भजन.
38.
दाऊदया भजन हे परमप्रभु, जितः तमय्‌ ब्‍वःबियादी मते। थःगु तच्‍वःगु तमय्‌ जितः सजाँय बियादी मते। 
छिं जितः थःगु वाणं घाःपाः यानादीगु दु। छिं थःगु ल्‍हाः जिगु म्‍हय्‌ तयादीगु दु 
छि तंम्‍वयादीगुलिं जि म्‍हंमफय्‌ धुंकल। जिगु पापं यानाः जिगु क्‍वँय्‌ न्‍यले धुंकल। 
जि म्‍ह छम्‍हं पापय्‌ दुने धुन। ल्‍ह्वनां ल्ह्वने मफय्‌क थ्‍व झ्‍यातुइ धुंकल। 
जि मूर्ख जुयागुलिं जिगु घाः ध्‍वगिनाः नवये धुंकल। 
जि थस्‍वये मफये धुन, जिगु म्‍ह छम्‍हं स्‍याये धुंकल। न्‍हिच्‍छि न्‍हिच्‍छिं जि ख्‍वयाः सनाजुयाच्‍वना। 
जिगु म्‍ह छम्‍हं ज्‍वर वयाः पुनाच्‍वंगु दु। जि सी थें च्‍वने धुंकल। 
जिगु म्‍ह छम्‍हं न्‍यले धुंकल, म्‍ह छम्‍हं चाःतुलावने धुंकल, जिगु स्‍याः नुगलं झसुकाः पिज्‍वयाच्‍वंगु दु। 
हे परमप्रभु, जिं छु मनं तुनागु खः धकाः ला छिं सि हे स्‍यू, जिगु झसुकाः नं छिं न्‍यनादीगु दु। 
जिगु नुगः भारा-भारा मिनाच्‍वंगु दु, जिगु बल तनावने धुंकल, जिं मिखां नं मछुयावने धुंकल। 
जि पासापिं व थःथितिपिं नं जिगु ल्‍वचं ग्‍यानाः तातापानाजुइ धुंकल, जिगु छेँजःपिं हे नं सत्तिक मवये धुंकल। 
जितः स्‍यायेत स्‍वयाच्‍वंपिन्‍सं थुबलय्‌ हे जाः ग्‍वयाच्‍वंगु दु, जिगु मभिं तुनाच्‍वंपिन्‍सं जितः सिधय्‌केगु ख्‍याच्‍वः बियाच्‍वंगु दु। न्‍हियान्‍हिथं इमिसं जिगु विरोधय्‌ जाः ग्‍वयाच्‍वंगु दु। 
इमिगु ख्‍याच्‍वः न्‍यँन्‍यं जि ख्‍वाँय्‌ जुयाबी धुन। इमिगु न्‍ह्यःने जि नवाये मफुम्‍ह पाकः जुयाबी धुन। 
सुयागुं खँ मन्‍यनेगु हे बांलाः ताये धुंकल, अले सुयातं छुं हे लिसः मबी धुन। 
हे परमप्रभु, जिं आः छितः हे जक पियाच्‍वनागु दु। हे परमप्रभु, जि परमेश्वर! छिं जितः लिसः बियादी। 
जिमि शत्रुतय्‌त जिगु दुःखय्‌ लाय्‌बुइके बियादी मते, जि बमलाःगुलिइ इमित लय्‌ताय्‌के बियादी मते। 
जि क्‍वदलेत्‍यंगु दु, मदिक्‍क जितः स्‍यानाच्‍वंगु दु। 
जिं जिगु पाप नालाकाये, जिं यानागु ज्‍याखँय्‌ जितः दुःख ताः। 
जिमि शत्रुत जि स्‍वयाः यक्‍व बल्‍लाः, गुलिखे शत्रुत ला म्‍वाय्‌कं म्‍वाय्‌कं जितः महीपिं नं दु। 
इमिसं जिगु भिंगु ज्‍याया पलेसा जितः मभिं यानाच्‍वंगु दु। अले जिं भिंगु ज्‍या यानागुया विरोधय्‌ जुयाच्‍वंगु दु। 
हे परमप्रभु, जितः त्‍वःतादी मते हे परमेश्वर, जिपाखें तापानादी मते 
जितः बचय्‌ यानादीम्‍ह जि परमप्रभु! याकनं झायाः जितः ग्‍वाहालि यानादिसँ।