प्रस्थान.
31.
अले परमप्रभुं मोशायात धयादिल, 
“स्‍व, जिं यहूदा कुलयाम्‍ह हूरया छय्‌, ऊरीया काय्‌ बजलेलयात ल्‍ययागु दु। 
अले जिं वयात परमेश्वरयागु आत्‍मां, सीपं, खुबीं व फुक्‍क कथंयागु ज्‍या यायेगु ज्ञानं जाय्‌का बियागु दु। 
वं लुँ, वहः व कँय्‌यागु ज्‍या, 
ल्‍वहं तछ्यानाः फाकुनय्‌ थुनेगु ज्‍या, सिँयागु ज्‍या व फुक्‍क कथंयागु कारीगरीया ज्‍या याइ। 
“दान कुलयाम्‍ह अहीसामाकया काय्‌ ओहोलीआबयात जिं वयात ग्‍वाहालि बीत ल्‍ययागु दु। जिं छन्‍त उजं बियागु फुक्‍कं दय्‌केत ज्‍याकःमितय्‌त नं सीप बियागु दु- 
नापलायेगु पाल, बाचाया सनू, उकिया च्‍वय्‌यागु कृपा आसन व पालयागु 
तेबिल व उकिया ज्‍वलं, भिंगु लुँयागु त्‍वाःदेवा व उकिया ज्‍वलं व गुंगू थनेगु वेदी 
अले होमबलिया वेदी व उकिया फुक्‍कं थलबल, बाता व उकिया लिधंसा, 
थानातःगु वसः, हारुन पुजाहारीया पवित्र वसः व पुजाहारीया सेवा याइबलय्‌ वया काय्‌पिन्‍सं फीगु वसः, 
अभिषेक यायेगु चिकं व पवित्र थासय्‌ च्‍याकेत नस्‍वाःगु गुंगू - थ्‍व फुक्‍कं जिं छन्‍त बियागु उजंकथं हे इमिसं दय्‌केमाः।” 
अले परमप्रभुं मोशायात धयादिल, 
छं इस्राएलीतय्‌त थथे नं धा, “छिमिसं जिगु विश्राम दिं हनेगु या। लिपाया पुस्‍ता पुस्‍तातक थ्‍व जिगु व छिमिगु दथुइया चिं जुइ। जि छिमित पवित्र याइम्‍ह परमेश्वर खः धकाः छिमिसं सीका काइ।” 
“‘छिमिसं विश्राम दिं हनेगु यायेमाः। व छिमिगु निंतिं पवित्र खः। सुनानं थुकियात मानय्‌ याइ मखु वयात स्‍याना छ्वयेमाः। सुनानं थुखुन्‍हु ज्‍या याइ वयात थः मनूतय्‌ दथुं नाश यानाः छ्वयेमाः। 
खुन्‍हुतक ज्‍या याय्‌माः अय्‌नं न्‍हय्‌न्‍हुखुन्‍हु आराम कायेगु दिं खः। व परमप्रभुया निंतिं पवित्र खः। सुनानं विश्रामया दिंइ ज्‍या यात धाःसा वयात स्‍याना हे छ्वयेमाः। 
लिपा वइपिं पुस्‍तायात तकं सदांया नियम कथं थ्‍व दिंयात हनेगु या। 
थ्‍व जिगु व इस्राएलीतय्‌गु दथुइ सदांया चिं जुइ। छाय्‌धाःसा परमप्रभुं खुन्‍हु बिकाः आकाश व पृथ्‍वी दय्‌कादिल, न्‍हय्‌न्‍हु खुन्‍हु धाःसा वय्‌कलं विश्राम कयादिल।’” 
परमेश्वरं मोशा लिसें सीनै पर्वतय्‌ खँ ल्‍हाये धुंकाः वय्‌कलं वयात थःगु पतिंचां च्‍वयादीगु निपाः ल्‍वहंपौ बियादिल।