भजन.
60.
दाऊदया भजन, लय्‌ तइम्‍हय्‌सिगु निंतिं -- स्‍यनेकने यायेत दाऊदं आराम नहरैम व आराम सोबाहलिसें लडाइँ याःबलय्‌ अले योआबं लिहां वनाः चियागालय्‌ झिंनिद्वः एदोमीतय्‌त स्‍याःबलय्‌यागु, साक्षीया “लिलि स्‍वां” या रागय्‌ हे परमेश्वर! छिं जिमित त्‍वःतादिल। जिपिं खनाः छि तंम्‍वयादीगु दु। उकिं जिमिगु रक्षा यायेगु नं त्‍वःतादिल। जिमित हाकनं स्‍वयादिसँ। 
छिं जिमिगु बँयात लिगिलिगि संकाब्‍यूगु दु, जिमिगु बँयात चिरिफायाब्‍यूगु दु। आः थुकियात जाय्‌काबियादिसँ, छाय्‌धाःसा थ्‍व आः नं सनाच्‍वंगु दु। 
छिं थः मनूतय्‌त तःधंगु दुःखकष्‍ट बियादिल अले जिमित अय्‌लाःगुलुत थें लिगिलिगि संकाबिल। 
छिं छिगु भय काइपिन्‍त ख्‍याच्वः बियाः नाश जुइपाखें बचय्‌ यानादिल। सेला 
छिं बल्‍लाःगु जव ल्हातं जिमित बचय्‌ यानादिसँ, जिमिगु प्रार्थनाया लिसः बियादिसँ। छिं माया यानातःपिं मनूत बचय्‌ जुइमा। 
परमेश्वरं थःगु पवित्र थासं थथे धयादीगु दु - “जिं त्‍याकेधुंकाः शकेमयात ब्‍वथले। अले सुक्‍कोतया गाःयात थः मनूतय्‌त इनाबी। 
गिलाद व मनश्‍शे नं जिगु हे खः। एफ्राइम जिगु छ्यंया सुरक्षा खः। यहूदा जिगु राजदण्‍ड खः। 
मोआब जिगु ल्‍हाः सिलेगु थल खः। एदोमय्‌ जिं थःगु लाकां वांछ्‍वये। थुकथं थ्‍व जिगु खः धकाः क्‍यने। पलिश्‍त देशयात त्‍याकाः जि चिल्‍लाय्‌ दनाः हाले।” 
हे परमेश्वर, सुनां जितः प्‍यखें पःखाः दुगु शहरय्‌ यंकाबी? सुनां जितः एदोमय्‌ थ्‍यंकाबी? 
हे परमेश्वर, छु धात्थें हे छिं जिमित त्‍वःतादियागु ला? आः छि जिमिगु सेनालिसे जुइ मखुत ला? 
शत्रुतलिसे ल्‍वायेत जिमित ग्‍वाहालि यानादिसँ छाय्‌धाःसा मनूतय्‌गु ग्‍वाहालि ज्‍याख्‍यलय्‌ मदु। 
परमेश्वरया ग्‍वाहालिं जिमिसं त्‍याके, वय्‌कलं जिमि शत्रुतय्‌त बुकादी।