उत्‍पति.
45.
योसेफं थःगु मन चीमफुसेंलि वं ज्‍या याइपिं फुक्‍कसित अनं पितिनाछ्वत। थः दाजुपिं जक ल्‍यं दसेंलि वं थः सु खः धकाः थः दाजुपिन्‍त कन। 
अले व ह्वाँय्‌ह्वाँय्‌ ख्‍वल। व ख्‍वःगु अन च्‍वंपिं मिश्रीतय्‌सं नं ताल, अले थ्‍व खँ फारोया छेँय्‌ नं सिल। 
योसेफं थः दाजुपिन्‍त धाल-- “जि योसेफ खः, जिमि बाः आः तकं म्‍वानाच्‍वंगु दनि ला?” वया दाजुपिन्‍सं धाःसा ग्‍यानाः छुं हे लिसः बी मफुत। 
वं थः दाजुपिन्‍त धाल-- “जिगु लिक्‍क वा।” इपिं वयागु लिक्‍क वँसेंलि वं धाल-- “जि छिमिसं मिश्र देशय्‌ मियाछ्वःम्‍ह छिमि किजा योसेफ खः। 
जितः थन मियाहःगुलिइ आः छिमिसं दुःख ताये मते, थः खनाः तं नं म्‍वये मते। जितः थन फुक्‍क मनूतय्‌त बचय्‌ यायेत परमेश्‍वरं हे छ्वयाहयादीगु खः। 
निदँ न्‍ह्यःनिसें देशय्‌ अनिकाल जुयाच्‍वंगु दु, अले न्‍यादँ तक छुं नं पीगु व लयेगु ज्‍या जुइमखुनि। 
परमेश्‍वरं थुकथं छिमित व छिमि सन्‍तानयात म्‍वाकातयेत जितः थन छिपिं स्‍वयाः न्‍ह्यः छ्वयाहयादिल। 
उकिं जितः थन छ्वयाहःगु छिमिसं मखु, परमेश्‍वरं खः। वय्‌कलं हे जितः फारोया दरबारय्‌ तःधंम्‍ह मनू यानादिल, अले मिश्र देशया हामा यानादिल। 
“आः याकनं जिमि बाःयाथाय्‌ वनाः वय्‌कःया काय्‌ योसेफं धयाहःगु धकाः थथे धयाब्‍यु-- परमेश्‍वरं जितः मिश्र देशया हामा यानादीगु दु। पलख हे लिमबाकुसे जिथाय्‌ याकनं झासँ। 
छि थः मचाखाचा, छय्‌पिं व थःलिसे दुगु फुक्‍क वस्‍तु व सामान ज्‍वनाः गोशेनय्‌ जिगु सत्तिक च्‍वं झासँ। 
अन जूसा जिं छिकपिन्‍त स्‍वयेफइ। छाय्‌धाःसा अनिकालया न्‍यादँ अज्‍ज नं ल्‍यं दनि। मखुसा ला छिकपिं फुक्‍कं हाःनाः मदयावनि। 
“आः छिपिं फुक्‍कसिनं अले बेन्‍यामीनं नं जि योसेफ हे खः धकाः सी हे धुंकल। 
मिश्र देशय्‌ जि तःधंम्‍ह मनू जूगु अले छिमिसं थन खंगु फुक्‍क खँ जिमि बाःयात कँ। अले वय्‌कःयात थन याकनं हति।” 
थथे धयाः व थः किजा बेन्‍यामीनयात घय्‌पुयाः ख्‍वल। बेन्‍यामीन नं वयात घय्‌पुयाः ख्‍वल। 
व थः दाजुपिं फुक्‍कसित चुप्‍पा नयाः ख्‍वल। अले तिनि वया दाजुपिन्‍सं नं वलिसे खँ ल्‍हाये फत। 
योसेफया दाजुकिजापिं वःगु दु धयागु खँ फारोया दरबारय्‌ थ्‍यँसेंलि फारो व वय्‌‌कःया भारदारत फुक्‍क लय्‌ताल। 
फारों योसेफयात धाल-- “थः दाजुकिजापिन्‍त थःथःगु गधायात कु कुबिकाः कनानय्‌ लिहां हुँ धयाब्‍यु। 
अले थः बौ व परिवारयात ज्‍वनाः थन लिहां वा। जिं इमित मिश्रया दक्‍वसिबय्‌ भिंगु बुँ बी। अले अन सःगु अन्न नयाः आनन्‍दं च्‍वनेफइ।” 
इमित थथे नं धयाब्‍यु-- “थः मस्‍तय्‌त व कलाःपिन्‍त तयाः हयेत थनं गाडा नं यंकि। अले थः बौयात नं ब्‍वनाः थन वा। 
थःपिनिगु सामानया छुं नं च्‍यूताः तये मते। छाय्‌धाःसा मिश्रय्‌ च्‍वंगु फुक्‍क भिंगु भिंगु चीज इमिगु हे खः।” 
इस्राएलया काय्‌पिन्‍सं फारों धाःथें हे यात। योसेफं इमित गाडा व लँय्‌ नयेत नसात्‍वँसा नं बियाछ्वत। 
इपिं फुक्‍कसित वं न्‍हून्‍हूगु लं बिल, बेन्‍यामीनयात धाःसा वहःया स्‍वसः दां व न्‍याजु वसः नं बिल। 
वं थः बौया लागि झिम्‍ह गधालय्‌ मिश्रया भिंगु भिंगु सामान, झिम्‍ह गधालय्‌ अन्न व मरि, अले लँय्‌ नयेत मेमेगु नसात्‍वँसा नं तयाः छ्वत। 
थुकथं योसेफं थः दाजुकिजापिन्‍त अनं छ्वत। वने न्‍ह्यः वं इमित धाल-- “लँय्‌ ल्‍वाये मते।” 
थुकथं इपिं मिश्र देशं वनाः कनान देशय्‌ थः बौ याकूबयाथाय्‌ थ्‍यंकः वल। 
इमिसं वयात धाल-- “योसेफ मसीनि। व ला मिश्र देशया हामा जुयाच्‍वन।” थ्‍व न्‍यनाः याकूबं छुं हे धाये मफुत। वं थ्‍व खँ पत्‍याः हे याये मफुत। 
योसेफं इमित धयाहःगु फुक्‍क खँ न्‍यनाः, अले थःत हयेत धकाः छ्वयाहःगु गाडा खँसेंलि याकूबया होश वल। 
अले वं धाल-- “आः जि छिमिसं धाःगु खँय्‌ पत्‍याः जुल, जिमि काय्‌ योसेफ मसीनि। जिं वनाः वयात नापलाये, अले सी न्‍ह्यः वयागु ख्‍वाः स्‍वये।”