भजन.
51.
दाऊदया भजन, लय्‌ तइम्हय्‌सिगु निंतिं, नातान अगमवक्तां ब्वःबीधुंकाः दाऊदया पश्‍चातापया निंतिं हाःगु भजन हे परमेश्वर! जितः दया यानादिसँ। छाय्‌धाःसा छि सदां दया यानादीम्‍ह खः। जिगु पाप हुयाछ्‍वयादिसँ! छाय्‌धाःसा छि सदां मदिक्‍क माया यानादीम्‍ह खः। 
जिगु फुक्‍क अधर्मयात सिलादिसँ, अले जिगु पापं जितः शुद्ध यानादिसँ। 
जिं थःगु अपराध मानय्‌ याये, अले जिगु पाप न्‍ह्याबलें जिगु हे न्‍ह्यःने दु। 
हे परमेश्वर, छिं मभिं धकाः धयादीगु ज्‍या हे जिं यानागु दु, जिं छिगु विरोधय्‌ जक पाप यानागु दु, उकिं छिं जिगु न्‍याय यानादीगु पाय्‌छि जू अले जितः दोषी ठहरय्‌ यानादीगु पाय्‌छि ताय्‌के। 
स्‍वः, जि बूबलय्‌ हे पापी खः। मांया प्वाथय्‌ दुबलय्‌ निसें पापं जाःम्ह खः। 
छितः बूसांनिसें भिं मनू जूगु यः। उकिं जितः छिगु बुद्धि बियादिसँ। 
जि शुद्ध मजुतले जितः हिसप घाँय्‌नं सिलादिसँ, अले जि च्‍वापु स्‍वयाः तुयुसे च्‍वनी। 
जितः लसता व आनन्‍दया खँ हाकनं न्‍यंकादिसँ अले छिं त्‍वाथुलादीगु क्‍वँय्‌त लय्‌तायेमा। 
जिगु पाप पाखें छिगु ख्‍वाः फहीकादिसँ, अले जिगु फुक्‍क अधर्म हुयाछ्वयादिसँ। 
हे परमेश्वर, जिगु नुगःयात शुद्ध यानादिसँ। अले जिके हानं न्‍हूगु यानाः क्‍वातुगु आत्‍मा दय्‌कादिसँ। 
जितः छिगु न्‍ह्यःनं तापाक तयादी मते, अले थःगु पवित्र आत्‍मायात जिपाखें लित यंकादी मते। 
छिगु मुक्तिया लसता जितः हाकनं बियादिसँ। अले जितः छिगु आज्ञा मानय्‌ यायेगु मन बियाः कःघानादिसँ। 
अले जिं पापीतय्‌त छिगु लँ क्‍यने, इपिं छि पाखे लिहां वइ। 
हे परमेश्वर, जिगु उद्धारयाम्‍ह परमेश्वर, जितः मनू स्‍याःगु अपराधपाखें बचय्‌ यानादिसँ। अले जिं छिं बियादीगु धार्मिकताया निंतिं लय्‌तायाः म्ये हाले। 
हे परमप्रभु, जिगु म्‍हुतु चायेकादिसँ, अले जिं छितः प्रशंसा याये। 
बलि छाःगुलिइ छि लय्‌तायादी मखु, होमबलि नं छि लय्‌तायादी मखु। 
ख्‍वःगु नुगः हे परमेश्वरया निंतिं ल्‍वःगु बलि खः। हे परमेश्वर, ख्‍वःगु व पस्‍ताय्‌ चाःगु नुगःयात छिं मयय्‌कादी मखु, 
हे परमेश्वर, सियोनयात भिं यानादिसँ, उकियात ग्‍वाहालि बियादिसँ। यरूशलेमया पःखाः हाकनं दय्‌कादिसँ। 
अले छि पाय्‌छिगु बां बीगुलिइ लय्‌तायादी, व होमबलि बीगुलिइ लय्‌तायादी, मनूतय्‌सं हाकनं छिगु वेदीइ द्वहं बां बी।