उत्‍पति.
36.
एदोम धाःम्‍ह एसावया सन्‍तानया धलः थुकथं दु -- 
एसावं कनानया मिसात हित्ती एलोनया म्‍ह्याय्‌ आदा, हिव्‍वी सिबोनया छय्‌ व अनाया म्‍ह्याय्‌ ओहोलीबामा, 
अले इश्‍माएलया म्‍ह्याय्‌ व नबायोतया क्‍यहें बासमतयात ब्‍याहा यात। 
आदाया पाखें एलीपज व बासमतया पाखें रुएल बुल। 
अले ओहोलीबामा पाखें येऊश, यालाम व कोरह बुल। थुपिं एसावया कनान देशय्‌ बूपिं काय्‌पिं खः। 
एसाव थः कलाःपिं, काय्‌म्‍ह्याय्‌पिं व थःगु छेँया फुक्‍क छेँजःपिं, सा, फै व मेमेगु फुक्‍क वस्‍तु, अले कनान देशय्‌ थःम्‍हं मुंकूगु फुक्‍क सम्‍पत्ति ज्‍वनाः थः किजा याकूबलिसे ब्‍यागः जुयाः मेगु देशय्‌ वन। 
इमिके यक्‍व सा, फै व वस्‍तु दुगुलिं जयेत थाय्‌ मगानाः इपिं नापं च्‍वने मफुत। 
उकिं एदोम धाःम्‍ह एसाव पहाडय्‌ लाःगु सेइर देशय्‌ वनाः च्‍वन। 
पहाडय्‌ लाःगु सेइर देशय्‌ च्‍वंपिं एदोमीतय्‌ तापाःबाज्‍या एसावया सन्‍तानया धलः थुकथं दु -- 
एसावया काय्‌पिं थुकथं दु-- आदाया पाखें दुम्‍ह एलीपज, बासमतया पाखें दुम्‍ह रुएल। 
एलीपजया काय्‌पिं तेमान, ओमार, सपो, गाताम व कनज। 
एसावया काय्‌ एलीपजया तीम्‍न धाःम्‍ह मथ्‍याःम्‍ह कलाः दु। वया पाखें नं वया अमालेक नांयाम्‍ह काय्‌ छम्‍ह दु। एसावया आदाया पाखें दुपिं छय्‌पिं थुपिं हे खः। 
रुएलया काय्‌पिं-- नहत, जेरह, शम्‍मा व मिज्‍जा। एसावया बासमतया पाखें दुपिं छय्‌पिं थुपिं हे खः। 
सिबोनया छय्‌ व अनाया म्‍ह्याय्‌ ओहोलीबामाया पाखें दुपिं एसावया काय्‌पिं थुकथं दु-- येऊश, यालाम व कोरह। 
एसावया सन्‍तान मध्‍ये मू मूपिं कुलया नायः थुपिं हे खः -- एसावया तःधिम्‍ह काय्‌ एलीपजया काय्‌पिं-- तेमान, ओमार, सपो, कनज 
कोरह, गाताम व अमालेक कूलया नायःत। एदोम देशय्‌ एलीपजया पाखें नायः जूपिं थुपिं हे खः। थुपिं आदाया छय्‌पिं खः। 
एसावया काय्‌ रुएलया काय्‌पिं-- नहत, जेरह, शम्‍मा व मिज्‍जा कूलया नायःत। एदोम देशय्‌ रुएलया पाखें नायः जूपिं थुपिं हे खः। थुपिं एसावया कलाः बासमतया पाखेंया छय्‌पिं खः 
एसावया कलाः अनाया म्‍ह्याय्‌ ओहोलीबामाया काय्‌पिं-- येऊश, यालाम व कोरह कूलया नायःत। 
थुपिं फुक्‍क कुल व थुमि नायःत एसावया सन्‍तान खः। थुमित एदोमी धाइ। 
सेइर देशय्‌ हे च्‍वंम्‍ह होरी सेइरया काय्‌पिं थुकथं दु-- लोतान, शोबाल, सिबोन, अना, 
दीशोन, एसेर व दीशान। सेइरया थुपिं काय्‌पिं एदोम देशया होरी नायःत खः। 
लोतानया काय्‌पिं-- होरी व हेमान। तीम्‍न लोतानया क्‍यहें खः। 
शोबालया काय्‌पिं-- अल्‍बान, मानहत, एबाल, शपो व ओनाम। 
सिबोनया काय्‌पिं-- अय्‍या व अना। थ्‍व हे अनां थः बौ सिबोनया गधात जःवंबलय्‌ मरुभूमिइ क्‍वाःगु लःया धाः लुइकूगु खः। 
अनाया काय्‌म्‍ह्याय्‌पिं-- काय्‌ दीशोन व म्‍ह्याय्‌ ओहोलीबामा। 
दीशोनया काय्‌पिं-- हेमदान, एश्‍बान, यित्रान व करान। 
एसेरया काय्‌पिं-- बिल्‍हान, जावान व अकान। 
दीशानया काय्‌पिं-- ऊज व आरान। 
होरीतय्‌ नायःत थुपिं हे खः-- लोतान, शोबाल, सिबोन, अना, 
दीशोन, एसेर व दीशान। सेइर देशय्‌ इमिगु खलकं होरी नायः जूपिं थुपिं हे खः। 
इस्राएलय्‌ जुजु दये न्‍ह्यः एदोम देशय्‌ राज्‍य याःपिं जुजुपिं थुकथं दु - 
बओरया काय्‌ बेला एदोमया जुजु जूबलय्‌ वयागु राजधानी दिन्‍हावा खः। 
बेला सीधुंकाः वयागु थासय्‌ बोज्राय्‌ च्‍वंम्‍ह जेरहया काय्‌ योबाब अनयाम्‍ह जुजु जुल। 
योबाब सीधुंकाः तेमानीतय्‌गु देशय्‌ च्‍वंम्‍ह हूशाम अनयाम्‍ह जुजु जुल। 
हूशाम सीधुंकाः मोआबय्‌ मिद्यानयात बुकूम्‍ह बददया काय्‌ हदद अनयाम्‍ह जुजु जुल। वयागु राजधानी अवीत खः। 
हदद सीधुंकाः मास्रेकाय्‌ च्‍वंम्‍ह सम्‍ला वयागु थासय्‌ जुजु जुल। 
सम्‍ला सीधुंकाः खुसि सिथय्‌ च्‍वंगु रहोबोत शहरयाम्‍ह शौल अनयाम्‍ह जुजु जुल। 
शौल सीधुंकाः अक्‍बोरया काय्‌ बाल-हानान अनयाम्‍ह जुजु जुल। 
अक्‍बोरया काय्‌ बाल-हानान सीधुंकाः हदद वयागु थासय्‌ जुजु जुल। वयागु राजधानी पाऊ खः। वया कलाः महेतबेल खः। व मत्रेदया म्‍ह्याय्‌ व मे-जाहाबया छय्‌ खः। 
एदोमीतय्‌ तापाःबाज्‍या एसावया सन्‍तानपाखें दुपिं कुलया नायःत थुकथं दु - तीम्‍न, अल्‍वा, यतेत, 
ओहोलीबामा, एलाह, पीनोन, 
कनज, तेमान, मिब्‍सार, 
मग्‍दीएल व ईराम। थुपिं एदोम देशया थीथी थासय्‌ च्‍वंपिं खः। एदोमीतय्‌ तापाःबाज्‍या एसावया खँ थ्‍व हे खः