भजन.
71.
हे परमप्रभु, जि छिगु शरणय्‌ वयागु दु, जितः गुबलें मछाले म्‍वाःलेमा। 
छिगु धार्मीकतां यानाः जितः बचय्‌ यानाः उद्धार यानादिसँ! जिगु प्रार्थना न्‍यनादिसँ अले जितः बचय्‌ यानादिसँ। 
जितः सदां सुलेजीक ल्‍वहंधी जुयादिसँ। जितः बचय्‌ यायेत उजं बियादिसँ, छाय्‌धाःसा छि जिगु किल्‍ला व शरण कायेगु थाय्‌ खः। 
हे परमेश्वर, जितः दुष्‍ट मनूतय्‌गु ल्हातं बचय्‌ यानादिसँ। नुगः मदुपिं व मभिंपिं मनूतय्‌गु ताकतं जितः बचय्‌ यानादिसँ। 
हे परमप्रभु, छि हे जक जिगु आशा खः। हे परमप्रभु, जिं मचांनिसें छिगु भरोसा कयागु दु। 
बूसांनिसें हे जि छिगु भरोसाय्‌ दु। मांया प्‍वाथंनिसें हे छिं जितः बिचाः यानाच्‍वनादीगु दु। उकिं जिं सदां छिगु प्रशंसा याये। 
मनूतय्‌गु निंतिं जि छम्‍ह नमुना जुयाब्‍यूगु दु। छाय्‌धाःसा छि जिम्‍ह बल्‍लाःम्‍ह रक्षक खः। 
उकिं जिं मदिक्‍क छिगु प्रशंसा यानाच्‍वनागु दु। न्‍हिन्‍हिं जिं छिगु महिमा न्‍यंकाच्‍वने। 
आः जि बुह्रा जुइधुंकाः जितः त्‍वःतादी मते। जि बमलायेधुन जितः वानादी मते। 
जिमि शत्रुतय्‌सं जितः स्‍यायेत स्‍वयाच्‍वंगु दु। इमिसं थवंथवय्‌ सल्‍लाह यानाः ग्‍वसाः ग्‍वयाजूगु दु। 
इमिसं धयाजूगु दु -- “परमेश्वरं वयात त्‍वःते धुंकल। वयात लितुलिनाः ज्‍वँ। छाय्‌धाःसा वयात बचय्‌ याइपिं सुं मदये धुंकल।” 
हे परमेश्वर, जिपाखें तापानादी मते जितः ग्‍वाहालि यायेत याकनं झासँ। 
जितः द्वपं बियाजूपिं मछालापुक बुइमा अले नाश जुइमा। जितः स्‍यायेत स्‍वयाजूपिं क्वह्यंकाः च्‍वनेमालेमा, अले मछालाः जुइमा। 
तर जिं ला छिगु ग्‍वाहालिया आशा कयांच्‍वने। जिं छिगु प्रशंसा अज्‍ज अप्‍वः याये। 
छिं यानादीगु धार्मिकताया खँ जिं सकसितं कनाजुइ। छिं यानादीगु मुक्तियागु खँ जिं न्‍हिन्‍हिं कने। अथे ला छिं यानादीगु ज्‍या जिं कनां कने मफु। 
हे परमप्रभु परमेश्वर, छिं यानादीगु तःधंगु ज्‍याया जिं प्रशंसा याये। जिं सकसित छिगु हे जक धार्मिकताया खँ न्‍यंके। 
हे परमेश्वर, छिं जितः मचांनिसें स्‍यनादीगु दु। अले जिं आःतकं छिं यानादीगु अजूचायापुगु ज्‍या मेपिन्‍त कनावयाच्‍वनागु दु। 
हे परमेश्वर, आः जि बुह्रा जुइ धुन जिगु सँ तुयुसे च्वने धुंकल। अय्‌नं आःया न्‍हू पुस्‍तायापिं मनूतय्‌त जिं छिगु अजूचायापुगु ज्‍यायागु खँ मन्यंकुतले जितः त्‍वःतादी मते। 
हे परमेश्वर, छिगु धार्मिकता स्वर्ग स्‍वयाः च्‍वजाः। छिं गुलि अजूचायापुगु ज्‍या यानादीगु दु, हे परमेश्वर, छि थेंज्‍याःम्‍ह सु दु धकाः? 
छिं जितः तःकः हे दुःखय्‌ लाकादिल तर छिं जितः हानं जीवन बियादीतिनि, अले मृत्‍युया गालं थकयादीतिनि। 
छिं जिगु इज्‍जत हानं अप्‍वय्‌कादी तिनि। अले जिगु दुःखकष्‍ट चीकाछ्वइतिनि। 
हे जिम्‍ह परमेश्वर, जिं वीणा थानाः छि विश्वास याये बहःम्ह खः धकाः प्रशंसा याये। हे इस्राएलया पवित्र परमेश्वर, सारंगी थानाः जिं छिगु प्रशंसाया म्‍ये हाले। 
जिं छिगु प्रशंसाया म्‍ये हालेबलय्‌ लय्‌तायाः ततः सलं हाले, छाय्‌धाःसा छिं जितः मू पुलाः त्‍वःतकादीगु दु। 
जिं न्‍हिन्‍हिं सकसितं छिगु धार्मिकताया बारे कने, छाय्‌धाःसा जितः स्‍यायेत स्‍वयाजूपिं सकलें मछालेमाःगु दु, अले इमिगु इज्‍जत वंगु दु।