल्‍हानाजुइ मते।” 
सुं मनुखं, न पुर्बं, न पच्‍छिमं, न उत्तरं, न दच्‍छिनं जुइमा सुनानं मनूयात थछ्वये फइ मखु। 
न्‍याय याइम्‍ह ला परमेश्वर खः। सुयात क्‍वफायेगु सुयात थछ्‍वयेगु धकाः वय्‌कलं हे क्‍वःछिनादी। 
परमप्रभुया ल्‍हातिइ ख्‍वला दु, थ्व ख्‍वला वय्‌कःया तमं जाः। वय्‌कलं थ्‍व हे ख्‍वलां त्‍वंकादी। दुष्‍टत फुक्‍कसिनं थ्‍व हे ख्‍वलां त्‍वनी, भ्‍याः भचा हे मल्‍यंक। 
तर जिं ला न्‍ह्याबलें परमेश्वरं यानादीगु ज्‍याया खँ कनाजुये जि ला न्‍ह्याबलें याकूबया परमेश्वया भजन हालाजुये। 
परमेश्वरं धयादी -- “दुष्‍टतय्‌गु शक्ति जिं न्‍हंकाबी। अले धर्मीतय्‌गु शक्ति अप्‍वय्‌काबी।”