भजन.
59.
दाऊदया भजन, लय्‌ तइम्‍हय्‌सिगु निंतिं -- “स्‍यंके मते” धाःगु रागय्, शाऊलं दाऊदयात स्‍यायेत वयागु छेँय्‌ मनूत छ्वयाहःगु हे परमेश्वर, जितः जिमि शत्रुतय्‌ पाखें बचय्‌ यानादिसँ। जितः हय्‌क्‍काःवःपिं पाखें जितः बचय्‌ यानादिसँ। 
मभिंपिं मनूतय्‌ पाखें जितः बचय्‌ यानादिसँ। मनू स्‍यानाजुइपिं पाखें जितः बचय्‌ यानादिसँ। 
जिं छुं मभिंगु व पाप यानागु मदुसां इमिसं जितः स्‍यायेत स्‍वयाच्‍वंगु दु। ज्‍यानमारात जिगु विरोधय्‌ मुनाच्‍वंगु दु। 
जिं छुं अपराध यानागु मदुसां इपिं जितः हय्‌क्‍काःवयेत तयार जुयाच्‍वंगु दु। हे परमप्रभु, जितः बचय्‌ यायेत दनादिसँ। जितः जुयाच्‍वंगु दुःख स्‍वयादिसँ। 
हे दकसिबय्‌ बल्‍लाःम्‍ह परमप्रभु परमेश्वर, हे इस्राएलया परमेश्वर, फुक्‍क जातियापिन्‍त सजाँय बीत दनादिसँ। ध्‍वका बीपिन्‍त दया माया क्‍यनादी मते। सेला 
बहनिइ इपिं लिहां वइ। अले खिचात थें हालाः शहरया प्‍यखें चाःहिलाजुइ। 
इमिसं म्‍हुतु ल्‍हानाजूगु व ख्‍याच्‍वः बियाजूगु न्‍यनादिसँ। इमिगु मे तरवार थें ज्‍वः। उमिसं धयाजुइ -- “सुं दु ला न्‍यनिपिं?” 
तर हे परमप्रभु! छि इपिं खनाः न्‍हिलादी। अले अज्‍याःपिं फुक्‍कसित हिस्‍यानादी। 
छि जिगु बल खः। छिं जितः बचय्‌ याःवइ धकाः जि पियाच्‍वने। छि जिगु किल्‍ला खः। 
परमेश्वरं जितः माया यानादी। अले वय्‌कः जिथाय्‌ झाइ। परमेश्वरं जितः जिमि शत्रुत बूगु क्‍यनादी। 
हे परमप्रभु, हे जिमिगु ढाल। इमित याकनं स्‍यानादी मते। मखुसा जिमि मनूतय्‌सं इमिगु मभिंगु खँ ल्‍वःमंकाछ्वइ। थःगु शक्तिं छ्यालब्‍याल यानाः इमित बुकादिसँ। 
इमिगु म्‍हुतुइ पाप दु इमिगु खँ पापं जाः इपिं इमिगु हे घमण्‍डया जालय्‌ लायेमा। छाय्‌धाःसा इमिसं सराः बीगु व मखुगु खँ ल्‍हानाजुइगु यानाच्‍वन। 
उकिं इमित थःगु तमय्‌ नाश यानादिसँ। इमित न्‍हंक हे नाश यानादिसँ। अले सकसिनं सी - परमेश्वरं इस्राएलय्‌ राज्य यानादी। अले वय्‌कःया राज्‍य पृथ्‍वी न्‍यंक न्‍यनावनी। सेला 
जिमि शत्रुत बहनिइ लिहां वइ। अले खिचात थें हालाः शहरया प्‍यखें चाःहिलाजुइ। 
इपिं नसाया निंतिं उखेंथुखें चाःहिलाजुइ। अले लुधंक नये मखन कि खिचात थें हालाजुइ। 
तर जिं ला छिगु शक्तिया म्‍ये हाले। छिगु मदिक्‍क दयाच्‍वनिगु मायाया म्‍ये जिं सुथ न्‍हापां न्ह्याबलें हाले। छिं जितः जिगु दुःखकष्‍टया इलय्‌ शरण बियादीगु दु। 
छि जिगु बल खः, जिं छितः तःधंकाः म्ये हाले। छि जिगु किल्‍ला खः, परमेश्वरं जितः सदां माया यानादी।