भजन.
65.
दाऊदया भजन, लय्‌ तइम्‍हय्‌सिगु निंतिं -- छपु म्ये हे परमेश्वर, जिमिसं छितः सियोनय्‌ तःधंकेत पियाच्‍वना। अले जिमिसं छिगु नामय्‌ यानागु भाकल नं पूवंके। 
हे जिमिगु प्रार्थना न्‍यनिम्‍ह परमेश्वर, फुक्‍क मनूत छिथाय्‌ वइ। 
जिपिं पापं बिलिबिलि जायाच्‍वने धुंकूसां छिं जिपिं फुक्‍कसित क्षमा यानादिसँ। 
धन्‍य खः छिं ल्‍ययाः थःनापं पवित्र थासय्‌ हःपिं मनूत। छिगु पवित्रगु देगःया आशिषं जिपिं तसकं लुधं। 
हे जिमित उद्धार याइम्‍ह परमेश्वर, छिं जिमिगु प्रार्थनाया लिसः अजूचायापुगु ज्‍या यानाक्‍यनाः बियादी। पृथ्‍वीया कुंकुलामय्‌ च्‍वंपिं मनूत व समुद्रया तापाक्‍क तापाक्‍क च्‍वंपिं मनूतय्‌सं नं छितः विश्वास याःगु दु। 
छिं थःगु शक्तिं च्‍वापु गुंतय्‌त दय्‌काः थः थःगु थासय्‌ तयादिल 
छिं समुद्रया किसिद्वम्‍बः व मनूतय्‌गु हाःहूयात नं दिकादिल। 
छिगु अजूचायापुगु ज्‍या खनाः पृथ्‍वीया कुंकुलामय्‌ च्‍वंपिं मनूत ग्‍याःगु दु। छिं थःगु ज्‍यां निभाः लुइगु थासंनिसें निभाः बीगु थासय्‌ थ्‍यंक लसतां भय्‌बिका ब्‍यूगु दु। 
छिं पृथ्‍वीयागु च्‍यूताः कयादी, अले उकियात लः बियाः सय्‌कीगु यानादी। बुँइ अन्‍न सय्‌केत परमेश्वरया खुसि लखं जाः। छिं थथे थुकथं यानादी -- 
छिं क्‍वानातःगु बुँयात लखं गाक्‍क प्‍याकादी, वा वय्‌काः चायात नाइकादी अले अन्‍नमा सय्‌कादी। 
छिगु कृपां गुलि यक्‍व अन्‍न सइ। छिं गन पलाः तयादी, अन गाक्‍क अन्‍न सइ। 
मरुभूमिया ख्‍यःत वाउँसे च्‍वं अले पहाडत लसतां भय्‌ ब्‍यू। 
ख्‍यःत फै व च्‍वलय्‌तय्‌सं जाः बुँत अन्‍नं जाः। फुक्‍कं मिलय्‌ जुयाः लसतां म्‍ये हालाजुइ।