भजन.
54.
दाऊदया मश्‍किल, लय्‌ तइम्‍हय्‌सिगु निंतिं -- तारं थाइगु बाजं थानाः हालेगु। जीफितय्‌सं शाऊलयाथाय्‌ वनाः “दाऊद गन सुलाच्‍वंगु दु जिमिसं स्‍यू” धकाः धाःबलय्‌। हे परमेश्वर! छिं थःगु नामं जितः बचय्‌ यानादिसँ! छिगु शक्तिं जितः छुत्‍कारा बियादिसँ। 
हे परमेश्वर! जिगु प्रार्थना न्‍यनादिसँ! जिगु सः न्‍यनादिसँ! 
शत्रुत जिगु विरोधय्‌ जुयाच्‍वंगु दु। ग्यानापुसे च्वंपिं मनूतय्‌सं जितः स्‍यायेत स्‍वयाच्‍वंगु दु। इमिसं परमेश्वरयागु ग्याःभय मकाः। सेला 
स्‍व, परमेश्वरं जितः ग्‍वाहालि यानादी। परमप्रभु जितः लिधंसा बीम्ह खः। 
परमेश्वरं जिमि शत्रुतय्‌गु मभिंगु ज्‍या इमित हे लित बियादीमा। छिं थःम्‍हं धयादी थें इमित नाश यानादिसँ। 
जिं छितः लय्‌तायाः मेलबलि छाये हये। जिं छिगु नांयात तःधंके, हे परमप्रभु! छाय्‌धाःसा छि भिंम्‍ह खः। 
वय्‌कलं जितः फुक्‍क दुःखकष्‍टं छुत्‍कारा बियादिल। अले वय्‌कलं जिमि शत्रुतय्‌त बुकादीगु जिं खनागु दु।