प्रस्थान.
6.
परमप्रभुं मोशायात धयादिल, “फारोयात जिं छु याइ आः छं स्‍वयेदइ। वं जिगु बल्‍लाःगु ल्‍हातं यानाः इमित वने बी। वं जिगु शक्तिं यानाः हे इमित थःगु देसं पितिना छ्वइ।” 
परमेश्वरं मोशायात धयादिल, “जि परमप्रभु खः।” 
अब्राहाम, इसहाक व याकूबयाथाय्‌ जि दक्‍वसिबय्‌ बल्‍लाःम्‍ह परमेश्वरया रुपय्‌ खनेदय्‌क वया, तर परमप्रभु धकाः जिं थःगु नामं इमित म्‍हसीके मबिया। 
इपिं कनान देसय्‌ परदेसी जुयाः च्‍वनाच्‍वंबलय्‌ जिं इपिं नाप व हे कनान देस इमित बी धकाः बाचा चिनागु दु। 
अज्‍ज ला, जिं मिश्रीतय्‌सं दास यानातःपिं इस्राएलीत ख्‍वःगु सः न्‍यनागु दु, अले जिं थःगु बाचा लुमंकागु दु। 
“उकिं इस्राएलीतय्‌त धा, ‘जि परमप्रभु खः। जिं छिमित मिश्रीतय्‌गु दासत्‍वं पित हये। जिं थःगु ल्‍हाः ल्‍ह्वनाः इमित तःधंगु सजाँय बियाः छिमित बचय्‌ याये। 
जिं छिमित थः मनू नालाकाये, अले जि छिमि परमेश्वर जुइ। अले मिश्रीतय्‌गु दासत्‍वं छिमित पितहःम्‍ह जि हे छिमि परमप्रभु परमेश्वर खः धकाः छिमिसं म्‍हसीकी। 
अले जिं छिमित अब्राहाम, इसहाक व याकूबयात बी धकाः बाचा यानागु देसय्‌ हये। जिं व देस छिमित अधिकार यायेत बी। जि परमप्रभु खः।’” 
मोशां इस्राएलीतय्‌त अथे हे धकाः न्‍यंकल। अय्‌नं तसकं क्‍वत्‍यय्‌काः च्‍वनेमाःगुलिं व नुगः क्‍वतुनाच्‍वंगुलिं इमिसं वयागु खँ मन्‍यन। 
अले परमप्रभुं मोशायात धयादिल, 
“छ वनाः मिश्रया जुजु फारोयात धा, ‘इस्राएलीतय्‌त थ्‍व देसं पिहां वने ब्‍यु।’” 
अय्‌नं मोशां परमप्रभुयात धाल, “इस्राएलीतय्‌सं हे जिगु खँ मन्‍यन धाःसा, जि खँ ल्‍हाये मसःम्‍हय्‌सिगु खँ फारोनं गथे यानाः न्‍यनी?” 
मोशा व हारूनयात परमप्रभुं थथे आज्ञा बियादिल, “जिं छिमित इस्राएलीतय्‌त मिश्रं पितः यंकेगु आज्ञा ब्‍यूगु दु धकाः इस्राएलीत व मिश्रयाम्‍ह जुजु फारोयात धा।” 
इस्राएलीतय्‌ पुर्खा थुपिं हे खः- इस्राएलया दकले न्‍हापां बूम्‍ह काय्‌ रुबेनया काय्‌पिं हनोक, पल्‍लु, हेस्रोन व कर्मी खः। थुपिं रुबेनया सन्‍तान खः। 
शिमियोनया काय्‌पिं यमूएल, यामीन, ओहद, याकीन व सोहोर खः। अले कनानी मिसा पाखेंयाम्‍ह काय्‌ शौल खः। थुपिं शिमोनया सन्‍तान खः। 
लेवीया काय्‌पिं गेर्शोन, कहात व मरारी खः। लेवी सछि व स्‍विन्‍हय्‌दँ तक म्‍वात। 
गेर्शोनया काय्‌पिं लिब्‍नी व शिमी खः। 
कहातया काय्‌पिं अम्राम, यिसहार, हेब्रोन व उज्‍जीएल खः। कहात सछि व स्‍विस्‍वदँ तक म्‍वात। 
मरारीया काय्‌पिं महली व मूशी खः। लेवीया कुल थुपिं हे खः। 
अम्रामं थः निनि योकेबेदनापं ब्‍याहा यात, वं हारुन व मोशायात बुइकल। अम्राम सछि व स्‍विन्‍हय्‌दँ तक म्‍वात। 
यिसहारया काय्‌पिं कोरह, नेपेग व जिक्री खः। 
उज्‍जीएलया काय्‌पिं मीशाएल, एलसापान व सिथ्री खः। 
हारुनं अम्‍मीनादाबया म्‍ह्याय्‌, नहशोनया केहेंँ एलीशेबानापं ब्‍याहा यात। वं वया पाखें नादाब, अबीहू, एलाजार व ईतामारयात बुइकल। 
कोरहया काय्‌पिं अस्‍सीर, एल्‍काना व अबिआसाप खः। कोरहया कुल थुपिं हे खः। 
हारुनया काय्‌ एलाजारं पतीएलया छम्‍ह म्‍ह्याय्‌नापं ब्‍याहा यात, अले वं वया पाखें पीनहासयात बुइकल। लेवीतय्‌गु पुर्खाया कुलयापिं मू मनूत थुपिं हे खः। 
परमप्रभुं इस्राएलीतय्‌त पुचः पुचः यानाः मिश्रं पित हजि धकाः उजं बियादीपिं हारुन व मोशा थुपिं हे खः। 
मोशा व हारुन इस्राएलीतय्‌त मिश्रं पित यंकेत मिश्रयाम्‍ह जुजु फारोलिसे खँ ल्‍हाःगु खः। 
परमप्रभुं मिश्रय्‌ मोशानापं खँ ल्‍हानादीबलय्‌ 
वय्‌कलं वयात थथे धयादिल, “जि परमप्रभु खः। जिं छन्‍त छु छु धाय्‌ व फुक्‍क मिश्रया जुजु फारोयात धा।” 
मोशां परमप्रभुयात लिसः बिल, “स्‍वयादिसँ, जि बांलाक न्‍ववाये सःम्‍ह मखु। अथे जुयाः फारोनं जिगु खँ गथे यानाः न्‍यनी?”