भजन.
33.
दाऊदया भजन परमप्रभुयात विश्वास याइपिं फुक्‍कं परमप्रभुलिसे लय्‌तायाच्‍वँ। नुगः यचुपिन्‍सं वय्‌कःया प्रशंसा याये ल्‍वः। 
वीणा थानाः परमप्रभुयात तःधंकि! सारंगी थानाः वय्‌कःयागु भजन हा! 
वय्‌कःया निंतिं न्‍हूगु भजन हा। यइपुक तार बाजं थानाः म्‍ये हालाः लय्‌ता। 
छाय्‌धाःसा परमप्रभुया वचन सत्‍य खः अले वय्‌कःया ज्‍या फुक्‍कं विश्वास याये बहः जू। 
वय्‌कलं भिंगु व न्‍यायया खँ जक यय्‌कादी। वय्‌कःया मदिक्‍क दयाच्‍वनिगु दया मायां पृथ्‍वी जाइ। 
परमप्रभुं उजं बियाः आकाश दय्‌कादिल, अले सासलं फुक्‍क नगुत। 
वय्‌कलं फुक्‍क समुद्रयात छथाय्‌ मुंकादिल, अले ततःजाःगु समुद्रयात थःगु धुकुतिइ तयादिल। 
संसारय्‌ च्‍वंपिं फुक्‍कसिनं परमप्रभुयागु ग्‍याःभय कायेमा, अले वय्‌कःयात हनाबना तयेमा। 
वय्‌कलं धयादिसेंलि संसारया सृष्‍टि जुल। वय्‌कःया उजं दयेवं फुक्‍कं खनेदयावल। 
परमप्रभुं जातितय्‌गु फुक्‍क ग्‍वसाः चुंदंकाबी, अले इमिसं क्‍वःछिनातःगु ज्‍याखँयात पनादी। 
परमप्रभुया ग्‍वसाः धाःसा सदां दयाच्‍वनी। वय्‌कःया बिचाः गुबलें नं हिली मखु। 
धन्‍य खः व जातिया मनूत, गुगु जातिया परमेश्वर परमप्रभु खः। इपिं धन्‍यपिं खः, सुयात परमप्रभुं थः सर्बय्‌ जुइत ल्‍ययादिल। 
परमप्रभुं स्‍वर्गं क्‍वय्‌ स्‍वयादी, अले फुक्‍क मनूतय्‌त खनी। 
वय्‌कलं थः च्‍वनाच्‍वंगु थासं पृथ्‍वीइ च्‍वंपिं फुक्‍क मनूतय्‌त स्‍वयादी। 
वय्‌कलं इपिं फुक्‍कसित नुगः बियादी, उकिं वय्‌कलं इमिसं याइगु फुक्‍क ज्‍याखँ सीकादी। 
सुं नं जुजु बल्‍लाःपिं सिपाइँत दयेवं जक त्‍याइ मखु। अले सुं नं सिपाइँनं थःगु बलं जक त्‍याके फइ मखु। 
सल दयेवं जक नं लडाइँलय्‌ त्‍याकेफइ मखु, थुमिगु फुक्‍क बल मुंकाः नं बचय्‌ याये फइ मखु। 
तर सुनां परमप्रभुया ग्‍याःभय काइ अले वय्‌कःया सदां दयाच्‍वनिगु दया मायाय्‌ भलसा तइ, वयात वय्‌कलं बिचाः यानादी। 
वय्‌कलं इमित कालया म्‍हुतुं बचय्‌ यानादी, अले अनिकालया इलय्‌ नं वय्‌कलं इमित म्‍वाकातइ। 
झीसं परमप्रभुयागु हे भलसा काये वय्‌कः हे झीगु ग्‍वाहालि व ढाल खः। 
वय्‌कःलिसे झीगु नुगः लय्‌ताइ छाय्‌धाःसा झीसं वय्‌कःया पवित्र नांयागु भलसा कयागु दु। 
हे परमप्रभु, छिगु सदां दयाच्‍वनिगु दया माया जिमिके दयाच्‍वनेमा, छाय्‌धाःसा जिमिसं छिगु हे जक भलसा कयागु दु।