भजन.
6.
दाऊदया भजन, लय तइम्‍हसिया निंतिं – तार बाजा नापं हालेगु हे परमप्रभु! जितः तमय्‌ ब्‍वःबियादी मते। थःगु तच्‍वःगु तमय्‌ जितः सजाँय बियादी मते। 
जि तसकं न्‍यले धुंकूगुलिं जितः दया यानादिसँ। जिगु क्‍वँय्‌ तसकं स्‍याये धुंकूगुलिं जितः लाय्‌कादिसँ। 
जिगु नुगः तसकं स्‍यानाच्‍वंगु दु। हे परमप्रभु, जिं गुबलय्‌ तक पियाच्‍वनेगु? 
हे परमप्रभु, जिपाखे फहिलादिसँ। अले जितः बचय्‌ यानादिसँ। छिगु तःधंगु दयां जितः बचय्‌ यानादिसँ। 
सीधुंकाः छिगु नां सुनां काइ? सीगालं छितः सुनां तःधंकी? 
झसुकाः ततं जि त्‍यानुइ धुंकल। चच्‍छिं ख्‍वयाः जिं थःगु लासा प्‍याकाच्‍वना। 
ख्‍वख्‍वं जिगु मिखा बुलुइ धुंकल। जि शत्रुतय्‌सं यानाः ख्‍व जक ख्‍वयाः जिगु मिखा मनावये धुंकल। 
अय्‌ दुष्‍टत! जिथाय्‌ च्‍वने मते। छाय्‌धाःसा परमप्रभुं जिगु ख्‍वःसः न्‍यनादी धुंकल। 
परमप्रभुं जिगु प्रार्थना न्‍यनादी धुंकल। परमप्रभुं जिगु प्रार्थनाया लिसः बियादी। 
जि शत्रुत फुक्‍कसिनं लज्‍या चायेमाली, अले ग्‍याइ। इपिं फुक्‍कं मछालाः बिस्‍युंवनी।