भजन.
9.
दाऊदया भजन, लय तइम्‍हय्‌सिगु निंतिं – “मुथ लाब्‍बन” लय कथं हे परमप्रभु, जिं दुनुगलंनिसें छिगु प्रशंसा याये। जिं छिं यानादीगु अजूचायापुगु फुक्‍क ज्‍या कनाजुये। 
जि छिलिसे लय्‌तायाच्‍वने, हे दकसिबय्‌ तःधंम्‍ह परमप्रभु, जिं छिगु नामय्‌ भजन हाले। 
छिगु न्‍ह्यःने लायेवं जिमि शत्रुत लिफः स्‍वयाः बिस्‍युं वन, अले लुफिं हानाः नाश जुयावन। 
छिं थःगु सिंहासनं पक्षपात मजुइक न्‍याय यानाः जितः त्‍याकादीगु दु। 
जातितय्‌त छिं ख्‍याच्‍वः बियादीगु दु। अले मभिंपिन्‍त नाश यानादीगु दु। छिं इमिगु नां सदांया निंतिं हुयाछ्‌वयादीगु दु। 
जिमि शत्रुत सदांया निंतिं नाश जुइ धुंकल। छिं इमिगु शहर नं नाश यानादी धुंकल। आः इमिगु नां तक हे मल्‍यने धुंकल। 
परमप्रभुं सदांया लागि राज्‍य यानादी। वय्‌कलं न्‍याय यानादीत थःगु सिंहासन तयार यानादीगु दु। 
वय्‌कलं ख्‍वाः स्‍वयाः न्‍याय यानादी मखु। वय्‌कलं पक्षपात मजुइक मनूतय्‌त शासन यानादी। 
क्‍वत्‍यय्‌काच्‍वने माःपिनिगु निंतिं परमप्रभु शरण कायेगु थाय्‌ खः, दुःखकष्‍टया इलय्‌ नं शरण कायेगु थाय्‌। 
छिगु नां स्‍यूपिं सकसिनं छिगु हे भलसा काइ, छाय्‌धाःसा, हे परमप्रभु, छितः मालाजुइपिन्‍त छिं त्‍वःतादी मखु। 
सियोनय्‌ च्‍वनादीम्‍ह परमप्रभुयात भजन हालाः तःधंकि। वय्‌कलं यानादीगु ज्‍या फुक्‍क जातियापिन्‍त न्‍यंकि। 
परमेश्वरं दुःख सियाच्‍वंपिन्‍त लुमंकादी, छाय्‌धाःसा हिया ब्‍वला साइम्‍हय्‌सिनं इमिगु ख्‍वःसः ल्‍वःमंकादी मखु। वय्‌कलं इमित मभिंकूपिन्‍त सजाँय बियादी। 
हे परमप्रभु, जितः दया यानादिसँ। स्‍वयादिसँ, जिमि शत्रुतय्‌सं जितः गज्‍याःगु दुःख बियाच्‍वन। छिं जितः कालया म्‍हुतुं बचय्‌ यानादिसँ। 
अले जिं सियोनया ध्‍वाखाय्‌ च्‍वनाः छिगु प्रशंसाया खँ ल्‍हाये फइ। छिं जितः बचय्‌ यानादीगुलिं जि लय्‌तायाच्‍वने। 
जाति जातित थःम्‍हं म्‍हूगु गालय्‌ थः हे लानाच्‍वंगु दु। इपिं थःपिन्‍सं ग्‍वयातःगु जालय्‌ थः हे तक्‍यनाच्‍वंगु दु। 
परमप्रभुयात वय्‌कःया न्‍यायया हुनिं म्‍हसीकी। दुष्‍टत धाःसा थःगु हे जालय्‌ तक्‍यनाच्‍वनी। हिग्‍गायेन सेला 
दुष्‍टत फुक्‍कं पातालय्‌ कुतुं वनी, परमेश्वरयात ल्‍वःमंकूपिं फुक्‍क जातित नं। 
चीमिपिन्‍त धाःसा न्‍ह्याबलें ल्‍वःमंकी मखु, मगाःमचाःपिनिगु आशा न्‍ह्याबलें तनावनी मखु। 
हे परमप्रभु, झासँ। मनूत मत्‍यायेमा। जात जातिया न्‍याय छिगु न्‍ह्यःने जुइमा। 
हे परमप्रभु, इमित ख्‍यानादिसँ! जाति जातियापिन्‍त थःपिं सीमानिपिं खः धकाः सीकेबियादिसँ। सेला