भजन.
26.
दाऊदया भजन हे परमप्रभु, जि दोष मदुम्‍ह खः धकाः सकसितं क्‍यनादिसँ। छाय्‌धाःसा जिं भिंगु व खःगु जक ज्‍याखँ यानागु दु। अले छफुति हे लिमच्‍युसे परमप्रभुयागु भलसा कयागु दु। 
हे परमप्रभु, जि गज्‍याःम्‍ह खः धकाः जिगु नुगः व बिचाःयात जाँचय्‌ यानादिसँ। 
छिगु तःधंगु दया माया न्‍ह्याबलें जिगु नुगलय्‌ दु। अले छिगु हे विश्वासय्‌ जि न्‍ह्याःवनाच्‍वनागु दु। 
जि कर्पिन्‍त हय्‌काजुइपिं मनूतलिसे मजुया, जि निपा ख्‍वाःपाः दुपिं मनूतलिसे नं मजुया। 
जि मभिंगु ज्‍या यानाजुइपिनिगु पुचलय्‌ नं मवना, अले दुष्‍ट मनूतलिसे नं मजुया। 
जिं थः दोष मदुम्‍ह धकाः क्‍यनेत ल्‍हाः सिले, हे परमप्रभु! छिगु वेदीइ वयाः चाःहुलाः 
जिं ततःसलं छितः तःधंकाः म्‍ये हाले अले छिगु अजूचायापुगु ज्‍यायागु खँ कने। 
हे परमप्रभु, जितः छिगु महिमा झःझः धायेक खनेदइगु छि च्‍वनादीगु पबित्र थाय्‌ यः। 
जितः पापीतय्‌त थें नाश यानादी मते। अले ज्‍यानमारातय्‌त थें जितः सजाँय बियादी मते। 
इमिगु ल्‍हातिं ला मभिंगु ज्‍या जूगु दु, अले इमिसं घुस कायेगु ज्‍या नं यानाच्‍वंगु दु। 
तर जि ला अथे मखु, भिंगु व खःगु ज्‍या जक जिं यानागु दु। उकिं जितः दया यानाः बचय्‌ यानादिसँ। 
जि माथंवंथाय्‌ दनाच्‍वनागु दु, अले जिं सभाया न्‍ह्यःने परमप्रभुया प्रशंसा याये।