प्रस्थान.
27.
“छं खयःसिँयागु २.२ मि. हाकः, २.२ मि. ब्‍या व १.३ मि. तजाःदुगु छगू प्‍यकुंलाःगु वेदी दय्‌कि। 
उकिया प्‍यकुनय्‌ छपु छपु न्‍यकू दय्‌कि। फुक्‍क न्‍यकू व वेदी छगू हे सिँ कुचायागु जुइमाः। वेदीयात कँय्‌नं भुनाब्‍यु। 
वेदीया नउ तयेगु थल, नउ तुइगु चतं, बाता, ला लिकायेगु नतू व मिथल दय्‌कि। थुपिं फुक्‍क कँय्‌यागु जुइमाः। 
उकिया निंतिं कँय्‌यागु छगू चालिंचा दय्‌कि, वेदी कुबीत प्‍यखें कँय्‌यागु हे प्‍यचाः चाः दय्‌कि। 
चालिंचायात वेदीया दुने प्‍यखेंया सिइ दिकाब्‍यु। थथे तयेबलय्‌ जालि वेदीया दथुइ तक थ्‍यनेमाः। 
वेदीया निंतिं खयःसिँयागु न्‍वःत दय्‌काः कँय्‌नं हिनाब्‍यु। 
वेदी कुबीत वेदीया निखेंया चालय्‌ न्‍वः दुछ्व। 
सिँपौयागु वेदी फुसुकुलु दय्‌कि। जिं छन्‍त गुँच्‍वकाय्‌ क्‍यनागु नमूनाकथं होम बलिया वेदी दय्‌कि। 
“पवित्र पालया चुक दय्‌केत प्‍यखेरं ख्‍वातुगु कापतं ग्‍व। उकिया दच्‍छिन ब्‍व ४४ मिटर हाकः दुगु जुइमाः। थुपिं ख्‍वातुगु कापः भिंगु सुति कां दय्‌कूगु जुइमाः। 
उकियागु निंतिं नीगू कँय्‌यागु लिधंसाय्‌ नीगः हे कँय्‌यागु थां दयेमाः। थांतय्‌गु अंकुसि व डण्‍डी धाःसा वहःयागु जुइमाः। 
अथे हे उत्तरया ब्‍वया निंतिं नं ४४ मिटर हाकःदुगु ख्‍वातूगु कापः दयेमाः। अले उकियागु थांत व लिधंसा नं कँय्‌यागु हे नीगः नीगः दयेमाः। अंकुसि व डण्‍डी धाःसा वहःयागु जुइमाः। 
चुकया पच्‍छिमपाखे २२ मिटर हाकःगु ख्‍वातुगु कापः व उकिया निंतिं झिगः थां व झिगू लिधंसा दय्‌माः। 
चुकया पुर्बपाखेया ब्‍या २२ मिटर जुइमाः। 
ध्‍वाखाया निखें ६.५ मि. ६.५ मि. हाकःगु ख्‍वातुगु कापः दयेमाः अले उकिया निंतिं स्‍वंगः स्‍वंगः थां व लिधंसा दयेमाः। 
“चुकया ध्‍वाखाया निंतिं वँचुगु, प्‍याजीगु, ह्‍याउँगु भिंगु सुति कापःतय्‌ बुत्ता भरय्‌ यानातःगु ९ मिटर हाकःगु पर्दा दय्‌कि। थुकियात प्‍यंगः थां व प्‍यंगू लिधंसा दयेमाः। 
चुकया प्‍यखें च्‍वंगु थांत वहःयागु डण्‍डीत नापं स्‍वानाच्‍वंगु, उकियागु अंकुसि वहःयागु व लिधंसा कँय्‌यागु जुइमाः। 
चुक ४४ मिटर हाकः व २२ मिटर ब्‍या दुगु जुइमाः। अले जाः २.२ मि. दयेमाः। ख्‍वातुगु कापः भिंगु सुति कायागु व लिधंसा कँय्‌यागु जुइमाः। 
“पालय्‌ छ्यलिगु फुक्‍क थलबल, पालया की व चुकया की कँय्‌यागु जुइमाः। 
“अले छं इस्राएलीतय्‌त न्‍हिं न्‍हिं त्‍वाःदेवा मदिक च्‍याकेत भिंगु जैतूनया चिकं हजि धकाः उजं ब्‍यु। 
पवित्र पालय्‌ बाचा चिनातःगु सनूया न्‍ह्यःने च्‍वंगु पर्दाया पिने हारुन व वया काय्‌पिन्‍सं सन्‍ध्‍याकाः ईनिसें सुथय्‌तक परमप्रभुया न्‍ह्‍यःने पाल्‍चा मदिक च्‍याकेमाः। थ्‍व उजं इस्राएली व वया सन्‍तानयात न्‍ह्याबलेंया निंतिं जुइमाः।”