उत्‍पति.
28.
इसहाकं याकूबयात सःताः आशिष बियाः धाल-- “छं सुं हे कनानी मिसालिसे ब्‍याहा याये मते। 
पद्दन-आरामय्‌ छिमि मांया बौ बतूएलया छेँय्‌ वनाः छिमि पाजु लाबानया म्‍ह्याय्‌पिं मध्‍ये छम्‍हय्‌सित ब्‍याहा या। 
दक्‍वसिबय्‌ बल्‍लाःम्‍ह परमेश्‍वरं छन्‍त आशिष बीमा। अले छं यक्‍व सन्‍तान दयाः छं पाखें यक्‍व जाति दयेमा। 
परमेश्‍वरं छन्‍त व छिमि सन्‍तानयात अब्राहामयात ब्‍यूगु आशिष बियादीमा। अले परमेश्‍वरं अब्राहामयात बी धाःगु व झी आः च्‍वनाच्‍वनागु देश नं परमेश्‍वरं छन्‍त बियादीमा।” 
अले इसहाकं याकूबयात पद्दन-आरामय्‌ एसाव व याकूबया मां रिबेकाया दाजु, अरामी बतूएलया काय्‌ लाबानयाथाय्‌ छ्वत। 
एसावं थः बौ इसहाकं याकूबयात आशिष बियाः सुं नं कनानी मिसायात ब्‍याहा याये मते धकाः भमचा मालेत पद्दन-आरामय्‌ छ्वःगु खँ सिल। 
वं याकूब थः मांबौया खँ न्‍यनाः पद्दन-- आरामय्‌ वंगु खँ नं सिल। 
अले वं थः बौ इसहाकयात कनानी मिस्‍त गुलि तक मयः धयागु खँ वाः चाय्‌कल। 
उकिं वं थः कका‌ इश्‍माएलयाथाय्‌ वनाः वया म्‍ह्याय्‌, नबायोतया क्‍यहें महलतयात थः कलाःपिं दयेक दयेकं ब्‍याहा यानाहल। 
बेर्शेबा त्‍वःताः याकूब हारानपाखे वन। 
खिउँयावसेंलि व छथाय्‌ बासं च्‍वनेत दित। व ल्‍वहंया फुंग तयाः अन हे ग्‍वारातुल। 
वं म्‍हगसय्‌ स्‍वर्ग पृथ्‍वी छस्‍वागु छपु स्‍वाहानेय्‌ परमेश्‍वरया दूतत थाहांक्‍वहां जुयाच्‍वंगु खन। 
परमप्रभुं वया लिक्‍क वयाः धयादिल-- “जि परमप्रभु खः, छं तापाःबाज्‍या अब्राहामया परमेश्‍वर, अले इसहाकया परमेश्‍वर। जिं छन्‍त व छिमि सन्‍तानयात छ च्‍वनाच्‍वंगु देश बी। 
छिमि सन्‍तान पृथ्‍वीया धू थें जुइ। इपिं पुर्ब व पच्‍छिम, उत्तर व दच्‍छिन न्‍यनावनी। पृथ्‍वीया फुक्‍क मनूतय्‌सं छ व छिमि सन्‍तानपाखें आशिष काइ। 
जि छलिसें दु। छ न्‍ह्याथाय्‌ वंसां जिं छन्‍त स्‍वयाच्‍वने। अले जिं छन्‍त थन हे लित हये। जिं छन्‍त बाचा चिनागु ज्‍या पूमवंतले त्‍वःते मखु।” 
याकूबया न्‍ह्यलं चासेंलि वं बिचाः यात-- “परमप्रभु थन हे दी, जिं सीके मफुत।” 
अले वं ग्‍यानाः धाल-- “थ्‍व थाय्‌ ला मेगु मखुसे परमेश्‍वरया छेँ हे जुइमाः। थ्‍व थाय्‌ ला स्‍वर्गया लुखा जुइमाः।” 
सुथ न्‍हापां याकूबं दनाः थःम्‍हं छ्यं दिकाः द्यनागु ल्‍वहंयात लुमन्‍तिया चिं थें धंकल। अले उकी च्‍वंनिसें चिकं लुत। 
वं व थाय्‌या नां बेथेल तल। न्‍हापा व थाय्‌या नां लूज खः। 
अले याकूबं थथे धयाः बचं बिल-- “परमेश्‍वर जिलिसे दु धयागु खःसा, अले जितः जि वँवंथाय्‌ बचय्‌ यानादी, नके, त्‍वंके व पुंके यानादी धयागु खःसा, 
जि हाकनं जिमि बाःयाथाय्‌ छुं मजुइक लिहां वने फत धाःसा परमप्रभु हे जिम्‍ह परमेश्‍वर जुइ। 
अले जिं धंकागु थ्‍व ल्‍वहं परमेश्‍वरया छेँ जुइ। अले वय्‌कलं बियादीगु न्‍ह्यागुं झिब्‍वय्‌ छब्‍व वय्‌कःयात देछाये।”