भजन.
24.
दाऊदया भजन पृथ्‍वी व पृथ्‍वीइ च्‍वंगु फुक्‍कं परमप्रभुयागु खः। संसार व संसारय्‌ च्‍वंपिं फुक्‍कं परमप्रभुयागु खः। 
वय्‌कलं संसारयात पृथ्‍वीया तःलय्‌ च्‍वंगु लःया च्‍वय्‌ दय्‌कादिल। अले थुकिया जग समुद्रया क्‍वय्‌ स्‍वनादिल। 
सुनां परमप्रभुया पर्वत गये फइ? वय्‌कःया पवित्र थासय्‌ सु दने फइ? 
थथे इमिसं जक याये फइ, सुयागु नुगः व ल्‍हाः शुद्ध जुइ, सुनां मूर्तियागु पुजा याइ मखु, सुनां मखुगु बचं याइ मखु। 
इमित बचय्‌ यानादीम्‍ह परमप्रभुं इमित आशिष बियादी। अले दोष मदुपिं ठहरय्‌ यानादी। 
थज्‍याःपिन्‍सं जक छितः लुइके फइ। अले छिगु न्‍ह्यःने सेवा यायेफइ, हे याकूबया परमेश्वर! सेला 
पुलांगु ध्‍वाखात चालाहुँ! पुलांगु लुखात चालाहुँ! अले तःधंम्‍ह जुजुयात दुहां वयेब्‍यु! 
तःधंम्‍ह जुजु सु खः? झी परमप्रभु, गुम्‍ह तसकं बल्‍लाः, लडाइँलय्‌ सुनानं बुकेमफुम्‍ह झी परमप्रभु! 
पुलांगु ध्‍वाखात चालाहुँ! पुलांगु लुखात चालाहुँ! अले तःधंम्‍ह जुजुयात दुहां वयेब्‍यु! 
तःधंम्‍ह जुजु सु खः? दकसिबय्‌ बल्‍लाःम्‍ह परमप्रभु! वय्‌कः तःधंम्‍ह जुजु खः। सेला