भजन.
20.
दाऊदया भजन दुःखया इलय्‌ छन्‍त परमप्रभुं लिसः बियादीमा। याकूबया परमेश्वरं छन्‍त बचय्‌ यायेमा। 
वय्‌कलं थःगु पवित्र थासं छन्‍त ग्‍वाहालि छ्‌वयाहयादीमा। अले सियोनयागु पर्वतं छन्‍त तिबः बियादीमा। 
वय्‌कलं छं छाःगु फुक्‍क अन्‍न बलियात लुमंकादीमा। वय्‌कः छंगु होमबलिं लय्‌तायादीमा। सेला 
वय्‌कलं छं मनंतुंगु फुक्‍कं पूवंकादीमा। अले छंगु ग्‍वसाः फुक्‍कं ताःलाकादीमा। 
छि त्‍याःगुलिं जिमिसं ततःसलं लय्‌तायाः भजन हाले अले झी परमेश्वरया नामय्‌ ध्‍वाँय्‌ ब्‍वय्‌के। परमेश्वरं छंगु फुक्‍क प्रार्थना न्‍यनादीमा। 
आः जिं सिल, परमप्रभुं थःम्‍हं अभिषेक यानादीम्‍ह जुजुयात ग्‍वाहालि यानादी। वय्‌कलं पवित्र स्‍वर्गं वयात लिसः बियादी। अले थःगु शक्तिं वयात बचय्‌ यानादी। 
गुलिं मनूत थःगु रथया भलसाय्‌ च्‍वनि, गुलिं मनूत थःगु सलया भलसाय्‌ च्‍वनि, झी धाःसा परमप्रभु झी परमेश्वरया भलसाय्‌ च्‍वने। 
इपिं लुफिं हानाः क्‍वदली तर झी बल्‍लानाः धस्‍वानाच्‍वनी। 
हे परमप्रभु, जिमि जुजुयात त्‍याकेबियादिसँ, अले जिमिगु प्रार्थना न्‍यनाः लिसः बियादिसँ।