भजन.
25.
दाऊदया भजन हे परमप्रभु! जिं थःगु मन छिपाखे ल्‍ह्वने। 
जिं छिगु हे भलसा कयागु दु! जितः मछालेपुके मते। जितः जिमि शत्रुतय्‌सं त्‍याकेबियादी मते। 
छिगु भलसा काइपिं सुं नं मछालेमालि मखु। मेपिन्‍त ध्वंलाये स्‍वइपिं मनूत जक मछालेमालि। 
हे परमप्रभु! जितः छिगु लँपु क्‍यनादिसँ, अले उकी जुइगु नं स्‍यनादिसँ। 
छिगु सत्‍यया लँपुइ जितः यंकादिसँ, अले स्‍यनादिसँ, छाय्‌धाःसा छि जितः बचय्‌ यानादीम्‍ह परमेश्वर खः। न्‍हियान्‍हिथं जिं छिगु भलसा कयागु दु। 
हे परमप्रभु! छिं जितः यक्‍व न्‍ह्यः क्‍यनादीगु गुबलें मफुइगु दया माया लुमंकादिसँ। 
जिं ल्‍याय्‌म्‍हबलय्‌ यानागु पापयात ल्‍वःमंकादिसँ। जितः लुमंकादिसँ, अले छि धात्‍थें गुलि दया माया दुम्‍ह खः धकाः क्‍यनादिसँ। 
परमप्रभु भिंम्‍ह व धर्मीम्‍ह खः उकिं वय्‌कलं पापीतय्‌त नं भिंगु लँय्‌ जुइगु स्‍यनादी। 
वय्‌कलं क्‍वमिलुपिन्‍त भिंगु लँय्‌ यंकादी, अले इमित थःगु लँपुइ जुइत स्‍यनादी! 
वय्‌कःयागु बाचा कथं जुइपिं व व्‍यवस्‍था मानय्‌ याइपिन्‍त वय्‌कलं गुबलें मफुइगु दया माया व विश्वास क्‍यनादी। 
हे परमप्रभु! थःगु नांयात तःधंकेत जिगु पाप न्‍ह्याक्‍व हे तःधंसां क्षमा यानादिसँ। 
परमप्रभुया ग्‍याःभय काइपिं सु दु? वय्‌कलं इमित इपिं वनेमाःगु लँपु क्‍यनादी। 
इमिगु न्‍ह्याबलें भिं जुइ इमि मस्‍तय्‌सं देशय्‌ अधिकार याइ। 
परमप्रभुया ग्‍याःभय काइपिन्‍त वय्‌कलं थः पासा थें यानादी, अले वय्‌कलं इमित बाचायागु खँ कनादी। 
जिगु मिखा न्‍ह्याबलें परमेश्वरयाके दु, छाय्‌धाःसा वय्‌कलं जितः न्‍ह्याबलें शत्रुतय्‌गु जालं त्‍वःतकादी। 
जिपाखे स्‍वयादिसँ, अले जितः दया यानादिसँ, छाय्‌धाःसा जि याकःचा जुल, अले जितः तसकं कष्‍ट जुयाच्‍वंगु दु। 
जिगु नुगःया कष्‍ट झन्‌ झन्‌ तच्‍वयावनाच्‍वंगु दु। जितः थ्‍व फुक्‍क पाखें बचय्‌ यानादिसँ। 
जिगु फुक्‍क दुःख व कष्‍टयात बिचाः यानादिसँ, अले जितः जिगु फुक्‍क पापं क्षमा यानादिसँ। 
स्‍वयादिसँ, जिमि शत्रुत गुलि दये धुंकल, अले इमिसं जितः गपाय्‌सकं मही। 
जि छिगु शरणय्‌ वयागु दु, जितः छुत्‍कारा‌ यानादिसँ जितः मछालापुकादी मते। 
जिगु इमान्‍दारी व भिंगु पहलं यानाः जितः बचय्‌ यानातयेमा। छाय्‌धाःसा जिं छिगु भलसा कयागु दु। 
हे परमेश्वर, थ्‍व फुक्‍क दुःखकष्‍टपाखें इस्राएलीतय्‌त बचय्‌ यानादिसँ।