प्रस्थान.
15.
अले मोशा व इस्राएलीतय्‌सं परमप्रभुया निंतिं थ्‍व म्‍ये हाल, जिं परमप्रभुया म्‍ये हाले छाय्‌धाःसा वय्‌कलं तःधंगु ज्‍या यानादीगु दु। अले सल व सल गयावःपिन्‍त वय्‌कलं समुद्रय्‌ वांछ्वयादीगु खः। 
परमप्रभु हे जिगु शक्ति खः। वय्‌कलं जितः बचय्‌ यानादी, वय्‌कः जिमि परमेश्वर खः, जिं वय्‌कःयात प्रशंसा याये। जिमि पुर्खाया परमेश्वर जिं वय्‌कःया नां च्‍वछाये। 
परमप्रभु झीगु निंतिं ल्‍वानादीम्‍ह खः, वय्‌कःया नां परमप्रभु खः। 
फारोया रथ व वया सेनायात वय्‌कलं समुद्रय्‌ वांछ्वयादीगु दु। फारोया ततःधंपिं कप्‍तानत लाल समुद्रय्‌ दुबित। 
तःजाःगु लखं इमित त्‍वपुल। इपिं ल्‍वहं थें तःजाःथाय्‌ दुन। 
हे परमप्रभु छिगु जव ल्‍हातय्‌ तःजिगु शक्ति दु। हे परमप्रभु छिगु जव ल्‍हातं शत्रुयात नाश याना बिल। 
छिगु बिरोधय्‌ दनिपिन्‍त थःगु तःधंगु शक्तिं छिं बुकादिल। छिं थःगु तं क्‍यनाः उकिं इमित छ्वख्‍वः थें भस्‍म यानादिल। 
छिगु न्‍हाय्‌प्‍वाःयागु सासलं लः तःजाः जुयाः दनाबिल। लबु दनाच्‍वंगु लः नं पखाः जुयाः दनाबिल। तःजाःथाय्‌ च्‍वंगु लः नं समुद्रया दुने धी चिनाबिल। 
“शत्रुं फुइँ क्‍यनाः धाल, ‘जिं इमित लिनाः ज्‍वने लाका हयागु फुक्‍कं जिं इने। इमिगु नाशं यानाः जिगु म्‍ह याउँसे च्‍वनी, जिं थःगु तरवार लिकाये, जिगु हे ल्‍हातं इमित नाश याये।’” 
अय्‌नं छि थःगु सासलं इमित पुइके छ्वयादिल अले समुद्रं इमित त्‍वपुल, लःयागु किसिद्वम्‍बलय्‌ म्‍हः थें इपिं दुनावन। 
हे परमप्रभु छि थें जाःम्‍ह सु द्यः दु धकाः? छि थें पवित्रम्‍ह सु दु धकाः? छि थें तःधंगु महीमा जाःम्‍ह सु दु धकाः? छिं थें सुनां अजूजायापुगु ज्‍या क्‍यनेफु? 
छिं थःगु जव ल्‍हाः न्‍ह्यज्‍याकादिल पृथ्‍वीं इमित नुनाछ्वल। 
छिं थःगु दया मायाय्‌ थःम्‍ह त्‍वःतकादीपिं मनूतय्‌त लँ क्‍यनादीगु दु। थःगु बलं छिं इमित थ: च्‍वनादीगु पवित्र थासय्‌ यंकादी। 
थ्‍व खँ न्‍यनाः जातित थुर थुर खात। पलिश्‍तीत देसय्‌ च्‍वंपिनिगु नुगः हीसे च्‍वन। 
एदोमयापिं नायःत तसकं ग्‍याइ, मोआबयापिं थकालित थुर थुर खाइ। कनानयापिं फुक्‍क मनूतय्‌ नुगलय्‌ ध्‍यांग्रा थाइ, 
ग्‍याःभय इमिथाय्‌ वइ। हे प्रभु, छिकपिनि मनूत, छिं त्‍वःतकादीपिं मनूत पुलाः मवंतले छिगु ल्‍हाःया बलं इपिं ल्‍वहं थें मसंसे च्‍वनी। 
छिं इमित हयाः थःम्‍हं ल्‍ययातःगु पर्वतय्‌ पिनादी, छिं थः हे च्‍वनेत दय्‌कादीगु थासय्‌ अले छिं थःगु हे ल्‍हातं दय्‌कादीगु पवित्र थासय्‌ इमित तयादी। 
“परमप्रभुं सदांया निंतिं राज्‍य यानादी।” 
फारोया सल, रथ व सल गयावःपिं मनूत समुद्रय्‌ थ्‍यंबलय्‌ परमप्रभुं समुद्रया लः लित हयाः इमित त्‍वपुयाबिल। इस्राएलीत जक समुद्रया दथुं गंगु बँ जुयाः वन। 
अले परमेश्वरया खँ कनिम्‍ह हारुनया तता मिरियमं दम्‍फु काल। फुक्‍क मिसात नं दम्‍फु ज्‍वनाः प्‍याखं हुहुं वया ल्‍यू ल्‍यू वल। 
मरियमं थथे धकाः म्‍ये हाल, “परमप्रभुयागु म्‍ये हा छाय्‌धाःसा वय्‌कलं तःधंगु ज्‍या यानादीगु दु, सल व सल गयावःपिन्‍त वय्‌कलं समुद्रय्‌ वांछ्वयादीगु दु।” 
अले मोशां इस्राएलीतय्‌त लाल समुद्रं शूर धयागु मरुभूमिइ पाखे यंकल। इपिं स्‍वन्‍हु तक मरुभूमिइ न्‍यासि वन नं लः छफुति हे लुइके मफुत। 
मारा धयागु थासय्‌ थ्‍यंकाः इमिसं अनयागु लः त्‍वने मफुत, छाय्‌धाःसा अनयागु लः खाइसे च्‍वं। अथे जुयाः हे व थाय्‌यात मारा धयातःगु खः। 
अय्‌जुयाः मनूतय्‌सं “जिमि छु त्‍वनेगु?” धकाः मोशायात कच्‌कच्‌ यात। 
अले मोशां परमप्रभुयात ग्‍वाहालिया निंतिं प्रार्थना यात। परमप्रभुं वयात सिँकुचा छकू क्‍यनादिल। वं उकियात लखय्‌ वांछ्वल, अले लः सात। परमप्रभुं अन हे इमित छगू नियम बियाः स्‍यनेकने यानादिल। वय्‌कलं अन इमिगु विश्वास गुलि बल्‍लाः धकाः नं स्‍वयादिल। 
वय्‌कलं धयादिल, “छिमिसं थःपिनि परमप्रभु परमेश्वरया खँ ध्‍यान बियाः बांलाक न्‍यन धाःसा अले वय्‌कःया मिखाय्‌ छु छु पाय्‌छि जू व यात धाःसा अले वय्‌कःया उजंयात न्‍हाय्‌पं बियाः न्‍यन धाःसा अले वय्‌कःया फुक्‍क नियमत बांलाक पालन यात धाःसा जिं मिश्रीतय्‌थाय्‌ छ्वयाहयागु छुं हे ल्‍वय्‌ छिमिथाय्‌ छ्‌वयाहये मखु। छाय्‌धाःसा जि हे छिमित लंकाबीम्‍ह परमप्रभु खः।” 
अनंलि इपिं झिंनिगू बुँगाःचा व न्‍हयेमा (७०) ताय्‌गःसिमा दुगु एलीमय्‌ थ्‍यंकः वल। इपिं अन हे लः दुथाय्‌ पाल ग्‍वयाः च्‍वन।