भजन.
27.
दाऊदया भजन परमप्रभु जिगु जः व जितः मुक्ति बीम्‍ह खः। जि सु खनाः ग्‍यायेगु? परमप्रभु हे जिगु किल्‍ला खः। जि सुलिसे ग्‍यायेगु? 
गुबलय्‌ दुष्‍टत जिगु ला नयेत न्‍ह्यज्‍याः वइ, जितः महीपिं व जिमि शत्रुत जितः हय्‌क्‍काःवइ, इपिं लुफिं हानाः क्‍वःदइ। 
फुक्‍क सिपाइँत जिगु विरोधय्‌ दनावःसां जि ग्‍याये मखु। सुनानं जितः हय्‌क्‍कावःसां जि लिचिले मखु। 
जिं न्‍ह्याबलें मालाच्‍वनागु छता हे जक खँ परमप्रभुयाके जिं छता हे जक फ्‍वने, जिं व हे मालाच्‍वने -- परमप्रभुयागु हिसिलाःगु ख्‍वाः स्‍वयेत व वय्‌कःयात म्‍हसीकेत वय्‌कःयागु देगलय्‌ सदां च्‍वने दयेमा। 
छाय्‌धाःसा दुःखकष्‍टयागु इलय्‌ वय्‌कलं जितः थःथाय्‌ हे सुचुकादी वय्‌कलं जितः थःगु पालय्‌ सुचुकादी। वय्‌कलं जितः तःजाःगु ल्‍वहँतय्‌ तयादी। 
आः जिगु छ्यं जिमि शत्रुतय्‌गु न्‍ह्यःने धस्‍वाइ। अले जि वय्‌कःयागु पवित्रगु थासय्‌ बलि बियाः लय्‌तायाच्‍वने। जिं भजन हाले, जिं परमप्रभुया प्रशंसा याये। 
हे परमप्रभु! जिं तस्‍सलं सःतेबलय्‌ छिं न्‍यनादिसँ। जितः दया यानादिसँ, अले लिसः बियादिसँ! 
छिं “जिथाय्‌ वा” धयादीबलय्‌, जिं लिसः बिया – “जि वये परमप्रभु।” 
जिपाखें थःगु ख्‍वाः फहिकादी मते, परमप्रभु। तमय्‌ थः दासयात थःपाखें तापाकादी मते, छि जितः ग्‍वाहालि यानादीम्‍ह खः। जितः मुक्ति बियादीम्‍ह प्रभु -- जितः त्‍वःतादी मते! जितः गुबलें त्‍याग यानादी मते! 
जितः जिमि मांबौनं त्‍वःतूसां परमप्रभुं जितः त्‍वःतादी मखु। 
हे परमप्रभु, जितः छिगु लँपु क्‍यनादिसँ। जिमि शत्रुत यक्‍व दुगुलिं जितः खःगु लँय्‌ यंकादिसँ। 
जितः इमिगु ल्‍हातय्‌ त्‍वःतादी मते छाय्‌धाःसा इमिसं मभिंगु मतिइ तयाः जिगु विरोधय्‌ मखुगु साक्षी बियाच्‍वंगु दु। 
परमप्रभुयागु भिंगु ज्‍या जिं थ्‍व हे जीवनय्‌ स्‍वये दइ तिनि धकाः जितः विश्वास दु। 
परमप्रभुयागु लँ स्‍वयाच्‍वँ। साहस या, थःगु नुगः बल्‍लाकि। परमप्रभुयागु लँ स्‍वयाच्‍वँ।