उत्‍पति.
49.
याकूबं थः काय्‌पिं फुक्‍कसित सःताः धाल-- “छिपिं फुक्‍क थन वा, छिमित लिपा छु छु जुइतिनि धकाः जिं छिमित धाये। 
सकसिनं न्‍यँ, याकूबया काय्‌पिं छिमि बाः इस्राएलं धाःगु खँ न्‍यँ। 
रूबेन, छ जिम्‍ह न्‍हापांम्‍ह काय्‌ खः, छ जिगु बल खः, जिगु ल्‍याय्‌म्‍हसूया न्‍हापांम्‍ह काय्‌ खः, जिगु दक्‍वसिबय्‌ तःधंगु गौरब खः। 
छ थातं मच्‍वंगु लः थें खः, छ न्‍हापांम्‍ह जुयाच्‍वनि मखु, छाय्‌धाःसा छ थः बौया लासाय्‌ द्यन, अले जिगु लासायात क्‍वह्यंकल। 
शिमियोन व लेवी निम्‍ह दाजुकिजां छगू हे कथंयापिं खः, थुमिगु तरवार ल्‍वापुख्‍यापुया ज्‍याभः खः। 
जिं गुबलें नं इमिगु ज्‍या व बिचालय्‌ ब्‍वति मकया छाय्‌धाःसा इमिसं तमय्‌ मनूत स्‍याःगु दु । अले थः यत्‍थे द्वहंतय्‌त पाःगु दु। 
इमिगु तंयात सराः लायेमा छाय्‌धाःसा व तसकं ग्‍यानापु। इमिगु तंयात सराः लायेमा छाय्‌धाःसा व तसकं छाः। जिं इमित ब्‍वथलाबी जिं इमित इस्राएलय्‌ छ्यालब्‍याल यानाबी। 
यहूदा, छन्‍त छिमि दाजुकिजापिन्‍सं तःधंकी, छं थः शत्रुतय्‌त बुकाछ्वःगु दु छिमि बौया काय्‌पिन्‍सं छन्‍त भागि याइ। 
यहूदा सिंहया मचा खः, व शिकारय्‌ हे ब्‍वलन, सिंह थें व घ्‍वंस्‍यानाः ग्‍वारातुली। सुनां वयात थनेगु आँट याइ? 
यहूदाया ल्‍हातिइ न्‍ह्याबलें राजदण्‍ड दइ, वया सन्‍तानं न्‍ह्याबलें शासन याइ। जातिजातितय्‌सं वयात उपहार हइ अले इमिसं वयाः वयात भागि याइ। 
वं थः गधायात भिंगु अंगूरमाय्‌ ची अले गधाया मचायात भिंगु कचाय्‌ ची। वं थःगु वसः दाखमद्यय्‌ ही अले भान्‍तां लंयात अंगूरया रसय्‌ ही। 
वयागु मिखा दाखरस स्‍वयाः प्‍वालाप्‍वाला थी वयागु वा दुरु स्‍वयाः तुयुसे च्‍वनी। 
जबूलून समुद्रया सिथय्‌ च्‍वंवनी व जहाज दिकेत ल्‍वःगु थाय्‌ जुइ वयागु लागा सीदोन तक न्‍यनी। 
इस्‍साखार बल्‍लाःम्‍ह गधा खः, व निगू कुया दथुइ ग्‍वतुलाच्‍वनी। 
झासु लनेत बांलाःगु थाय्‌ लुयेवं, अले झः झः धाःगु देश खनेवं, वं कु कुबीत थःगु ब्‍वह क्‍वछुकी अले थः यस्‍सें व दास जुइ। 
दानं इस्राएलया मेमेगु कुलं थें थः मनूतय्‌त शासन याइ। 
दान लँसिथय्‌ च्‍वंम्‍ह सर्प खः, व लँय्‌ च्‍वंम्‍ह विष दुम्‍ह सर्प खः। वं सलया ग्‍वालिइ न्‍याइ, अले सलया म्‍हय्‌ च्‍वंम्‍ह कुतुंवनी। 
परमप्रभु! जि छिं उद्धार याइगु पियाच्‍वनागु दु। 
गादयात छथ्‍वःसिनं हय्‌क्‍काःवइ तर अःखतं वं इमित हय्‌क्‍कयाः लिनाछ्वइ। 
आशेरया यक्‍व अन्न सइ, वं जुजुयात माःगु भिंगु अन्न बी। 
नप्ताली जंगलय्‌ च्‍वंम्‍ह चल्‍ला खः वं बाबांलाःपिं मस्‍त बुइकी। 
योसेफ बुंगाःचा नापं च्‍वंम्‍ह गधाया मचा थें खः, गुँच्‍वय्‌ च्‍वंम्‍ह गधाया मचा थें। 
शत्रुतय्‌सं वयात वाणं कय्‌कःवइ इमिसं वयात थःपिनिगु धनुष वाण ज्‍वनाः लित्तुली। 
तर याकूबया दक्‍वसिबय्‌ बल्‍लाःम्‍ह परमेश्‍वरया ग्‍वाहालिं, फैजवाः व इस्राएलया ल्‍वहंधीया ग्‍वाहालिं वयागु धनुष वाण तप्‍यना हे च्‍वनी, अले वयागु लप्‍पा नं बल्‍लाना च्‍वनी। 
छन्‍त थ्‍व ग्‍वाहालि छिमि बाःया दक्‍वसिबय्‌ बल्‍लाःम्‍ह परमेश्‍वरपाखें वइ। परमेश्‍वरं छन्‍त स्‍वर्गं वा वय्‌काः पृथ्‍वीया तःलं लःधाः पिकयाः अले यक्‍व सन्‍तान बियाः आशिष बियादी। 
छिमि बाःयागु आशिष पहाड स्‍वयाः तःधं, यक्‍व यक्‍व पहाड स्‍वयाः तःधं। थ्‍व फुक्‍क आशिष छंगु छेनय्‌ लायेमा छाय्‌धाःसा छ छिमि फुक्‍क दाजुकिजापिनि नायः खः। 
बेन्‍यामीन ग्‍यानापुम्‍ह फ्‍याकाध्‍वं खः। सुथय्‌ वं शिकार यानाहःगु नइ, अले बहनी लुटे यानाहःगु इनी।” 
थुपिं इस्राएलया झिंनिगू कुल खः। इमि बौनं इमित ल्‍वयेक ब्‍यूगु आशिष थ्‍व हे खः। 
अले याकूबं इमित उजं बिल-- “जि आः याकनं हे सिनाः जिमि तापाबाज्‍यापिंनाप च्‍वं वने। जितः जिमि बौबाज्‍यापिंलिसें हित्ती एप्रोनया बुँइ च्‍वंगु गुफाय्‌ थुनाब्‍यु। 
थ्‍व गुफा कनान देशय्‌ च्‍वंगु मम्रे लिक्‍क च्‍वंगु मक्‍पेलाया बुँइ च्‍वंगु गुफा खः। अब्राहामं थ्‍व गुफा सी थुनेत धकाः बुँ नापं हित्ती एप्रोनया ल्‍हातिं न्‍यानाकाःगु खः। 
अन हे अब्राहाम व वया कलाः सारायात थुंगु खः। अन हे इसहाक व वया कलाः रिबेकायात नं थुंगु खः। अले अन हे जिं लेआयात नं थुनागु खः। 
व बुँ व अन च्‍वंगु गुफा हित्तीतय्‌पाखें न्‍यानाकयातःगु खः।” 
थः काय्‌पिन्‍त थुकथं उजं बीधुंकाः याकूब लासाय्‌ ग्वारातुल अले सित।