भजन.
19.
दाऊदया भजन आकाशं गुलि बांलाक परमेश्वरया महिमा कनाच्‍वंगु दु! गुलि अःपुक आकाशं वय्‌कःया ल्‍हाःया कला क्‍यनाच्‍वंगु दु। 
न्‍हियान्‍हिथं थ्‍व खँ थौंया न्‍हिं कन्‍हय्‌या न्‍हियात न्‍ह्यथनाच्‍वनि, अले थौंया चां कन्‍हय्‌या चायात ध्‍वाथुइकाच्‍वनि। 
गनं छसः मदुसां गनं छग्‍वः आखःग्‍वः मदुसां 
इमिगु सुचं संसार न्‍यंक न्‍यनाच्‍वंगु दु, अले संसारया कुंकुलामय्‌ थ्‍यंक तायेदयाच्‍वंगु दु। परमेश्वरं सूर्यया लागि आकाशय्‌ च्‍वनेत थाय्‌ दय्‌कादीगु दु। 
सुथ न्‍हापां नकतिनि ब्‍याहा याःम्‍ह मिजं थें व लय्‌तातां पिहां वइ, कासाय्‌ त्‍याकेत लय्‌तायाः ब्‍वाँय्‌ वःम्‍ह कासामि थें व पिहां वइ। 
व आकाशया छगू कुनं पिहां वयाः मेगु कुनय्‌ तक थ्‍यनी, वयागु क्‍वाःजलं छुं नं सुलाच्‍वनेफइ मखु। 
परमप्रभुया स्‍यनातःगु खँ पक्‍का खः, थुकिं झीत न्‍हूगु बल बी। वय्‌कःयागु नियम विश्वास याये बहः जू, थुकिं छुं मस्‍यूपिन्‍त ज्ञां बी। 
परमप्रभुया उपदेश खःगु खः, थुकिं नुगःयात लय्‌ताय्‌की। परमप्रभुया स्‍यनातःगु खँ पाय्‌छिगु खः, थुकिं मिखायात जः बी। 
परमप्रभुया भय कायेगु बांलाः थ्‍व न्‍ह्याबलें दयाच्‍वनी। परमप्रभुया न्‍याय सत्‍यं जाः। थ्‍व न्‍ह्याबलें उतिग्‍यं। 
थुपिं लुँ स्‍वयाः अप्‍वः यइपुसे च्‍वं भिंगु लुँ स्‍वयाः अप्‍वः, अले कस्‍ति स्‍वयाः अप्‍वः चाकुसे च्‍वं, हाप्‍वलं पिहां वःगु कस्‍ति स्‍वयाः अप्‍वः चाकुसे च्‍वं। 
हे परमप्रभु! थुकिं जि छिकपिनि दासयात ज्ञां बी। थुकियात मानय्‌ यानाः जितः तःधंगु सिरपाः दत। 
वाःमचायेक जूगु पापयात सुनां खनी? हे परमप्रभु! थथे वाःमचायेक जूगु पापपाखें जितः क्षमा यानादिसँ! 
चायेक चायेकं जुइगु पापपाखें नं जि दासयात तापाक तयादिसँ। थुमित जितः त्‍याकेबियादी मते अले जि छुं दोष मदुम्‍ह जुइ। अले जि तःधंगु पापं मुक्त जुइ। 
हे परमप्रभु! जितः बचय्‌ यानादीम्‍ह, जितः शरण बीम्‍ह! जिगु म्‍हुतुं पिहां वइगु खँग्‍वः व जिगु नुगःया प्रार्थना छितः ययेमा!