प्रस्थान.
2.
थ्‍व हे इलय्‌ लेवी कुलयाम्‍ह छम्‍ह मिजंनं थःगु हे कुलयाम्‍ह छम्‍ह मिसानापं ब्‍याहा यात। 
अले व मिसाया प्‍वाथय्‌ दत, वं छम्‍ह काय्‌ बुइकल। मचा तसकं बांलाःगु खनाः वयात स्‍वलातक सुचुकातल। 
अय्‌नं वं स्‍वला स्‍वयाः अप्‍वः सुचुकातये मफुत। अले वं मचायात तयेत तिंकथियागु छगः पिचा दय्‌कल। उकी अलकत्रां इलाः लः दुहां मवनिगु याना बिल। मचायात उकिं तयाः नील खुसियागु सिथय्‌ ताहाकःगु घाँय्‌या दथुइ त्‍वःता बिल। 
अले मचायात छुं जुइ ला धकाः स्‍वयेत वया तता तापाक्‍क दनाच्‍वन। 
थ्‍व हे इलय्‌ फारोया म्‍ह्याय्‌ नील खुसिइ म्‍वः ल्‍हुयेत वल। वया दासीत खुसि सिथय्‌ चाःह्‍यूवंबलय्‌ वं घाँय्‌ दथुइ च्‍वंगु पिचा खनाः थः दासीयात व काय्‌के छ्वल। 
वं पिचा चाय्‌काः स्‍वःबलय्‌ ख्‍वयाच्‍वंम्‍ह मचायात खनाः वयात माया वन, अले वं धाल, “थ्‍व सुं हिब्रूतय्‌ मचा खः।” 
उबले व मचाया ततां फारोया म्‍ह्याय्‌यात न्‍यन, “जिं वनाः सुं छम्‍ह हिब्रू मिसायात छिगु निंतिं मचायात दुरु त्‍वंकेत ब्‍वना हये ला?” 
फारोया म्‍ह्याय्‌नं वयात धाल, “ज्‍यू, हुँ।” अले व मिसामचां वनाः थः हे मांयात सःताः हल। 
फारोया म्‍ह्याय्‌नं व मिसायात धाल, “जिगु निंतिं थ्‍व मचायात यंकाः दुरु त्‍वंकेगु या, अले जिं छन्‍त ज्‍याला बी।” व मिसां मचायात यंकाः दुरु त्‍वंकेगु यात। 
मचा तःधिकः जुइ धुंकाः वं वयात फारोया म्‍ह्याय्‌याथाय्‌ हल। फारोया म्‍ह्याय्‌नं मचायात थः काय्‌ नालाः काल। अले वं “जिं थ्‍वयात लखं लिकयागु खः” धकाः वयागु नां मोशा तल। 
मोशा ल्‍याय्‌म्‍ह जुइ धुंकाः पिने थः इस्राएली दाजुकिजापिन्‍थाय्‌ वन अन वं इमिसं थाकुगु ज्‍या यानाच्‍वंगु खन। अले छम्‍ह मिश्रीं छम्‍ह हिब्रूयात तसकं दायाच्‍वंगु खन। 
मोशां उखेंथुखें स्‍वल। सुं नं मदुगुलिं वं व मिश्रीयात स्‍यानाः वयागु सीम्‍ह फिइ सुचुकाबिल। 
कन्‍हय्‌ खुन्‍हु हानं व अन वंबलय्‌ निम्‍ह हिब्रूत थःथवय्‌ हे ल्‍वानाच्‍वंगु खन। अले वं द्वंकूम्‍ह हिब्रूयात थथे धाल, “छं थः हे हिब्रूयात छाय्‌ दायागु?” 
व मनुखं धाल, “छन्‍त सुनां जिमि शासक व न्‍यायाधीश दय्‌कल? छु छं जितः नं व मिश्रीयात स्‍याः थें स्‍याये त्‍यनागु ला?” थ्‍व न्‍यनाः मोशा ग्‍यात। वं बिचाः यात, “जिं यानागु खँ मनूतय्‌सं सीधुंकल।” 
थ्‍व खँ सियाः फारोनं मोशायात स्‍यायेगु बिचाः यात। मोशा धाःसा अनं मिद्यान देसय्‌ बिस्‍युं वनाः छगः तुंया न्‍ह्‍यःने च्‍वन। 
मिद्यानया पुजाहारीया न्‍हय्‌म्‍ह (७) म्‍ह्याय्‌पिं व हे तुंथिइ लः काःवल। इमिसं तुंथिइ च्‍वंगु लः सालाः थः बौया पशुतय्‌सं लः त्‍वनिगु थलय्‌ तयाच्‍वन। 
उबले हे फैजवाःत वयाः इमित ख्‍यानाछ्वयेत्‍यन। मोशा वयाः इमित ग्‍वाहालि यानाः इमि फैच्‍वलय्‌तय्‌त लः त्‍वंके बिल। 
इपिं थः बौ रूएलयाथाय्‌ लिहां वःबलय्‌ इमि बौनं इमित न्‍यन, “थौं छिपिं छाय्‌ याकनं लिहां वयागु?” 
अले इमिसं धाल, “छम्‍ह मिश्रीं जिमित फैजवाःतय्‌गु ल्‍हातं बचय्‌ यात। अले लः सालाः फैच्‍वलय्‌तय्‌त त्‍वंकल।” 
अले वं थः म्‍ह्याय्‌पिन्‍त धाल, “व मनू गन दु? वयात छिमिसं छाय्‌ त्‍वःतावयागु? वनाः झीनापं नयेत वयात ब्‍वना हजि।” 
मोशा व मनूनापं च्‍वनेत मानय्‌ जुल। वं थः म्‍ह्याय्‌ सिप्‍पोरायात मोशानापं ब्‍याहा याना बिल। 
सिप्‍पोरां काय्‌ छम्‍ह बुइकल। मोशां “जि मेगु देसय्‌ परदेसी जुया च्‍वनागु दु” धकाः वयागु नां गेर्शोम तल। 
यक्‍व ई लिपा मिश्रयाम्‍ह जुजु सित। दास जुयाः च्‍वनेमाःगुलिं इस्राएलीतय्‌सं झसुकाः तयाः ग्‍वाहालि फ्‍वन। इमिगु सः परमेश्वरयाथाय्‌ थ्‍यन। 
थथे इपिं पिच्‍यानाः हाःगु सः न्‍यनाः परमेश्वरं अब्राहाम, इसहाक व याकूबनापं थःम्‍हं यानागु बाचायात लुमंकादिल। 
अथे जुयाः परमेश्वरं इस्राएलीतय्‌त स्‍वयादिल अले इमिगु च्‍यूताः कयादिल।