भजन.
73.
आसापया भजन इस्राएलया निंतिं व शुद्ध नुगः दुपिनिगु निंतिं, परमेश्वर धात्‍थें हे भिंम्‍ह खः। 
तर जिगु तुति ला खाये धुंकूगु खः। जिगु पलाः चुलुबिये धुंकूगु खः। 
छाय्‌धाःसा दुष्टतय्‌गु जियावःगु स्‍वयाः इपिं घमण्‍डीत खनाः जिगु नुगः मूगु खः। 
इमिसं दुःख सी मखु, इपिं बल्‍ला व स्‍वये नं ज्यू। अले इमिगु उसाँय्‌ नं बांलाः। 
मेपिन्‍त थें इमित दुःख जुइ मखु, मेपिन्‍सं थें इमिसं कष्‍ट नं फये म्‍वाः। 
उकिं घमण्‍ड इमिगु तिसा खः ल्‍वापुख्‍यापु इमिगु वसः खः। 
इमिगु नुगलं मभिंगु खँ जक पिहां वइ, इमिगु नुगलं मभिंगु मभिंगु जक ग्‍वसाः ग्‍वयाच्‍वनि। 
इमिसं मेपिन्‍त हेस्‍यानाजुइ, अले मभिंगु खँ ल्‍हानाजुइ इमिसं घमण्‍ड यानाजुइ, अले मेपिन्‍त क्‍वह्यंकाजुइ। 
इमिसं म्‍हुतु तःप्‍वाः यानाः स्‍वर्ग व पृथ्‍वीयागु खँ ल्‍हानाजुइ। 
मनूतय्‌त इमिसं थःपाखे फहिकाकाइ। मनूतय्‌सं इमिसं धाःगु खँ अःपुक पत्‍याः याइ। 
इमिसं धयाजुइ -- “परमेश्वरं गथे यानाः सी? दकसिबय्‌ तःधंम्‍हय्‌सिनं छु जुयाच्‍वन धकाः स्‍यू ला?” 
दुष्‍टत धयापिं थज्‍याःपिं का स्‍व। इपिं न्‍ह्याबलें याउँक च्‍वनी, अले धनसम्‍पत्ति जक मुंकाजुइ। 
अय्‌सा छु जिं थःगु नुगः शुद्ध यानाजुयागु सितिं वन ला? जिं मभिंगु ज्‍या मयासे जुयागु नं सितिं वन ला? 
जिं न्‍हियान्‍हिथं दुःख जक फयागु दु! सुथंनिसें जिं सजाँय फयावयाच्‍वना। 
जिं थथे धयाजूगु जूसा जिं छिकपिनि मनूतय्‌त धोखा बीगु जुइ। 
जिं थ्‍व फुक्‍क खँ थुइकेगु कुतः याना। तर थ्‍व तसकं हे थाकुगु ज्‍या जुयाबिल। 
जि परमेश्वरया पवित्र थासय्‌ दुहां वना जक, जिं दुष्‍टतय्‌गु छु गति जुइ धकाः सिल। 
धात्‍थें छिं इमित चुल्‍लुसे च्‍वंगु थासय्‌ तयादी तिनि, अले विनाशया गालय्‌ क्वफानादी। 
इपिं मिखा पीमलावं नाश जुयावनी। इपिं ग्‍यानापुक्‍क हे नाश जुयावनी। 
सुथय्‌ न्‍ह्यलं चाल कि तनावनिगु म्‍हगस थें। हे परमप्रभु, छि दनादीबलय्‌ छिं इमित किचःयात थें वास्‍ता यानादी मखु। 
जिगु नुगः हीसे च्‍वनाच्‍वंबलय्‌ जितः दुःख जुयाच्‍वंबलय्‌ 
जि छम्‍ह पशु थें मूर्ख जुयाच्‍वनागु खः। जिं छितः थुइके मफुगु खः। 
अय्‌नं जि ला न्‍ह्याबलें छि नापं हे दु। छिं जिगु जव ल्‍हाः ज्‍वनादीगु दु। 
छिं जितः सल्‍लाह बियाः लँ क्‍यनादी अले लिपा जितः तःधंकाः थःथाय्‌ दुकयादी। 
स्‍वर्गय्‌ छि बाहेक जि सु हे दु धकाः? पृथ्‍वीइ जितः छि बाहेक छु हे माःगु दु धकाः? 
जिगु म्‍ह व मन बःमलाना वने फु तर जिगु शक्ति सदांया लागि परमेश्वर खः। अले वय्‌कः न्‍ह्याबलें जिम्‍ह खः। 
छिपाखें तापाःपिं नाश जुयावनी। छितः विश्वासघात याःपिन्‍त छिं नाश यानादी। 
परमेश्वरया लिक्‍क च्‍वनेगु जिगु निंतिं गुलि भिं। जिं परमप्रभुयात शरण कायेगु थाय्‌ यानागु दु। जिं छिं यानादीगु फुक्‍क ज्‍यायागु खँ कनाजुये।