प्रस्थान.
1.
थःथःगु परिवार ज्‍वनाः याकूब नापं मिश्र देसय्‌ वंपिं इस्राएलया काय्‌पिनिगु नां थथे दु। 
रूबेन, शिमियोन, लेवी, यहूदा, 
इस्‍साखार, जबूलून, बेन्‍यामीन, 
दान, नप्‍ताली, गाद व आशेर खः। 
याकूबया दक्‍वंयानाः न्‍हयेम्‍ह (७०) सन्‍तान दु। वया छम्‍ह काय्‌ योसेफ न्‍हापां निसें हे मिश्रय्‌ दु। 
योसेफ, वया दाजुकिजापिं व वया पुस्‍तायापिं फुक्‍क मनूत सिना वन। 
इस्राएलया सन्‍तान धाःसा ब्‍वलनाः ल्‍याखय्‌ अप्‍वः दयावन। गुकिं यानाः मिश्र फुक्‍क देस इमिसं जाल। 
अनंलि मिश्रय्‌ योसेफयात म्‍हमस्‍यूम्‍ह छम्‍ह न्‍हूम्‍ह जुजु गद्दीइ च्‍वन। 
वं थः मनूतय्‌त धाल, “स्‍व, इस्राएलीत झीपिं स्‍वयाः यक्‍व अप्‍वः दये धुंकल। इपिं बल्‍लाना वयाच्‍वंगु दु। 
अथे जुयाः झीसं इपिंलिसे बुद्धिं ज्‍या कायेमाः। मखुसा इपिं ल्‍याखय्‌ अप्‍वः जुया वनी। लडाइँ जुइबलय्‌ नं इपिं झी शत्रुतलिसे मिलय्‌ जुयाः झीपिंलिसे ल्‍वाः वइ, अले देस त्‍वःताः वनी।” 
अथे जुयाः मिश्रीतय्‌सं इमित थाकुगु ज्‍या बियाः सास्‍ति यायेत इमिथाय्‌ ज्‍यामि नायःत छ्वल। इमिसं फारोया निंतिं धुकू दय्‌केत पिताम व रामसेस धाःगु निगू शहर दय्‌कल। 
अय्‌नं इमिसं गुलिगुलि इस्राएलीतय्‌त दुःख कष्‍ट बिल उलिउलि हे इमिगु ल्‍याः अप्‍वयावन। इपिं यक्‍व थासय्‌ न्‍यना नं वन। अथे जुयाः इपिं इस्राएलीत खनाः तसकं ग्‍यात। 
अले इमिसं इस्राएलीतय्‌त दया माया मयासे थाकुगु थाकुगु ज्‍या याकल। 
चा न्‍हायेगु, अप्‍पा छियेगु, थाकुगु थाकुगु बुँज्‍या याकाः इमिगु जीवनयात दुःखं जाय्‌काबिल। 
मिश्रया फारोनं शिप्रा व पूआ नांयापिं हिब्रू दिरिअजिपिन्‍त सःताः धाल, 
“हिब्रू मिसातय्‌ मचा बुइबलय्‌ छिमिसं सुसाःकुसाः याःवनेबलय्‌ काय्‌ बूसां स्‍यानाछ्व, म्‍ह्याय्‌ बूसां स्‍यायेमते।” 
दिरिअजिपिं परमेश्वरया ग्‍याःभय काइपिं जूगुलिं मिश्रया फारोनं उजं ब्‍यूथें मयासे इमिसं काय्‌ बूसां मस्‍यासे हे त्‍वःता बीगु। 
अथे जुयाः मिश्रया फारोनं इमित सःताः न्‍यन, “छिमिसं थथे छाय्‌ यानागु? छिमिसं काय्‌ मस्‍तय्‌त छाय्‌ मस्‍यानागु?” 
दिरिअजिपिन्‍सं फारोयात धाल, “हिब्रू मिसात मिश्री मिसात थें मखु। इपिं तसकं बल्‍लाः, दिरिअजित थ्‍यने न्‍ह्‍यः हे इमिसं मचा बुइके धुंकिगु।” 
अले परमेश्वरं दिरिअजिपिन्‍त भिं यानादिल। इस्राएलीत ल्‍याखय्‌ झन अप्‍वः दयावन। 
दिरिअजिपिन्‍सं परमेश्वरयागु ग्‍याःभय काःगुलिं वय्‌कलं इमित नं सन्‍तान बियादिल। 
अले फारोनं थः फुक्‍क प्रजायात थथे धकाः उजं बिल, “हिब्रूतय्‌ ग्‍वःम्‍ह काय्‌मस्‍त बुइ इपिं फुक्‍कसित नील खुसिइ यंकाः वांछ्व। म्‍ह्याय्‌ मस्‍तय्‌त जक ल्‍यंका ति।”