भजन.
30.
दाऊदया भजन हे परमप्रभु, जिं छितः तःधंके, छाय्‌धाःसा छिं जितः बचय्‌ यानादिल। अले जिमि शत्रुतय्‌त जितः लाय्‌बुइके मफय्‌काबिल। 
हे परमप्रभु जिमि परमेश्वर! जिं ग्‍वाहालिया निंतिं छितः प्रार्थना याना। अले छिं जितः लाय्‌कादिल। 
हे परमप्रभु, छिं जितः सीगालं थकयादिल। अले कालया म्‍हुतुइ थ्‍यने धुंकूम्‍ह जितः लिगनाहयादिल। 
परमप्रभुयात विश्वास याइपिं फुक्‍कसिनं वय्‌कःयात तःधंकि। भजन हालाः वय्‌कःया पवित्र नांयात तःधंकि। 
वय्‌कःया तं धयागु घौपलखया निंतिं जक खः, वय्‌कःया दया माया मसितले दयाच्‍वनी। चच्‍छि ख्‍वये माःसां सुथय्‌ ला जितः सुख दइ। 
जिं थः बचय्‌ जुइधुंकाः धया – “आः जितः सुनानं छुं यायेफइ मखुत।” 
हे परमप्रभु, छिं जितः स्‍वयादिल। छिं जितः पहाड थें बल्‍लाकादिल! तर गुबलय्‌ छि जिपाखें फस्‍वयादिल, उबलय्‌ धाःसा जि ग्‍यात। 
हे परमप्रभु, जिं छितः प्रार्थना याना, परमप्रभुयात हे जिं दयाया निंतिं प्रार्थना याना – 
“जि सिनाः छितः छु दइ? सीधुंकाः छितः सुनां तःधंकी? धू जुइ धुंकाः सुनां छि विश्वास याये बहःम्‍ह धकाः धाइ? 
हे परमप्रभु, जिगु खँ न्‍यनादिसँ। जितः दया यानादिसँ। जितः ग्‍वाहालि यानादिसँ।” 
जिगु दुःखयात छिं लसताया प्‍याखनय्‌ हिलादिल। जिगु दुःखयात न्‍हंकाः छिं लसतां जाय्‌कादिल। 
उकिं जि सुम्‍क च्‍वने मखु, छितः तःधंकाः म्‍ये हाले। हे परमप्रभु, जिमि परमेश्वर! जिं छितः सदां सदां सुभाय्‌ बियाच्‍वने।