भजन.
8.
दाऊदया भजन, लय तइम्‍हसिया निंतिं – गित्तिया कथं हे परमप्रभु, जिमि प्रभु। संसार न्‍यंक छिगु नां गुलि तःधं। छिगु महिमा आकाशय्‌ थ्‍यंगु दु। 
छिं थः विरोधीतय्‌गु कारणं यानाः शत्रुतय्‌गु म्‍हुतुप्‍वाः तिकेत मस्‍त व ह्याउँमस्‍तय्‌गु म्‍हुतुं थःत तःधंकादिल। 
गुबलय्‌ जिं छिगु ल्‍हाःया ज्‍या – आकाश, तिमिला व नगुतय्‌त स्‍वये, अले जिं बिचाः याये – 
मनू छु हे खः धकाः छिं वयात बिचाः यानाच्‍वनेत? मनू छु हे खः धकाः छिं वयात लुमंकाच्‍वनेत? 
छिं वयात स्‍वर्गया दूतत स्‍वयाः भचा जक क्‍वय्‌ तयादिल। नापं छिं वयात इज्‍जत व मान नं बियादिल। 
छिं वयात दय्‌कादीगु फुक्‍कयागु अधिकार नं बियादिल। 
सा-द्वहं, फै-च्‍वलय्‌ नापं फुक्‍क जंगली पशुत नं, 
आकाशय्‌ ब्‍वइपिं झंगःत व लखय्‌ जुइपिं न्‍यात, अज्‍ज ला समुद्रया फुक्‍क जन्‍तुत नं। 
हे परमप्रभु, जिमि प्रभु, छिगु नां संसार न्‍यंक गुलि तःधं।