प्रस्थान.
9.
अले परमप्रभुं मोशायात धयादिल, “फारोयात वनाः धा, ‘परमप्रभु हिब्रूतय्‌ परमेश्वरं थथे धयादी - “जिमि मनूतय्‌त जिगु आराधना यायेत वने ब्‍यु।” 
छं इमित वने मब्‍युसे पनातल धाःसा 
परमप्रभुया ल्‍हातं छिमि पशु, सल, गधा, उँट, सा-द्वहं, फैच्‍वल फुक्‍कसित महामारी वइ। 
तर परमप्रभुं इस्राएलीतय्‌ पशु व मिश्रीतय्‌ पशुतय्‌त ब्‍यागल यानाबी। इस्राएलीतय्‌ पशुत छम्‍ह नं सी मखु।’” 
परमप्रभुं थुकिया ई क्‍वःछिनाः धयादिल, “कन्‍हय्‌ हे थ्‍व देसय्‌ परमप्रभुं थथे यानादी।” 
कन्‍हय्‌ खुन्‍हु हे परमप्रभुं थथे यानादिल। मिश्रीतय्‌ फुक्‍कं पशु सित, इस्राएलीतय्‌ पशु धाःसा छम्‍ह हे मसी। 
फारोनं अन छु जुल धकाः स्‍वयेत मनूत छ्वल। इमिसं इस्राएलीतय्‌ पशु छम्‍ह हे मसीगु खन। अय्‌नं फारोया नुगः छाना हे च्‍वन, वं मनूतय्‌त वने मब्‍यू। 
परमप्रभुं मोशा व हारूनयात धयादिल, “छिपिं निम्‍हय्‌सिनं अगलं छम्‍हू छम्‍हू हाकःचुं का, अले मोशां उकियात फारोया न्‍ह्‍यःने आकाशय्‌ पाखे ह्वलाब्‍यु। 
अले थ्‍व नचुगु धू जुयाः मिश्र देय्‌ न्‍यंक न्‍यनावनी। अले थुकिं मिश्रय्‌ च्‍वंपिं फुक्‍क मनू व पशुतय्‌गु म्‍हय्‌ कै पिचाय्‌की।” 
उकिं इपिं अगलय्‌ च्‍वंगु हाकःचुं कयाः फारोया न्‍ह्‍यःने वन। मोशां धूयात आकाश पाखे ह्वलाबिल। अले थुकिं मनूत व पशुतय्‌गु म्‍हय्‌ कै पिचाय्‌कल। 
कै पिचाःगुलिं जादु क्‍यनिपिं मोशाया न्‍ह्यःने दना च्‍वने मफुत छाय्‌धाःसा सकल मिश्रीतय्‌गु म्‍हय्‌ थें इमिगु म्‍हय्‌ नं कै पिचाःगु खः। 
परमप्रभुं फारोया नुगः अझ छाय्‌कादिल। अले परमप्रभुं मोशायात धयादी थें वं इमिगु खँ मन्‍यन। 
परमप्रभुं मोशायात धयादिल, “सुथय्‌ न्‍हापां दनाः फारोया न्‍ह्यःने हुँ अले वयात धा, ‘हिब्रूतय्‌ परमप्रभु परमेश्वरं थथे धयादी - जिगु आराधना यायेत जिमि मनूतय्‌त वने ब्‍यु। 
मखुसा थ्‍वपालय्‌ जिं छंथाय्‌, छिमि भारदारतय्‌थाय्‌ व छिमि प्रजायाथाय्‌ तसकं तःधंगु महामारी छ्वयाहये। अले छं थ्‍व पृथ्‍वी न्‍यंक जि थेंज्‍याःम्‍ह मेम्‍ह सुं हे मदु धकाः सी। 
जिं थःगु ल्‍हाः न्‍ह्यज्‍याकाः छन्‍त व छिमि प्रजायात महामारीं कय्‌कूगु जूसा छ पृथ्‍वीं हे नाश जुयावनेधुंकल जुइ। 
अय्‌नं जिगु शक्ति क्‍यनेत व पृथ्‍वीइ न्‍यंक जिगु नां कायेमा धकाः हे जिं छन्‍त म्‍वाकातयागु खः। 
छं आः तक नं तःधं छुयाः जिमि मनूतय्‌त वने ब्‍यूगु मखु। 
उकिं जिं कन्‍हय्‌ थ्‍व हे इलय्‌ तसकं बांमलाक प्‍वँ गाय्‌काबी। मिश्र देस दय्‌कूबलय्‌निसें आः तक नं थन थुकथं प्‍वँ गाःगु दइमखुनि। 
आः हे ख्‍यलय्‌ दुपिं पशुत, मनूत व ज्‍वलं फुक्‍क काय्‌के छ्व, मखुसा प्‍वँ दायाः पिने लाःपिं मनूत व पशुत फुक्‍कं सी।’” 
परमप्रभुया खँ न्‍यनाः ग्‍याःपिं फारोया गुलिं गुलिं भारदारतय्‌सं थःपिनि च्‍यःतय्‌त व पशुतय्‌त दुत यंकल। 
परमप्रभुयागु वचनयात वास्‍ता मयाःपिन्‍सं धाःसा थःपिनि च्‍यःतय्‌त व पशुतय्‌त ख्‍यलय्‌ हे त्‍वःतातल। 
परमप्रभुं मोशायात धयादिल, “थःगु ल्‍हाः आकाशपाखे ल्‍ह्वँ, अले मिश्र देय्‌ न्‍यंक प्‍वँ गाइ। मिश्रयापिं फुक्‍क मनू, पशु व बुँइ बुयावःगु फुक्‍क माय्‌ प्‍वँ गाइ।” 
अले मोशां थःगु कथि आकाशपाखे ल्‍ह्वन, परमेश्वरयागु शक्तिं आकाशय्‌ नँ न्‍यात, प्‍वँ गात, अले पृथ्‍वीइ मलः जुत। थुकथं परमप्रभुं मिश्र देसय्‌ प्‍वँवा गाय्‌कादिल। 
प्‍वँनापं मलः नं जुनाः च्‍वन। मिश्र देस पलिस्‍था जूसांनिसें थथे प्‍वँ गाःगु मदुनि। 
मिश्र देय्‌ न्‍यंक ख्‍यलय्‌ दुपिं मनूत व पशुत फुक्‍कं प्‍वँ दायाः सित। बुँयागु फुक्‍क बालि स्‍यन, सिमात क्‍वदल। 
इस्राएलीत च्‍वनाच्‍वंगु गोशेन धाःगु थासय्‌ जक प्‍वँ मगाः। 
अले फारोनं मोशा व हारूनयात सःताः धाल, “थ्‍व पालय्‌ जिं पाप यानागु दु, परमप्रभु धर्मीम्‍ह खः, जि व जिमि मनूत धाःसा अधर्मि खः। 
मलः जूगु व प्‍वँ गाःगु अप्‍वः जुइधुंकल। आः परमप्रभुयात इनाप या। जिं छिमित वने बी, छिमित पने मखु।” 
मोशां वयात धाल, “शहरं पिहां वनेवं जिं परमप्रभुपाखे थःगु ल्‍हाः ल्‍ह्वने। अले नँ न्‍यायेगु व प्‍वँ गायेगु दी। थुकिं पृथ्‍वी परमप्रभुयागु हे खः धकाः छिं सी। 
अय्‌नं जिं स्‍यू, छिं व छिकपिनि भारदारतय्‌सं अज्‍ज नं परमप्रभु परमेश्वरयागु ग्‍याःभय्‌ मकाःनि।” 
अजिल स्‍वां व तछ्व बालि भज्‍यंक स्‍यन। छाय्‌धाःसा तछ्व बालि बुइधुंकूगु व अजिल स्‍वां ह्वयेधुंकूगु खः। 
छ्‌वबालि धाःसा बुयाः मवःगुलिं छुं मजू। 
अले मोशा फारोयात त्‍वःताः शहरं पिने वन। वं थःगु ल्‍हाः परमप्रभु पाखे ल्‍ह्वन। अले नँ न्‍यायेगु, प्‍वँ गायेगु व वा वयेगु फुक्‍कं दित। 
फारोनं वा वयेगु, प्‍वँ गायेगु व नँ न्‍यायेगु द्युसेंलि हाकनं पाप यात। वं व वया भारदारतय्‌सं थःपिनिगु नुगः छाय्‌कल। 
उकिं फारोया नुगः झन छात, अले परमप्रभुं मोशायात धयादी थें वं इस्राएलीतय्‌त वने मबिल।