भजन.
43.
हे परमेश्वर, जि दोष मदुम्‍ह खः धकाः क्‍यनादिसँ। छितः म्‍हमस्‍यूपिं सकल मनूत पाखें जितः रक्षा यानादिसँ। मखुगु खँ ल्‍हाइपिं व दुष्‍टपिं मनूतपाखें जितः बचय्‌ यानादिसँ। 
हे परमेश्वर, छि हे जिगु शरण खः। छिं जितः छाय्‌ त्‍वःतादियागु? शत्रुतय्‌सं क्‍वत्‍यय्‌काः जि छाय्‌ ख्‍वयाजुइमाःगु? 
छिगु जः व सत्‍ययात छ्वयाहयादिसँ, उमिसं हे जितः लँ क्‍यनेमा। अले छिगु पवित्र पर्वत सियोनय्‌, छि च्‍वनादीगु देगलय्‌ जितः हयेमा। 
अले हे परमेश्वर, जि छिगु वेदीइ वने। छि जिगु लसताया मुहान खः। जिं वीणा थानाः छिगु प्रशंसा याये। हे परमेश्वर, जिमि परमेश्वर! 
हे जिगु मन छाय्‌ थपाय्‌सकं क्‍वतुंगु? जि छाय्‌ थपाय्‌सकं नुगः मछिंगु? जिं परमेश्वरयाके आशा तये, हाकनं जिं थः परमेश्वर व थःत बचय्‌ याइम्‍हय्‌सित तःधंके।