उत्‍पति.
30.
राहेलं याकूबयात मचा बुइकाबी मफुगुलिं वया थः ततालिसे नुगः मुल। अले वं याकूबयात धाल-- “जितः नं मस्‍त दय्‌का ब्‍यु। मखुसा जि सिनावने।” 
याकूब व खनाः तंम्‍वल, अले धाल-- “जि परमेश्‍वर खः ला छन्‍त मचा दय्‌काबीत?” 
“जिम्‍ह दासी बिल्‍हा थन हे दु। वयापाखें मचा दय्‌कादिसँ। अले जि वयापाखें मां जुइदइ।” 
उकिं राहेलं याकूबलिसे थः दासी बिल्‍हायागु ब्‍याहा यानाबिल। 
बिल्‍हाया प्‍वाथय्‌ दयाः काय्‌ बुल। 
अले राहेलं धाल-- “परमेश्‍वरं जिगु पँ लिनादिल। वय्‌कलं जिगु प्रार्थना न्‍यनाः जितः काय्‌ बियादिल।” उकिं वं वयागु नां दान तल। 
राहेलया दासी बिल्‍हाया हाकनं प्‍वाथय्‌ दयाः मेम्‍ह काय्‌ बुल। 
अले राहेलं धाल-- “जिं जिमि ततालिसे तसकं थाकुक ल्‍वानाः त्‍याकागु दु।” उकिं वं वयागु नां नप्‍ताली तल। 
थःपाखें मचा बुइगु द्यूगुलिं लेआं थः दासी जिल्‍पायात याकूबलिसे ब्‍याहा यानाबिल। 
लेआया दासी जिल्‍पाया पाखें काय्‌ छम्‍ह बुल। 
लेआं धाल-- “जि गुलि भाग्‍यमानी।” अले वं वयागु नां गाद तल। 
लेआया दासी जिल्‍पां याकूबया पाखें हाकनं मेम्‍ह काय्‌ बुइकल। 
अले लेआं धाल-- “जि गुलि सुखी। मिसातय्‌सं जितः सुखीम्‍ह धकाः धाइ।” उकिं वं वयागु नां आशेर तल। 
छ्व लयेगु इलय्‌ छन्‍हु रूबेन बुँइ वन। वं अन विशाखमूल लुइकाः थः मां लेआयाथाय्‌ हल। राहेलं लेआयात धाल-- “जितः नं छिमि काय्‌नं हःगु विशाखमूल भचा ब्‍यु लय्‌?” 
लेआं वयात धाल-- “जिमि भाःतयात जक कयां मगाः ला? जिमि काय्‌या विशाखमूल नं काये माल ला?” राहेलं धाल-- “अय्‌सा छिमि काय्‌या विशाखमूलया पलेसा थौं वय्‌कः छलिसे द्यनी।” 
उखुन्‍हु याकूब सन्‍ध्‍याकाः इलय्‌ बुं लिहां वःबलय्‌ लेआं वनाः वयात धाल-- “छि थौं जिलिसे द्यनेमाः। जिं छितः जिमि काय्‌या विशाखमूल मालिसे त्‍याय्‌कयागु दु।” उकिं याकूब उखुन्‍हु वलिसे हे द्यन। 
परमेश्‍वरं लेआयागु प्रार्थना न्‍यनादिल। अले वया प्‍वाथय्‌ दयाः न्‍याम्‍हम्‍ह काय्‌ बुल। 
लेआं धाल-- “जिं जिमि भाःतयात थः दासी लःल्‍हाना बियागुलिं परमेश्‍वरं जितः सिरपाः बियादिल।” उकिं वं वयागु नां इस्‍साखार तल। 
लेआया हानं प्‍वाथय्‌ दयाः खुम्‍हम्‍ह काय्‌ बुल। 
अले लेआं धाल-- “परमेश्‍वरं जितः तःधंगु सिरपाः बियादीगु दु। आः जितः जिमि भाःतं हनाबना तइ, छाय्‌धाःसा जिं वय्‌कःयात खुम्‍ह खुम्‍ह काय्‌ बुइकाबियागु दु।” उकिं वं वयागु नां जबूलून तल। 
छुं ई लिपा वं छम्‍ह म्‍ह्याय्‌ बुइकल। वं वयागु नां दीना तल। 
अले परमेश्‍वरं राहेलयात लुमंकादिल। वयागु प्रार्थना न्‍यनाः वय्‌कलं वयात प्‍वाथय्‌ दय्‌काबिल। 
वं काय्‌ बुइकल। अले वं धाल-- “परमेश्‌वरं जितः लानाच्‍वंगु हेमाति चीकादिल।” 
वं वयागु नां योसेफ तल। अले वं हाकनं-- परमप्रभुं जितः हाकनं मेम्‍ह छम्‍ह काय्‌ नं बियादीमा धकाः प्रार्थना यात। 
योसेफ बुइधुंकाः याकूबं लाबानयात धाल-- “जितः वनेबियादिसँ। जि थःगु हे देशय्‌ वने। 
जिं छिथाय्‌ ज्‍या यानाः दुपिं जिमि कलाःपिं व मस्‍त जितः यंके बियादिसँ। जिं छिथाय्‌ गुलि बांलाक ज्‍या याना छिं सि हे स्‍यू।” 
लाबानं वयात धाल-- “छं जि धात्‍थें यः धयागु खःसा थन हे च्‍वँ। परमप्रभुं जितः छंगु पाखें आशिष बियादीगु दु धकाः जिं सीके धुन। 
छन्‍त गुलि ज्‍याला माः धा। जिं उलि हे बी।” 
याकूबं वयात धाल-- “जिं थन गुकथं ज्‍या याना धकाः छिं सि हे स्‍यू, अले जिगु सुसाःकुसाः दयाः छिगु वस्‍तु नं गुलि यक्‍व दयेधुंकल छिं सि हे स्‍यू। 
जि वये न्‍ह्यः छिके म्‍हो हे जक दुगु खः। आः छिके यक्‍व दयेधुंकल। जिं ल्‍हाः तःथाय्‌ तक्‍क परमप्रभुं छितः आशिष बियादीगु दु। आः धाःसा जिं थःगु हे परिवारया लागि छुं याये माः।” 
लाबानं धाल-- “जिं छन्‍त छु बी लय्‌?” याकूबं धाल-- “छिं जितः छुं नं बियादीम्‍वाः?” छिं जितः छिगु वस्‍तुया सुसाःकुसाः यानाः झ्‍वलय्‌ तयेबियादिसँ। 
“थौं जितः छिगु वस्‍तु मध्‍ये च्‍याःथाःपिं च्‍वलय्‌चात व हाकुपिं फैचात ल्‍यय्‌के बियादिसँ। व हे जिगु ज्‍याला जुइ। 
जि गुलि इमानजमान दुम्‍ह धकाः छिं लिपा नं सीका काये फइ। छिं जितः ज्‍याला ब्‍यूगु वस्‍तु स्‍वः झासँ, उकी छम्‍ह हे जक च्‍याःमथाःम्‍ह व हाकु मजूम्‍ह वस्‍तु लुल धाःसा जिं खुयाहःगु जुइ।” 
लाबानं धाल-- “ज्‍यू। छं धाःथें हे जुइ।” 
तर लाबानं धाःसा उखुन्‍हु हे च्‍याःथाःपिं दुगु व च्‍वलय्‌चात अले हाकुपिं फैचात धाक्‍व थःम्‍हं हे ल्‍ययाः थः काय्‌पिन्‍त बियाछ्‍वत। 
अले लाबानया काय्‌पिं याकूब च्‍वनाच्‍वंगु थासं स्‍वन्‍हु तापाःगु थासय्‌ वन। लाबानया ल्‍यंदुपिं वस्‍तु स्‍वयेगु ज्‍या याकूबं यात। 
याकूबं लहरे-पीपल, मर्स्‍या- बरां व स्‍यांगुलिमाया कचा ध्‍यनाः उकियात तुइक बाला चिंक फायाः 
फै व च्‍वलय्‌तय्‌सं लः त्‍वंवइबलय्‌ खने दइकथं लः त्‍वनीगु थलय्‌ तयाबीगु यात। छाय्‌धाःसा वस्‍तुत अन वयाः पासा थ्‍वःवइगु वं स्‍यू। 
कचाबालाया न्‍ह्यःने वयाः पासा थ्‍वःवःपिनि मचात च्‍याःथाःपिं जुयाः बुल। 
याकूबं फैचातय्‌त च्‍वलय्‌चात पाखें अलग तयाः इमित हाकुपिं व च्‍याःथाःपिं वस्‍तु चूलाइकथं तयाबिल। थुकथं वं थः वस्‍तुतय्‌त लाबानया वस्‍तुलिसे ल्‍वाकमछ्यासे अलग तयाः लहिनाः यक्‍व दय्‌कायंकल। 
स्‍वयेज्‍यूपिं व बल्‍लाःपिं वस्‍तु पासा थ्‍वःवइबलय्‌ वं कचा बालात इमिगु न्‍ह्यःने लः त्‍वनेगु थलया लिक्‍क तयाबीगु। 
बमलाःपिनिगु न्‍ह्यःने धाःसा अथे कचा बाला तया मब्‍यू। थुकथं बल्‍लाःपिं वस्‍तु धाक्‍व याकूबयागु जुल, अले बमलाःपिं धाक्‍व लाबानया जुल। 
थथे याकूब तसकं तःमि जुल। वया यक्‍व वस्‍तु, दासदासीत, उँट्‌ व गधा दत।