भजन.
5.
दाऊदया भजन, लय तइम्‍हसिया निंतिं – बाँसुरी नापं हालेगु भजन हे परमप्रभु! जिगु खँ न्‍हाय्‌पं बियाः न्‍यनादिसँ। जिगु झसुकाःयात बिचाः यानादिसँ। 
जिगु नुगःया खँ न्‍यनादिसँ, हे जिमि जुजु, जिमि परमेश्वर। छाय्‌धाःसा जिं छि हे छम्‍हसित जक प्रार्थना यानाच्‍वना। 
हे परमप्रभु, सुथय्‌ छिं जिगु सः न्‍यनादी। सुथय्‌ सुथय्‌ जिं छितः प्रार्थना याये, अले लिसः पियाच्‍वने। 
छि मभिंगु ज्‍याय्‌ लय्‌तायादीम्‍ह परमेश्वर मखु। दुष्‍टतय्‌गु मभिंगु ज्‍यायात छिं सह यानादी मखु 
घमण्‍ड याइपिं छिगु न्‍ह्यःने च्‍वनेफइ मखु। मभिंगु ज्‍या याइपिन्‍त छिं यय्‌कादी मखु। 
मखुगु खँ ल्‍हानाजुइपिन्‍त छिं नाश यानादी। मनू स्‍यानाजुइपिं व झंगःलानाजुइपिं परमप्रभुयात तसकं मयः। 
छिगु तःधंगु दयां यानाः जि धाःसा छिगु छेँय्‌ दुहां वये। जिं छिगु पवित्र देगलय्‌ पुलिं चुयाः छितः भागियाये। 
हे परमप्रभु! जितः भिंगु लँय्‌ यंकादिसँ। जिगु न्‍ह्यःने छिगु लँ तप्‍यंकादिसँ। मखुसा जि शत्रुतय्‌सं जितः त्‍याकी। 
इमिगु म्‍हुतुइ खःगु खँ धयागु हे मदु। इमिगु नुगलय्‌ स्‍यंकेगु खँ जक दु। इमिगु कथुप्‍वाः दिपया लुखा थें चाः इमिगु में च्‍वछायाः जक खँ ल्‍हानाजुइ। 
हे परमेश्वर! इमित दोषी ठहरय्‌ यानादिसँ। इमित इमिगु हे जालय्‌ तक्‍यंकादिसँ। इमिगु यक्‍व अपराधया कारणं इमित पित छ्‌वयादिसँ। छाय्‌धाःसा इपिं छिगु विरोधय्‌ जूगु दु। 
छिगु शरणय्‌ वःपिं धाःसा लय्‌तायाच्‍वनेमा। अले न्‍ह्याबलें लसतां म्‍ये हालाच्‍वनेमा। छिं हे इमिगु रक्षा यानादिसँ। अले छिगु नांयात माया याइपिं लसतां जायाच्‍वनेमा, 
छाय्‌धाःसा परमप्रभु, छिं धर्मीतय्‌त सुवाः बियादी। छिं थःगु मायां इमित प्‍यखें ढालं थें रक्षा यानादी।