प्रस्थान.
30.
“छं गुंगू थनेत खयःसिँयागु छगू वेदी दय्‌कि। 
व ४५ से.मि. ताहाकःगु, ४५ से.मि. ब्‍यागु ९० से.मि. जाः दुगु व प्‍यकुंलाःगु जुइमाः। उकिया न्‍यकूत व वेदी छगू हे सिँ कुचाया जुइमाः। 
उकीया च्‍वय्‌, प्‍यखेरं व न्‍यकूतय्‌त भिंगु लुं भुना ब्‍यु। अले उकिया प्‍यखेरं लुँयागु बाला दय्‌कि। 
वेदी क्‍वबियेगु न्‍वः तयेत बालाया क्‍वय्‌ निखें पाखें निचाः चाः दय्‌कि। 
न्‍वः खयःसिँयागु दय्‌काः लुं भुना ब्‍यु। 
जिं छन्‍त नाप लायेगु थाय्‌ बाचाया सनूया द्यःने दुगु कृपा आसन खः। उकिया न्‍ह्‍यःने यख्‍खाया च्‍वंगु पर्दा पिने थ्‍व वेदी तया ब्‍यु। 
“हारुनं सुथय्‌ पतिकं पाल्‍चा मिलय्‌ याइबलय्‌ वेदीइ नस्‍वाःगु गुंगू थनेमाः। 
हारुनं सन्‍ध्‍याकाः इलय्‌ पाल्‍चा च्‍याकिबलय्‌ गुंगू नं थनेमाः। थ्‍व गुंगू छिमि पुस्‍तां पुस्‍तातक परमप्रभुया न्‍ह्‍यःने थनेगु यायेमाः। 
व वेदीइ छं मेगु कथंयागु गुंगू, होमबलि, अन्‍नबलि व त्‍वँसा बलि छाय्‌मते। 
हारुनं दँय्‌ छक्‍वः वेदीया न्‍यकुली प्रायश्‍चित यायेमाः। छिमि पुस्‍ता-पुस्‍तातक दँय्‌ छक्‍वः पाप बलिया हिं उकी प्रायश्‍चित यायेमाः। थ्‍व हे वेदी परमप्रभुयात तसकं पवित्र खः।” 
अनंलिपा परमप्रभुं मोशायात धयादिल, 
“छं इस्राएलीत ल्‍याःखाइबलय्‌ इमिके महामारी मवयेमा धकाः फुक्‍कसिनं थःथः ल्‍याःखाःगु इलय्‌ परमप्रभुयात छुत्‍काराया मू पुलेमाः। अले छं इमित ल्‍याःखाइबलय्‌ महामारी वइमखु। 
मिजंम्‍ह मनूत ल्‍याःखाइबलय्‌ इपिं छम्‍ह छम्‍हय्‌सिनं पवित्रस्‍थानया शेकेल कथं बच्‍छि शेकेल बीमाः। थ्‍व छगू शेकेल धयागु नीगू गेरा खः। थ्‍व बच्‍छि शेकेल परमप्रभुयात देछा खः। पवित्र थाय्‌यागु शेकेलकथं छगू शेकेल १२ ग्राम वहः खः। 
नीदँ व व स्‍वया थंपिं मनूत ल्‍याः खाइबलय्‌ थथे परमप्रभुयात देछा बीमाः। 
थःगु प्रायश्‍चितया लागिं परमप्रभुयात देछाः छाइबलय्‌ तःमितय्‌सं बच्‍छि शेकेल स्‍वयाः अप्‍वः अले चीमितय्‌सं म्‍हो बीमते। 
इस्राएलीतय्‌के प्रायश्‍चितया ध्‍यबा कयाः नापलायेगु पालया सेवाया निंतिं छ्यला ब्‍यु। अले व छिमिगु प्राणया प्रायश्‍चित यायेत परमप्रभुया न्‍ह्‍यःने इस्राएलतय्‌गु निंतिं लुमन्‍ति जुइमाः।” 
अले परमप्रभुं मोशायात धयादिल, 
“ल्‍हाः सिलेत कँय्‌यागु छगः बाता दय्‌कि। उकिया लिधंसा नं कँय्‌यागु हे जुइमाः। पवित्र पाल व होमबलिया वेदीया दथुइ तयाः उकी लः तया ब्‍यु। 
उकी हारुन व वया काय्‌पिन्‍सं थः थःगु ल्‍हाः तुति सिलेमाः। 
इपिं पालय्‌ दुहां वनिबलय्‌ वा वेदीया लिक्‍क मिं छाःगु बलि छ्वय्‌केत वनिबलय्‌ इमिसं थः थःगु ल्‍हाःतुति सिलेमाः। मखुसा इपिं सी। थ्‍व हारुन व वया लिपा वइपिं सन्‍तानयात तकं सदांया नियम जुल।” 
हाकनं परमप्रभुं मोशायात धयादिल, 
“छं भिंगु भिंगु नस्‍वाःगु मसला - खुगू किलोग्राम छ्वालुगु मूर्र, स्‍वंगू किलोग्राम दालचिनी, स्‍वंगू किलोग्राम नस्‍वाःगु सिँ व 
स्‍वंगू किलोग्राम तेजपात। (थुपिं पवित्र थाय्‌यागु लनेगुकथं जुइमाः।) अले प्‍यंगू लिटर जैतूनया चिकं कयाः 
अभिषेक यायेगु पवित्र चिकं दय्‌कि। अत्तर दय्‌के सःम्‍हेसिनं दय्‌कूगु थें दय्‌कि। व अभिषेक यायेगु पवित्र चिकं जुइ। 
अले व चिकनं नापलायेगु पाल, बाचाया सनू, 
छायेहःगु मरि तयातःगु तेबिल व उकी माःमाःगु ज्‍वलं, त्‍वाःदेवा व उकिया ज्‍याभः, गुंगू थनेगु वेदी, 
होमबलिया वेदी व उकीया थलबल, अले बाता व उकीया लिधंसा नापं फुक्‍कयात अभिषेक या। 
छं थुपिं फुक्‍कयात पवित्र या अले उपिं तच्‍वकं पवित्र जुइ। सुनानं थथे अभिषेक याना तःगु मालतालयात थी व पवित्र जुइ। 
“हारुन व वया काय्‌पिन्‍त अभिषेक यानाः पवित्र या। इमिसं पुजाहारी जुयाः जिगु सेवा यायेमाः। 
इस्राएलीतय्‌त थथे धा, ‘थ्‍व छिमि पुस्‍तां पुस्‍तातक जिगु निंतिं अभिषेकया पवित्र चिकं जुइमाः। 
थ्‍व चिकं मनूयागु म्‍हय्‌ प्‍वंके मते। थ्‍व पवित्र जूगुलिं ल्‍वाकछ्याना थज्‍याःगु मेगु छुं दय्‌के मते। छिमिसं थज्‍याःगु अभिषेकया चिकं पवित्र मानय्‌ या। 
सुं मनुखं थज्‍याःगु नस्‍वाःगु चिकं दय्‌कल धाःसा वा पुजाहारी मखुपिनिगु म्‍हय्‌ तया ब्‍यूसां वयात थः मनूतय्‌ दथुं पितिना छ्वयेमाः।’” 
हाकनं परमप्रभुं मोशायात धयादिल, “नस्‍वाःगु मसला- थाकुरा, हिं व मेगु छता गुंगू थनेगु मसला भिंगु गुंगू नापं उति उतिं कयाः 
उकियागु नस्‍वाःगु ल्‍वाकछ्याना तःगु गुंगूया अत्तर दय्‌के सःम्‍हेसिनं थें हे दय्‌कि। उकी चि नं तयेमाः। थ्‍व फुक्‍क भिंगु व पवित्र जुइमाः। 
उकियागु छुं ब्‍वःयात कयाः निनाः चुं दय्‌कि। जि छ नापं नापलायेगु थासय्‌ बाचाया सनूया न्‍ह्‍यःने थ्‍व चुं लुँयागु वेदीइ ती। थज्‍याःगु गुंगू छिमिसं पवित्र मानय्‌ या। 
थुकथं ल्‍वाकछ्याना तःगु गुंगू छिमिसं थःगु हे निंतिं गुबलें दय्‌के मते। थुकियात छं परमप्रभुया न्‍ह्‍यःने पवित्र भाः प्‍यु। 
सुनानं नस्‍वाःया लागि व थें च्‍वंक छुं दय्‌कल धाःसा वयात थः मनूतय्‌ दथुं पितिना छ्वयेमाः।”