Balʉa na bhisi gba Polo pɨ omabhuka na gʉdhʉ na Tesalonike.
1.
Ngayi omabhuka na Dadjua gba ’Dyɨ nɨ́ Ebhe di ne Ngámá gba nɨ́ Yesu Kilisito na gʉdhʉ na Tesalonike-e, ya yi yi mayi. Ma aye balʉa ɨnde-e ngama Polo, bhʉ́ dabɨlɨ bini ne Silivano di ne Timoté. 
A ayo me bádha bhʉ́ ’bu ne guo ’ngʉ́ gba ’Dyɨ nɨ́ Ebhe di ne Ngámá gba nɨ́ Yesu Kilisito-o dʉ ne yi bhʉ́ dabɨlɨ bini. 
A ayo me ya gie heni pɨ Ebhe ndʉ ’kpɨ́ hana ngʉbula yi ondaise ya. A la bhadi ndjɨndjɨ me ya mene moko, anga nabhuka gba yi-e nganʉ ne kalanʉ naali. La di-e, mʉkʉnda lɨ ndʉ yi hana nde ne e sʉnda yi-e nganʉ ne kalanʉ. 
Kaka-a, ya ngapa ’ngʉ́ gba yi-e ne gindaginda bhʉ́ oDadjua gba Ebhe kabula kekele di ne nabhuka gba yi, abana u ngato mbolo lɨ yi lɨe di ne yi ngazʉ lɨkabhu lɨe ne ndʉ kpadjɨ hana-o. 
Bhobhomʉ-o ngasuno me Ebhe ngakodho ’ngʉ́ ngbingbili. Padhá de, anga ka olɨkabhu ɨnde yi ngazʉ e-e, Ebhe aú me yi atɨ ne nalɨ bhʉ́ Naʉ gba nɨ ɨnde yi ngazʉ lɨkabhu ngʉ́ e ko. 
Lɨ Ebhe nde lɨe ne ngbili kpála-a , anɨ agíe olɨkabhu pɨ okpála ɨnde ɨ ngaha lɨkabhu pɨ yi ko. 
La di-e, anɨ ahá guo ’ngʉ́ pɨ yi okpála ɨnde ngadje lɨkabhu, anɨ tsia há di guo ’ngʉ́ pɨ ya. Anɨ améne ongʉ́ bhomʉ-o lɨ ’kpɨ́ lɨ Ngámá gba nɨ́ Yesu ayíe lɨe abhʉ́lá, anɨ tsia gó bhʉ́ dabɨlɨ bini ne oandjelu na angu gba e-o. 
Anɨ agó bhʉ́ dɨngɨdhɨ djua ngʉbula naꞌo ’ngʉ́ pɨ́ okpála ɨnde ɨ kʉnda nambɨla Ebhe de, ɨnde ngayala di nazɨba Bádha Ngali gba Ngámá gba nɨ́ Yesu-o. 
Makalá na siti ’ngʉ́ gba uo-o, adʉ́ lɨkabhu na dʉdʉma, lɨ bɨlɨ ɨnde u adʉ́ lɨe de Ngámá Yesu ne Naʉ na sangu di ne angu gba e tsutsu-o. 
Engʉ́ ango-o akódho ’kpɨ́ lɨ ’kpɨ́ anɨ agó lɨe ngʉbula me ndʉ okpála gba nɨ hana ɨnde abhuka nɨ-e, dhɵgɵ nɨ, amba u toko di nɨ. Ngayi di-e, yi adʉ́ bhʉ́ ká okpála bhomʉ. Padhá de, anga yi abhuka ngali ɨnde ya akpokpo e pɨ yi-o. 
Kaka-a, ya di ngayo Ebhe ndʉ ’kpɨ́ hana ngʉbula yi me Ebhe gba nɨ́-e mene me yi dhʉkʉ lɨ lele maka anɨ aꞌɨ yi lɨe-o. Ya ngayo ka anɨ me bhʉ́ angu gba anɨ-e, anɨ ha angu pɨ yi ngʉ́ namene obabadha kulu ɨnde yi akʉnda namene e akólo lɨ soso, kabula nabhuka gba yi bhʉ́ Yesu-o. 
Ya la di ngayo Ebhe ngʉbula me, okpála dhɵgɵ ’lɨ Ngámá gba nɨ́ Yesu kabula yi, amba u dhɵgɵ di yi kabula anɨ. Bhobhomʉ-o améne lɨe ka bádha bhʉ́ ’bu ɨnde lɨ ’Dyɨ nɨ́ Ebhe di ne Ngámá gba nɨ́ Yesu Kilisito asuno e pɨ yi-o.