भजन.
41.
दाऊदया भजन धन्‍य खः इपिं सुनां छुं मदुपिनिगु च्‍यूताः काइ। इमित दुःख जुइबलय्‌ परमप्रभुं ग्‍वाहालि यानादी। 
परमप्रभुं इमिगु रक्षा यानादी, अले इमिगु ज्‍यान बचय्‌ यानादी। वय्‌कलं इमिगु जीवनयात सुथांलाकादी। अले इमि शत्रुतय्‌पाखें इमित बचय्‌ यानादी। 
परमप्रभुं इमित उसाँय्‌ मदइबलय्‌ सुसाःकुसाः यानादी। अले लाय्‌कादी। 
जिं धया, “हे परमप्रभु, जिं छिगु विरोधय्‌ पाप याना। जितः दया यानादिसँ, अले लाय्‌कादिसँ।” 
जिमि शत्रुतय्‌सं जि याकनं सीमा, अले सकसिनं जितः ल्‍वःमंका छ्‌वयेमा धकाः धयाजूगु दु। 
जिमि पासापिं धकाः स्‍वःवइपिन्‍सं नं जिगु मभिंगु खँ जक मुंकाः यंकी, अले न्‍ह्याम्‍हय्‌सितं न्‍यंकाजुइ। 
जितः महीपिन्‍सं नं थवंथवय्‌ जिगु खँ स्‍वांपुया जुइ। इमिसं जिगु मभिंगु बिचाः याना जुइ, 
“वयात तःल्‍वचं कःगु दु, व आः लासां हे दनावये फइ मखुत।” 
छपाः हे भुइ नयाम्‍ह जिमि छम्‍ह स्‍याःन्‍याःम्‍ह पासा तकं जिगु विरोधय्‌ वन। वयात जिं तसकं विश्वास यानातयागु खः। 
हे परमप्रभु! जितः दया यानाः हाकनं लाय्‌कादिसँ। अले जिं जिमि शत्रुतय्‌के पलेसा काये। 
जिं स्‍यू छि जिलिसे लय्‌तायादीगु दु, छाय्‌धाःसा छिं इमित जितः त्‍याकेबिया मदी। 
छिं जितः ग्‍वाहालि यानादिल, छाय्‌धाःसा जि दोष मदुम्‍ह खः। छिं जितः सदांया निंतिं थःलिसें तयादिल। 
परमप्रभु, इस्राएलया परमेश्वरया प्रशंसा या। आः, अले न्‍ह्याबलें। आमेन! आमेन!