भजन.
17.
दाऊदया भजन हे परमप्रभु! न्‍यायया निंतिं यानागु जिगु इनापयात न्‍यनादिसँ। जिगु प्रार्थनायात ध्‍यान बियादिसँ। जिं भिं नुगलं यानागु प्रार्थनायात न्‍यनादिसँ! 
जितः दोष मदुम्‍ह धकाः क्‍यनाबियादिसँ, छाय्‌धाःसा छिं जक खःगु खँ स्‍यू। 
छिं चान्‍हय्‌ जिगु बिचाःयात वालाः स्‍वयादीगु दु। अले जिगु नुगःयात दुवालादीगु दु। छिं जितः बांलाक जाँचय्‌ यानादीगु दु। अले जिगु छुं दोष मदु धकाः सीकादीगु दु। जिगु म्‍हुतुं मखुगु व मभिंगु खँ पिहां वइ मखु धकाः जितः विश्वास दु। 
जिं छिगु आज्ञा न्‍यनागु दु। थुकिं जितः स्‍याये पाले यानाजुइपिं मनूतपाखें तापाकाब्‍यूगु दु। 
जिगु पलाः छिगु लँय्‌ हे दु। अले गुबलें लिचिलागु मदु। 
हे परमेश्वर! जिं छितः प्रार्थना याये छाय्‌धाःसा छिं जितः लिसः बियादी। जिपाखे स्‍वयादिसँ अले जिगु प्रार्थना न्‍यनादिसँ। 
थःगु अजूचायापुगु माया क्‍यनादिसँ, अले जिमित बचय्‌ यानादिसँ। छिनापं च्‍वनेबलय्‌ जिमित जिमि शत्रुतय्‌सं छुं याये फइ मखु। 
मिखाया नानिचायात थें जिमित बचय्‌ यानाः तयादिसँ। छिगु पपूया किचलय्‌ जिमित सुचुकाः तयादिसँ। 
दुष्‍ट मनूतय्‌पाखें व जिगु प्‍यखें च्‍वंपिं ग्‍यानापुपिं शत्रुतय्‌पाखें जितः बचय्‌ यानादिसँ। 
इमिके दया धयागु भ्‍याः भचा हे मदु अले तःधंछुयाः खँ ल्‍हानाजुइ। 
इमिसं पलाः पतिकं जिमित घेरय्‌ याःगु दु। इमिसं जिमित बँय्‌ बस्‍वायेत सुलाः पियाच्‍वंगु दु। 
इपिं नयेपित्‍यानाः शिकार पियाच्‍वंपिं सिंह थें जूगु दु। छम्‍ह ल्‍याय्‌म्‍हम्‍ह सिंह थें इपिं शिकार यायेत सुलाच्‍वंगु दु। 
हे परमप्रभु! झासँ, जिमि शत्रुतय्‌गु विरोधय्‌ छुं यानादिसँ अले इमित बुकादिसँ। दुष्‍टतय्‌पाखें जितः छिगु तरवारं बचय्‌ यानादिसँ। 
जीवनय्‌ थःत यःगु फुक्‍क खँ काये फु धकाः जुइपिं मनूतपाखें जितः बचय्‌ यानादिसँ। इमिगु लागिं छिं मुंकातयादीगु दुःखं इमित सजाँय बियादिसँ। अज्‍याःगु सजाँय इमि सन्‍तान तकयात गाक्‍व दयेमा, अले इमि छय्‌-छुइपिनिगु लागिं नं छुं ल्‍यनेमा। 
जिं धाःसा छुं मभिंगु मयानागुलिं छिगु ख्‍वाः खनी। जि दनावयेबलय्‌ छितः स्‍वयेदयाः तसकं लय्‌ताये।