उत्‍पति.
40.
छुं ई लिपा फारोया दाखमद्य थल ज्‍वनिम्‍ह नायः व मरि छुइम्‍ह नायःनं थः मालिकया विरोधय्‌ मभिंगु ज्‍या यात। 
फारो इपिं निम्‍ह खनाः तसकं तंम्‍वल। 
अले वय्‌कलं इमित झ्‍यालखानाया हाकिमया छेँय्‌ कुनाबिल। योसेफयात नं अन हे कुनातःगु खः। 
झ्‍यालखानाया हाकिमं इमित योसेफया जिम्‍माय्‌ तयाबिल। छुं ई लिपा झ्‍यालखानाय्‌ च्‍वनाच्‍वंबलय्‌ हे 
इपिं निम्‍हय्‌सिनं नं थीथी अर्थ दुगु म्‍हगस खन। 
सुथय्‌ योसेफ अन वःबलय्‌ इपिं भुगु‍लुं च्‍वनाच्‍वंगु खन। 
उकिं वं इमिके न्‍यन-- “थौं छिकपिं छाय्‌ भुगु‍लुं च्‍वनाच्‍वनागु?” 
इमिसं धाल-- “जिपिं निम्‍हय्‌सिनं नं म्‍हगसय्‌ खना। उकिया अर्थ कनीपिं धाःसा थन सुं हे मदु।” अले योसेफं इमित धाल-- “फुक्‍क म्‍हगसया अर्थ परमेश्‍वरयाके मदु ला? जितः छिकपिनिगु म्‍हगसया खँ कनादिसँ।” 
अले दाखमद्य थल ज्‍वनिम्‍हय्‌सिनं थःगु म्‍हगसया खँ योसेफयात थुकथं कन-- “जिं म्‍हगसय्‌ जिगु न्‍ह्यःने दाखमा छमा खना। 
व दाखमाय्‌ स्‍वकचा दु। उकी बुँ ह्वयेवं स्‍वां नं ह्वयावल, अले ज्‍वाँय्‌ज्‍वाँय्‌ दाख सयाः पाकय्‌ नं जुल। 
जिगु ल्‍हातिइ फारोया थल दु, जिं दाख तिस्‍सिनाः व थलय्‌ तयाः फारोयाथाय्‌ यंकाः बिया।” 
योसेफं वयात धाल-- “छिं म्‍हगसय्‌ खंगु स्‍वकचाया अर्थ स्‍वन्‍हु खः। 
स्‍वन्‍हुया दुने हे फारों छितः छिगु ज्‍या लित बियाः छिगु छ्यं धस्‍वाकाबी। अले न्‍हापा याना थें छिं फारोया दाख थल वय्‌कःया ल्‍हातिइ तयादी खनी। 
छिगु भिं जुइधुंकाः धाःसा छिं जितः लुमंकादिसँ। फारोयात जिगु खँ बिन्‍ति यानाः जितः थ्‍व झ्‍यालखानां पिकयादिसँ। 
छाय्‌धाःसा धात्‍थें धायेमाल धाःसा जितः हिब्रूतय्‌गु देशं खुयाहःगु खः। अले जिं थन झ्‍यालखानाय्‌ लाइगु ज्‍या नं छुं यानागु मदु।” 
योसेफं म्‍हगसया अर्थ भिंगु कथं कंगुलिं मरि छुइम्‍हय्‌सिनं नं वयात धाल-- “जिं नं म्‍हगस छगू खनागु दु। म्‍हगसय्‌ जिं मरि दुगु स्‍वंगः दाला छेनय्‌ कुबियातयागु दु। 
दक्‍वसिबय्‌ च्‍वय्‌यागु दालाय्‌ फारोया लागि थीथी कथंया मरिचरि दु। झंगःपंक्षीतय्‌सं वयाः जिगु छ्यं च्‍वय्‌ च्‍वंगु दालां मरि नयाच्‍वन।” 
योसेफं धाल-- “थुकिया अर्थ खः-- ‘स्‍वंगः दाला धयागु स्‍वन्‍हु खः। 
स्‍वन्‍हुया दुने हे फारों छिगु छ्यं ध्‍यनाबी, अले छितः सिमाय्‌ यख्‍खाइ। झंगःपंक्षीतय्‌सं छिगु ला त्‍वाथं क्‍वात्तुक्‍वानाः नइ।’” 
स्‍वन्‍हु खुन्‍हु फारो बूगु दिन खः। उखुन्‍हु थःथाय्‌ ज्‍या याइपिं फुक्‍क हाकिमतय्‌त भ्‍वय्‌ सःतल। उपिं फुक्‍कसिया न्‍ह्यःने वं दाखमद्य थल ज्‍वनीम्‍ह नायः व मरि छुइम्‍ह नायःयात थने हल। 
दाखमद्य थल ज्‍वनीम्‍ह नायःयात वयागु ज्‍याय्‌ हाकनं तल, 
मरि छुइम्‍ह नायःयात धाःसा यख्‍खानाः स्‍यात। थ्‍व फुक्‍क योसेफं धाःथें जुल। 
दाखमद्य ज्‍वनीम्‍ह नायःनं धाःसा योसेफयात लुममंकू। वं वयात ल्‍वःमंकल।