प्रस्थान.
36.
“बजलेल, ओहोलीआब व परमप्रभुं नापलायेगु पाल दय्‌केत सीप व खुबी बियादीपिं ज्‍या सःपिं मनूतय्‌सं परमप्रभुं उजं बियादीगुकथं ज्‍या यायेमाः।” 
अले मोशां बजलेल, ओहोलीआब व परमप्रभुं खुबी बियादीपिं व ज्‍या यायेत मनदुपिं फुक्‍कसित सःतल। 
नापलायेगु पाल दय्‌केत इस्राएलीतय्‌सं हःगु देछा फुक्‍कं इमिसं मोशाया ल्‍हातं काल। अय्‌नं मनूतय्‌सं हानं सुथपतिकं नं थः यछि देछा हया हे च्‍वन। 
अथे जुयाः ज्‍या याइपिं थःथःगु ज्‍या त्‍वःताः मोशायाथाय्‌ वल। 
अले इमिसं थथे धाल, “मनूतय्‌सं परमप्रभुं दय्‌केत उजं बियादीगु ज्‍याया निंतिं माःगु स्‍वयाः अप्‍वः ज्‍वलं हया च्‍वंगु दु।” 
अले मोशां छाउनी न्‍यंकं थथे धकाः च्‍वय्‌कल, “आवंलि सुं मिजं वा मिसां नापलायेगु पालया निंतिं देछायेत मेगु छु नं हये मते।” अथे जुयाः मनूतय्‌सं मेगु देछा हयेगु दिकल। 
फुक्‍क ज्‍या यायेत इमिके माःगु स्‍वयाः अप्‍वः सामान दये धुंकल। 
ज्‍या याये सःपिं मनूतय्‌सं भिंगु वँचुगु प्‍याजीगु व ह्‍याउँगु रंगयागु सुति कापःयागु झिपा कापःया इलां दय्‌कल। थुकी करूबया बांलाक बुत्ता भरय्‌ यानातःगु दु। 
फुक्‍क कापः १२ मिटर हाकः व २ मिटर ब्‍याः दुगु जुल। फुक्‍क कापः अपाय्‌कू हे दुगु जुल। 
न्‍याकू कापःयात सुयाः छपाः हे यात। अले मेगु न्‍याकू कापःयात नं अथे हे यात। 
न्‍हापां स्‍वाःगु कापःया सिथय्‌ वँचुगु कापःयागु स्‍वःतिपाँय्‌ दय्‌कल। अथे हे लिपाः स्‍वाःगु कापःया सिथय्‌ सिथय्‌ नं वँचुगु कापःयागु स्‍वःतिपाँय्‌ दय्‌कल। 
अले न्‍हापां स्‍वाःगु कापःया न्‍हापांगु कुचाय्‌ न्‍ययगू (५०) स्‍वःतिपाँय्‌ दय्‌कल। अथे हे लिपा स्‍वाःगु कापःया लिपांगु कुचाय्‌ नं न्‍येय्‌गू स्‍वःतिपाँय्‌ दय्‌कल। उपिं चुलिंचू लाःगु जुल। 
अनंलि लुँयागु अंकुसि दय्‌काः थ्‍व हे अंकुसि निपाः कापःयात छपाः यानाः स्‍वानाबिल। थुकथं निकू कापः छकू जुल। 
अनंलि थ्‍व हे कापःया च्‍वय्‌ त्‍वपुयेत च्‍वलय्‌चिगु सँयागु झिंछकू कापः दय्‌कल। 
फुक्‍क कापः अपाय्‌कू हे दुगु जुल। अले १३ मिटर हाकः व २ मिटर ब्‍याः जुइक दय्‌कल। 
न्‍याकू कापःयात स्‍वाना छकू यानाः मेगु खुकू कापःयात नं स्‍वाना छकू यात। 
अले न्‍हापां स्‍वाःगु कापःया लिपांगु कुचाय्‌ न्‍ययगू (५०) स्‍वःतिपाँय्‌ दय्‌कल। लिपा स्‍वाःगु कापः नं अथे यात। 
अनंलि कँय्‌यागु न्‍ययगू अंकुसि दय्‌काः निपाः कापःयात छपाः यानाः स्‍वानाबिल। 
पवित्र पाल त्‍वपुयेत हानं मेगु नितँ इलां तंछात। छगू ह्‍याउँगु रंग छिनातःगु फैया छेंगूयागु व मेगु डल्‍फिनयागु छेंगूयागु। 
इलां दिकेत खयःसिँमाया सिँपौ दय्‌कल। 
फुक्‍क सिँपौ ४ मिटर हाकः व ६६ से.मि. ब्‍याः दुगु जुल। 
फुक्‍क सिपौतय्‌ निगू निगू चूल तानाः स्‍वानातल। पवित्र पालया फुक्‍क सिँपौत थुकथं हे दय्‌कल। 
पवित्र पालया दच्‍छिन पाखे तयेत नीपौ सिँपौ दय्‌कल। 
नीपौ सिँपौया तःलय्‌ वहःयागु पीगू लिधंसा दय्‌कल। छपौ छपौ सिँपौया तःलय्‌ निगू निगू लिधंसा। 
पवित्र पालया उत्तरपाखे तयेत नीपौ सिँपौ दय्‌कल। 
अले नीपौ सिँपौया तःलय्‌ वहःयागु पीगू लिधंसा दय्‌कल। छपौ छपौ सिँपौया तःलय्‌ निगू निगू लिधंसा। 
पवित्र पालय्‌ ल्‍युने पच्‍छिमपाखे तयेत खुपौ सिँपौ दय्‌कल। 
अले ल्‍यूनेया निगू कुनय्‌ निपौ सिँपौ दय्‌कल। 
थुपिं निपतिं च्‍वंनिसें क्‍वथ्‍यंक देतनातःगु जुल। थुपिं कुन्‍चाय्‌ च्‍वंगु सिँपौतय्‌त च्‍वय्‌निसें क्‍वय्‌ तक हे स्‍वाकातःगु दु। निखें कुन्‍चाया लागि थुपिं सिँपौत थुकथं दय्‌कल। 
थुकथं अन च्‍यापौ सिँपौ दय्‌कल। अले थुकिया निंतिं छपौ सिँपौया तःलय्‌ निगू निगू यानाः झिंखुगू वहःयागु लिधंसा दय्‌कल। 
खयःसिँयागु झिंन्‍यागू खगः दय्‌काः न्‍यागू खगः छखे पाखे, 
अले मेखेपाखे न्‍यागू खगः व पच्‍छिमपाखे ल्‍युने न्‍यागू खगः दय्‌कल। 
सिँपौतय्‌ दथुइ तइगु खगः छगू कुनं मेगु कुनय्‌ तक थ्‍यंगु छगू हे खगः दय्‌कल। 
अले सिँपौयात लुं हिनाबिल। खगः दिकेगु चाःचात नं लुं हिनाबिल। खगःयात नं लुं हिनाबिल। 
अले वँचुगु, प्‍याजीगु व ह्‍याउँगु भिंगु सुति कापःयागु पर्दा दय्‌कल। कापतय्‌ भिंगु कां करूबया बुत्ता भरय्‌ याके बिल। 
वं उकिया निंतिं खयःसिँयागु प्‍यंगः थां दय्‌काः लुं हिना बिल। उकि काकिगु अंकुसि लुँयागु खः। वं इमिगु निंतिं वहःयागु प्‍यंगू लिधंसा दय्‌कल। 
पालया लुखाय्‌ तयेत वँचुगु, प्‍याजीगु व ह्‍याउँगु भिंगु सुति कापःयागु बुत्ता भरय्‌ यानातःगु पर्दा दय्‌कल। 
थ्‍व पर्दाया निंतिं खयःसिँयागु न्‍यागः थां दय्‌कल। उकियात लुं हिनाबिल। उकिया अंकुसि लुँयागु जुल। अले न्‍यागः थांयात कँय्‌यागु न्‍यागः लिधंसाय्‌ दिकल।