भजन.
28.
दाऊदया भजन हे परमप्रभु, जितः रक्षा यानादीम्‍ह! जिं छितः प्रार्थना याये, जिगु खँ न्‍यनादिसँ छिं जिगु खँ न्‍यनामदिल धाःसा जि ला याकनं हे सी। 
ग्‍वाहालिया निंतिं जिं प्रार्थना यायेबलय्‌ अले छिगु पवित्र थाय्‌पाखे ल्‍हाः ब्‍वय्‌केबलय्‌ जिगु खँ न्‍यनादिसँ। 
मभिंगु ज्‍या याइपिं दुष्‍टतलिसें जितः सजाँय बियादी मते। इमिसं म्‍हुतुं ला थः जःलाखःलापिंलिसे नाइक खँ ल्‍हाइ, इमिगु नुगलं धाःसा मभिंगु जाः ग्‍वयाच्‍वनि। 
इमिगु ज्‍या व इमिसं याःगु मभिंगु ज्‍याकथं इमित सजाँय बियादिसँ, इमिगु ल्‍हातं याःगु ज्‍याकथं इमित पलेसा बियादिसँ, अले इमित बीमाःगु सजाँय बियादिसँ। 
परमप्रभुं छुछु यानादिल, वय्‌कलं थःगु ल्‍हातं छुछु दय्‌कादिल धयागु खँय्‌ इमित छुं हे च्‍यूताः मदु। उकिं वय्‌कलं इमित सदां सदांया निंतिं नाश यानादी। अले हाकनं इपिं खनेदइ मखु। 
परमप्रभुया प्रशंसा जुइमा! छाय्‌धाःसा ग्‍वाहालिया निंतिं जिं यानागु प्रार्थना वय्‌कलं न्‍यनादीगु दु। 
परमप्रभु जिगु बल खः, अले जिगु ढाल नं। जिं दुनुगलंनिसें वय्‌कःयागु भलसा कयागु दु। वय्‌कलं जितः ग्‍वाहालि यानादी, अले जिगु नुगः लसतां जाः। जिं वय्‌कःयात तःधंकाः म्‍ये हाले। 
परमप्रभुं थः मनूतय्‌त शक्ति बियादी वय्‌कः अभिषेक जूम्‍हय्‌सित रक्षा याइगु किल्‍ला खः। 
हे परमप्रभु, थः मनूतय्‌त बचय्‌ यानादिसँ। थः सर्बय्‌यात आशिष बियादिसँ। अले इमि जवाः जुयाः इमिगु बिचाः यानादिसँ।