भजन.
15.
दाऊदया भजन हे परमप्रभु! छिगु पवित्र थासय्‌ सु दुहां वने फइ? छिगु पवित्र पर्वतय्‌ वयाः सुनां छितः तःधंके फइ? 
व मनुखं फइ, सुनां दोष मदय्‌क म्‍वानाच्‍वनी, अले न्‍ह्याबलें भिंगु जक याइ, अले सुनां दुनुगलंनिसें खःगु खँ ल्‍हाइ, 
सुनां मेपिन्‍त मभिंकाः जुइमखु, थः जःलाखःलायात नुगलय्‌ स्‍याकाः जुइमखु थः पासापिन्‍त मखुगु खँ ल्‍हानाजुइ मखु, 
सुनां मभिंपिं मनूतय्‌त इज्‍जत याइ मखु, परमप्रभुया ग्‍याःभय काइपिन्त धाःसा हनाबना तइ, थःत न्‍ह्याक्‍व हे थाकुसां थःगु बचं पूवंकी। 
सुनां ब्‍याज मकासे त्‍यासा बी। अले सुनां घुस कयाः दोष मदुपिं मनूतय्‌गु विरोधय्‌ बयान बी मखु। थज्‍याःपिं मनूत गुबलें नं लिचिले माली मखु।