प्रस्थान.
37.
बजलेलं खयःसिँयागु १.१ मि. हाकः, ३३ से.मि. ब्‍या व ३३ से.मि. तःजाःगु छगः सनू दय्‌कल। 
उकियागु दुने व पिने भिंगु लुं भुना बिल। अले उकिया प्‍यखेरं लुँया बाला दय्‌कल। 
उकिया निंतिं लुँयागु प्‍यचाः चाः दय्‌काः उकियात सनूया प्‍यंगू ख्‍वःलय्‌ तया बिल। छखे निचाः व मेखे निचाः तया बिल। 
अले खयःसिँयागु निपु न्‍वः दय्‌कल अले उकियात लुं हिना बिल। 
सनू कुबित न्‍वःत निखें दुगु चालय्‌ तया बिल। 
वं भिंगु लुँयागु १.१ मि. हाकः व ३३ से.मि. ब्‍या दुगु छगू कृपा-आसन दय्‌कल। 
मुगलं दायाः लुँया निम्‍ह करूब दय्‌कल। 
करूबतय्‌त कृपा-आसन नाप छधी हे लुं दय्‌काः निखें पाखे तयाबिल। 
उपिं करूबतय्‌सं थःथःगु पपु च्‍वय्‌पाखे चक्‍कंकाः कृपा-आसनयात त्‍वपुया तःगु दु। इमिगु ख्‍वाः चूलाकाः कृपा-आसनपाखे स्‍वय्‌कातया तःगु दु। 
वं खयःसिँयागु ८८ से.मि. हाकः ४४ से.मि. ब्‍या व ३३ से.मि. तःजाःगु छगू तेबिल दय्‌कल। 
उकियात भिंगु लुं भुनाः प्‍यखेरं लुँया बाला दय्‌कल। 
उकिया प्‍यखेरं प्‍यलांगु ब्‍याः दुगु बाला दय्‌कल। अले प्‍यखेरं लुँयागु मेगु बाला दय्‌कल। 
तेबिलया निंतिं लुँयागु प्‍यचाः चाः दय्‌कल। अले उपिं चाःतय्‌त प्‍यंगू तुति च्‍वय्‌ प्‍यखें कुन्‍चाय्‌ तया बिल। 
तेबिल ल्‍ह्वनिगु न्‍वःत कताकेत चाः बालाया लिक्‍कसं तया बिल। 
थ्‍व न्‍वःत खयःसिँयागु दय्‌कल, अले लुं भुना बिल। 
वं उकियागु पाःचागु थल, आम्‍खुरा व त्‍वँसा बलि प्‍वंकेगु करुवा व ख्‍वल्‍चा भिंगु लुँयागु दय्‌कल। 
बजलेलं भिंगु लुँयागु छगू त्‍वाःदेवा मुगलं दायाः दय्‌कल। उकियागु लिधंसा, चु, स्‍वांथें च्‍वंगु ख्‍वल्‍चा, चुलि व स्‍वांफ्‍वः फुक्‍कं व छगू हे लुँ कुचां दय्‌कल। 
बजलेलं भिंगु लुँयागु छगू त्‍वाःदेवा मुगलं दायाः दय्‌कल। उकियागु लिधंसा, चु, स्‍वांथें च्‍वंगु ख्‍वल्‍चा, चुलि व स्‍वांफ्‍वः फुक्‍कं व छगू हे लुँ कुचां दय्‌कल। 
छगू कचाय्‌ मर्स्‍या बरांयागु स्‍वांफ्‍वः थें च्‍वंगु स्‍वंगः ख्‍वल्‍चा व नापं मुखू वया च्‍वंगु स्‍वां व स्‍वांफ्‍वः दय्‌कल। अले मेगु पाखे थथे हे स्‍वपु कचात पिहां वल। थथे यानाः अन खुपु कचा दय्‌कल। 
त्‍वाःदेवालय्‌ मर्स्‍या बरांया स्‍वां थें च्‍वंगु प्‍यंगः ख्‍वल्‍चात, अले मुखू स्‍वां व स्‍वांफ्‍वःत नापं दुगु खः 
अले चुं पिहां वःगु स्‍वज्‍व कचातय्‌ चुया स्‍वांफ्‍वःया क्‍वय्‌ निपु निपु कचातय्‌ दथुइ छगः छगः ग्‍वः चुनापं दय्‌कल। 
त्‍वाःदेवा, उकियागु मुखू व कचात मुगलं दाया तःगु भिंगु लुँयागु छगू हे कुचायागु जुल। 
इमिसं भिंगु लुँयागु न्‍हय्‌पा पाल्‍चा, इताः कुलेगु चिम्‍ता व किस्‍ति दय्‌कल। 
इमिसं स्‍विन्‍यागू ती किलोग्राम भिंगु लुं त्‍वाःदेवा व उकियात माःमाःगु ज्‍वलं दय्‌कल। 
बजलेलं खयःसिँयागु गुंगू थनेगु वेदी दय्‌कल। व ४५ से.मि. ताहाकःगु, ४५ से.मि. ब्‍यागु अले ९० से.मि. तःजाःगु व प्‍यकुंलाःगु जुल। उकिया न्‍यकूत नं छस्‍वा यानाः दय्‌कल। 
उकिया च्‍वय्‌, प्‍यखेरं व न्‍यकूतय्‌त भिंगु लुं भुना बिल। अले उकिया प्‍यखेरं लुँयागु बाला दय्‌कल। 
वेदी क्‍वबियेगु न्‍वः तय्‌त बालाया क्‍वय्‌ निखें पाखें निचाः चाः दय्‌कल। 
न्‍वः खयःसिँयागु दय्‌काः लुं भुना बिल। 
बजलेलं अभिषेक यायेगु पवित्र चिकं व अत्तर दय्‌के सम्‍हय्‌सिनं थें नस्‍वाःगु भिंगु गुंगू दय्‌कल।