भजन.
44.
कोरह वंशयापिनिगु मश्‍किल, लय्‌ तइम्हय्‌सिगु निंतिं हे परमेश्वर, छिं यक्‍व न्‍हापा जिमि पुर्खातय्‌गु पालय्‌ यानादीगु खँ इपिं पाखें जिमिसं थःगु हे न्‍हाय्‌पंनं न्‍यनागु दु। 
छिं थःगु हे शक्तिं जाति जातियापिं मनूतय्‌त पितिनाः इमिगु थासय्‌ जिमि पुर्खातय्‌त तयादिल। छिं इमि शत्रुतय्‌त क्‍वत्‍यलाः इमित ब्‍वलंकादिल। 
इमिसं तरवारया बलं देश त्‍याकाकाःगु मखु, इपिं थःगु शक्तिं त्‍याःपिं नं मखु। छिगु हे जव ल्‍हातं, छिगु हे लप्‍पां व छिगु ख्‍वाःया जलं इपिं त्‍याःगु खः। छाय्‌धाःसा छिं इमित यय्‌कादिल। 
हे परमेश्वर, छि हे जिमि जुजु खः, छिं याकूबयात त्‍याकेबियादी। 
छिगु हे बलं जिमिसं थः शत्रुतय्‌त ख्‍याना छ्वये, जिमि विरोधीतय्‌त जिमिसं छिगु हे नामं न्‍हुयातये। 
जिं थःगु धनुखय्‌ भलसा तये मखु, जिगु तरवारं जितः त्‍याकाबी मखु। 
तर छिं जिमित जिमि शत्रुतपाखें बचय्‌ यानादिल, अले जिमित मयय्‌कीपिन्‍त लज्‍या चाय्‌कादिल। 
जिमिसं न्‍हिच्‍छिं छिगु प्रशंसा याये, अले छितः न्ह्याबलें सुभाय्‌ बियाच्‍वने। 
अय्‌नं छिं जिमित त्‍वःतादिल, अले जिमित क्वह्यंकादीगु दु। आः छि जिमि सिपाइँत नापं न्ह्यःने झाइ मखु। 
छिं जिमित जिमि शत्रुतय्‌ न्ह्यःनें लिचिके बियादिल। अले जिमिगु फुक्‍कं जिमि शत्रुतय्‌त लाकायंके बियादिल। 
छिं जिमित मेपिनिगु आहार जुइत फैचातय्‌त थें त्‍वःतादिल, अले जातितय्‌ दथुइ जिमित उखेलाः थुखेलाः मदय्‌काबिल। 
छिं थः मनूतय्‌त दंक मियादिल। इमित मियाः छितः छुं नं फाइदा मजुल। 
छिं जिमित जिमि जःलाखःलातय्‌त हेस्याके बियादीगु दु, जिमि जःखः च्‍वंपिन्‍सं जिमित हेपं ख्‍यानाः हेबाय्‌चबाय्‌ याइगु। 
छिं जिमित मेगु जातितय्‌ दथुइ ख्‍यालिम्‍वः यानादिल। मनूतय्‌सं जिमित खन कि हेस्‍यानाः छ्यं संकीगु। 
न्‍हियान्‍हिथं जि क्‍वह्यंकाच्‍वने माःगु दु, जिगु ख्‍वाः लज्‍यां त्‍वपूगु दु। 
कुंखिनिपिं व हेस्‍याइपिनिगु वचनं अले बदला काइपिन्‍सं यानाः जितः थथे जूगु खः। 
छिगु बाचायात त्‍वथुलागु मदुसां जिमिसं छितः ल्‍वःमंकागु मदुसां थ्‍व फुक्‍क जिमित जूवल। 
जिमिगु नुगः छिपाखें फह्यूगु मदु, जिमिगु पलाः छिपाखें लिच्‍यूगु मदु। 
अय्‌नं छिं जिमित ध्‍वंचातय्‌थाय्‌ त्‍वःतादिल। छिं जिमित खिउँथाय्‌ वानाथकादिल। 
जिमिसं परमेश्वरया नांयात ल्‍वःमंकागु दुसा अले मेपिं द्यःतय्‌त प्रार्थना यायेत ल्‍हाः ल्‍ह्ननागु दुसा, 
परमेश्वरं थ्‍व खँ सि हे सी। छाय्‌धाःसा वय्‌कलं फुक्‍कसिगु नुगलय्‌ दुने च्‍वंगु खँ स्‍यू। 
अय्‌नं जिपिं छिगु लागि न्‍हिथं सीमालाच्‍वंगु दु। स्‍यायेत हःपिं फैचातय्‌त थें जिमित व्‍यवहार याइगु। 
हे परमप्रभु दनादिसँ! छि छाय्‌ द्यनाच्‍वनादिया? दनादिसँ! जिमित सदांया लागि त्‍वःतादी मते। 
छाय्‌ छिं मेखेपाखे स्‍वयादियागु? अले जिमित जूगु दुःख व सास्‍ति छाय्‌ ल्‍वःमंकादियागु? 
जिपिं ला धुलय्‌ ल्‍वाकबुक जुइधुंकल। जिमिगु म्‍ह चाय्‌ प्‍यपुने धुंकल। 
दनादिसँ, जिमित ग्‍वाहालि यानादिसँ। छिगु दयाया कारणं जिमित त्‍वःतकादिसँ।