भजन.
45.
कोरह वंशयापिनिगु भजन, लय्‌ तइम्हय्‌सिगु निंतिं जुजुया निंतिं थ्‍व म्‍ये च्‍वयाबलय्‌ जिगु नुगलय्‌ बाबांलाःगु खँग्‍वः भय्‌बियावःगु दु। जिगु मेचु नं छम्‍ह बांलाःम्‍ह कविया च्‍वसा थें जुयाब्‍यूगु दु। 
छि मनूत मध्‍ये दकले बांलाःम्‍ह खः। छिगु म्‍हुतुसिइ दया जाःगु दु। उकिं परमेश्वरं छितः न्ह्याबलेंया लागि आशिष बियादीगु दु। 
हे दकले बल्‍लाःम्‍ह जुजु! थःगु महिमा व प्रताप नापं थःगु तरवार जँय्‌ घानादिसँ। 
सत्‍य व न्‍यायया निंतिं थःगु साहस नापं सवारी जुयादिसँ। छिगु जवल्‍हातिं अजूचायापुगु ज्‍या क्‍यनेमा। 
छिगु च्‍वामुगु वाणं छिकपिनि शत्रुतय्‌गु नुगलय्‌ सुइ मा! जाति जातियापिन्‍सं छिगु तुतिइ भ्‍वपुइ मा! 
हे परमेश्वर, छिगु राज्‍य न्‍ह्याबलें दयाच्‍वनी। छिं थः मनूतय्‌त न्‍याय यानाः राज्‍य यानादी। 
छिं भिंगु खँ यय्‌कादी, मभिंगु खँयात छिं यय्‌कादी मखु, उकिं परमेश्वर, छिकपिनि परमेश्वरं छितः ल्ययादीगु दु अले छिकपिनि पासापिन्‍त स्वयाः अप्वः लय्‌ता बियादीगु दु। 
छिगु वसतं मूर्र व तेजपातयागु थें नस्‍वाः पिहां वः। किसिया धँवानं छायेपियातःगु लाय्‌कुलिइ बाजं थाइपिन्‍सं छितः लय्‌ताय्‌की। 
छिगु लाय्‌कुलिइ हनेबहःपिं मिस्‍तय्‌गु दथुइ जुजुपिनि म्ह्याय्‌पिं नं दु, छिगु जवपाखे ओपीरया लुँया तिसा तियातःम्‍ह भम्‍चा दु। 
न्‍यँ, हे राजकुमारी, बिचाः या, न्‍हाय्‌पं ब्यु, अले थः मनूत व थःछेँ नं ल्‍वःमंकी। 
छंगु हिसि खनाः जुजु लय्‌तायादीगु दु। वय्‌कः छिमि मालिक खः, उकिं वय्‌कलं धाः थें या। 
टुरोसया राजकुमारी देछा ज्‍वनाः वइ, तःमिपिन्‍सं छंगु कृपा कायेत स्‍वइ। 
राजकुमारी लाय्‌कुलिइ दु, व गुलि बांलाः। वयागु वसः लुँयागु कां थानातःगु दु। 
वयात झःझःधाःगु वसतय्‌ समिलुत ल्‍यूल्‍यू तयाः जुजुयाथाय्‌ यंकी। 
इपिं जुजुया लाय्‌कुलिइ लय्‌तातां दुहां वनी। 
छिकपिनि काय्‌पिन्‍सं छिकपिनि पुर्खातय्‌गु थाय्‌ काइ, इमित छिं सारा संसारयापिं राजकुमार दय्‌कादी। 
जिं पुस्‍तां पुस्‍ता तक छिगु नांयात तःधंकातये थुकिं जाति जातियापिन्‍सं छितः न्‍ह्याबलें तःधंकी।