भजन.
66.
लय्‌ तइम्‍हय्‌सिगु निंतिं - छपु भजन पृथ्‍वीइ च्‍वंपिं फुक्‍कसिनं परमेश्वरयात लय्‌तायाः जय जय या। 
वय्‌कःया नांया महिमा यानाः म्‍ये हा। वय्‌कःयात महिमा यानाः तःधंकि। 
परमेश्वरयात धा -- “छिं यानादीगु ज्‍या गपाय्‌सकं अजूचायापु। छिगु शक्ति नं थुलि तःधं, शत्रुत छिगु न्ह्यःने ग्‍यानाः कय्‌कुनी। 
पृथ्‍वीइ च्‍वंपिं फुक्‍कसिनं छितः आराधना याइ। इमिसं छितः तःधंकाः भजन हाली इमिसं छिगु नांयात तःधंकाः म्‍ये हाली।” सेला 
परमेश्वरं छु यानादिल धकाः स्‍वः वा, वय्‌कलं मनूतय्‌थाय्‌ गज्‍याः गज्‍याःगु अजूचायापुगु ज्‍या यानादिल। 
वय्‌कलं समुद्रया दथुइ लँ दय्‌कादिल, झी तापाःबाज्यापिन्सं न्‍यासि वनाः हे समुद्र छित, उकिं झी वय्‌कःया ज्‍याय्‌ लय्‌तायाच्‍वने। 
वय्‌कलं थःगु शक्तिं सदां राज्‍य यानादी, वय्‌कलं जाति जातियापिं फुक्‍कसित स्‍वयाच्‍वनी वय्‌कःया विरोधय्‌ सुं हे मदनेमा। सेला 
हे फुक्‍क जातियापिं मनूत, झी परमेश्वरयात प्रशंसा या! छिमिसं याःगु प्रशंसा सकसिनं तायेमा। 
वय्‌कलं झीत म्‍वाकातःगु दु, वय्‌कलं झीत लुफिं हाये बियामदी। 
हे परमेश्वर, छिं जिमित जाँचय्‌ यानादीगु दु, छिं जिमित वहःयात जाँचय्‌ याःथें जाँचय्‌ यानादीगु दु। 
छिं जिमित जालय्‌ लाकेबियादिल, अले ब्‍वहलय्‌ झ्यातुगु कु कुबिकादिल। 
छिं जिमित जिमि शत्रुतय्‌ पाखें न्‍हुकेबियादिल। जिपिं लः व मिया दथुं जुयाः वना। तर छिं जिमित आः सुरक्षित थासय्‌ हयादीगु। 
जि छिगु देगलय्‌ होमबलि ज्‍वनाः वये। अले जिं थःगु भाकल पूवंके। 
जि तःधंगु दुःखय्‌ लाःबलय्‌ जिं थःगु म्‍हुतुं यानागु भाकल खः, थ्‍व। 
जिं छिगु वेदीइ होमबलि कथं स्‍यल्‍लाःपिं फैत बलि बीहये। अले द्वहं व दुगुया बलि बीहये। सेला 
परमेश्वरया ग्‍याःभय काइपिं फुक्‍कं वयाः न्‍यँ, जिं वय्‌कलं जिगु निंतिं छुछु यानादिल धकाः कने। 
जिं ग्‍वाहालिया निंतिं वय्‌कःयात प्रार्थना याना। जिं भजन हालाः वय्‌कःयात तःधंका। 
जिगु नुगः पापं जाःगु जूसा वय्‌कलं जिगु प्रार्थना न्‍यनादी मखुगु जुइ। 
तर परमेश्वरं न्‍यनादिल। वय्‌कलं जिगु प्रार्थनाया लिसः बियादिल। 
परमेश्वरयात तःधंकि, वय्‌कलं जिगु प्रार्थनायात न्‍यनादिल, अले जितः थःगु सदां दयाच्‍वनिगु माया बियाच्‍वन।