तोहचीतव पोल्‍लोङ.
11.
अद्रमलेह्‌काने पया बोग़ो मति कहतलाहि नाक लाट डुडि ईतोग़, ईसि इद्रम इतोग़, “अले! तेदिसि देवुळता मंदिरतुन ओसो मोळ्कनद जागातुन कहा, अहे मंदिरतगा मोळ्कवालोरिन लेका. 
मति मंदिरता रेसातुन नाक पुनवोर दुस्रा जातिनोरिह्‌क ईतन. अदिनेनाह्‌क तान कहमा. ओर मन्कलोर मूंड वर्साङ आरुङ नेलाङ आनाह नावा पवित्र येरुसलेम सहरतुन तमा कय इळ्‍न तासनुर. 
पया नावा साक्सि एवालोर इर्वुर मन्कलोरिह्‌क नावा पोल्‍लो वेहतनद अदिकर ईकन. ओर पोता-गेंदेङ उहचि, उंद अजर रेंड नूह्‌क मूंड वीसाङ दियाङ एवनाह नावा पोल्‍लोतुन पोकुर कीयनुर.” 
पूरा बूमता माल्काना मुनेह नितव रेंड जय्तुन मराङ ओसो रेंड चिमलिङ वेरे. 
वेरिन बोराय बूळे कीयलाहि आतेके, वेर इर्वुर मन्कलोरा तोडटाहि किस पेसिसि ओरिन बूळे कीस्ता. वेरिन बोराय बूळे कीयलाहि आतेके निटम इद्रम लेह्‌काने डोलनुर. 
वेर इर्वुर मन्कलोर देवुळता पोल्‍लोतुन वेहतह्‌पा, पेग़ अरमाकि इनजोर तान निल्पिह कीयलाहि ओरिह्‌क अदिकर दोर्कता. बेस्के ओरिह्‌क विचर वास्ता, अस्के एतुन नेतुर मारियिह कीयलाहि, सबे बूमतोरिन दुस्राङ-दुस्राङ पीळाने तिपल कीयलाहि ओर इर्वुरिह्‌क अदिकर मता. 
ओर देवुळता साक्सितुन वेहतनद मारिह कीतस्के, बूमता इळ्ता बोंदाताहि जन्वर (इतेके किर्स्तुना विरुदता) पेसिस वायग़ा, वासि ओर इर्वुरिन लळय कीयग़ा. अह कीसि ओरिन गेल्सग़ा ओसो हव्कग़ा. 
ओराङ सेताङ अद बेरा सहरता (इतेके येरुसलेमता) अग़दगा अर्स मनदनुङ. अदे सहरतगा ओरा सामिन वने हव्कनागुटातगा मोलाङ कोटिस हव्किस मतोर. अद सहरतुन सदोम सहर इलवेके मिसर देसेम इनजोर इन्ह्‌तोर. 
पूरा देसेमतोर, सबे कूळिनोर, दुस्राङ-दुस्राङ बासाङ वळ्ह्‌कवालोर, सबे जातिनोर, मूंड दियाना वळ्गा एवनाह ओराङ सेतान ऊळसोर मनदनुर. ओरा सेतान गति केवोर आयनुर. 
वेर हातोरु देवुळता कबुरतोरु, बूमतोर मन्कलोरिन पकाय तिपल कीस मतोर. अदिह्‌क वेर डोलतोर इनजोर सबे बूमतोर गिर्दा आयनुर ओसो ओर्विह्‌क-ओर्वोग़ सामन तूसिससीयनुर. 
मति मूंड दियाना वळ्गा आतापया देवुळि लोहतद जीवा डोलतोरगा ओळियता. ओळियतस्के ओर तेदिस नितोर. तेदिस नितस्के ऊळवालोर पका रेयतोर. 
अद्रमलेह्‌कान पया ओर इर्वुर आसि पोग़ोन देवुळदीपताहि जोरते “इगा पोग़ोन वाटु” इनजोर इतद लेङतुन केंजतोर. केंजतस्के ओर इर्वुर मोयुदगा पोग़ोन देवुळतेक अतोर. ओर अनेके विरुद केवालोर ओरिन ऊळतोर. 
अचोटेने बूमि पकाय गल्जता. सहरता दहा चेकाना बूमताहि उंद चेका सहर बल अरता. बूम गल्जतस्के एळुङ अजर्क लोकुर डोलतोर. पिसतोर लोकुर पकाय रेयतोर. रेयिसि पोग़ोटा देवुळतुन मान ईसि मोळ्क बोटटोर. 
इद्रम लेह्‌का दुस्रा तिपल मारता, मति ऊळाट! मुचाकेपाता तिपल चट्‌पिटे वायलाह आता. 
एळुङ नंबरता देवतुलि अकुम ऊरता. अस्के देवुळदीपतगा वेल्‍लाङे लेङिङ जोरते पेसताङ. अव इद्रम इताङ, “दुनियाता राजेम पूरा मावा सामिना ओसो ताना किर्स्तुना आता. इंजेके अद अमेसा-अमेसातुह्‌क राजेम ताकिह कीस्ता,” इनजोर इताङ. 
इतस्के देवुळता मुनेह कुर्सिनगा उदिस मतोर वीसा नाल्वुर पेदल्कु, देवुळता मुनेह दंडुम अरसि तान मोळ्कतोर. 
मोळ्किसि इद्रम इतोर: “ए सामि! बेरा लावता देवुळि! जीवात मतदु! अमेसा जीवात मनदनदु! इंजेके निमा नीवा लावतुन तोहचि राजेम ताकिह कीयलाह सुरु कीतिन. अदिनेनाह्‌क माट नीक जोहर कीय्ह्‌नोम. 
नीक पुनवोर ओङ आस मतोर, मति इंजेके निमा ओङ आयनद कगो एवता. हातोरा नेयम कीयलाहि, नीवा कबुर वेहवालोर सेवातोरिह्‌क, नीवा सेतेमते मनवालोरिह्‌क, नीक रेयिस ताकवालोर उड्‌लोर-बेरोरिह्‌क इनम ईयनद कगो एवता. ओसो बूमतुन बूळे कीतोरिन बूळे कीयलाह कगो एवता,” इनजोर इतोर. 
इतस्के अचोटेने देवुळदीपतगा मनदनद मंदिरता अग़ि पङने आता. आतस्के अगा उंद संदुकतगा, देवुळि मन्कलोरिह्‌क करल कीस मतद पोल्‍लोतुन रासिस तासिस मतद दिसता. अस्के पका मिळ्सकता, नेकता, गुंळ्जता, बूम गल्जता, ओसो पकाय आदुर्क अरताङ.