पत्रुना दुस्रा सीटि.
2.
मति देवुळता कबुर वेहवालोरोम इनजोर नाळेह केवालोर मुने देवुळता मन्कलोरा नडुम मंदुर. अद्रम इंजेके वने जोल पोल्‍लोङ काग़्हवालोर मियगा मनदनुर. विस्वसतुन बूळे कीयनव जोल पोल्‍लोन कुस्क्ने पोकुर कीयनुर; कर्सा ईस तम्क पापमताहि असतोग़ माल्कान पुनोम इनजोर इनदनुर, इद्रम कीसि ओर आपुना पोग़ोन गोसा ततनुर; 
लजा लेवा लाग्‍वाङ कबस्क कीयनुर; ओर ताकनद लाग्‍वाङ कबस्कना अग़दे वेल्‍लाटोर मन्कलोर ताकनुर. अदिनेनाह्‌क मन्कलोर सेतेमता अग़दुन पास्कनुर. 
जोल पोल्‍लोङ काग़्हवालोर कोताना उळ्बेतुह्‌क तमाय पुटिह कीतव पोल्‍लोन वेहतनुर ओसो अविस्किन वेहचि मीक नाळेह कीयनुर. ओरिह्‌क सिक्सा ईयनद देवुळि वेल्‍लाय जोमताहि तयर मन्ह्‌ता; अद ओरिन बूळे कीयग़ा; अद कूर्कसोर मनो. 
अद इद्रमि: पापम कीतव पोग़ोटाङ देवतुल्किन वने देवुळि विळ्सो; अविस्किन देयमदीपतगा लोहता; अगा अविस्‍किन गोल्सिने दोहचि, पका ईकळ अतगा वाटिसीता, वाटिसि तना नेयम कीयनद दियातेनाह्‌क तासता. 
मुने मतद बूमतगा मतोरिन वने अद विळ्सो; तन्क पास्‍कतोरिन बूळे कीयलाहि उड्रातुन लोहचीता; मति देवुळतुह्‌क ओप्पनाह पिसना इनजोर पोकुर कीतोग़ नोहा मुय्तोन मात्रम, एळ्वुर मन्कलोरा संगे तासता. 
सदोम ओसो अमोरा सहरते मतोरिन वने अद विळ्सो; पूरा नेग़ आनाह ओरा सहरतुन बूळे कीसीता. अद्रम ओरिन नेयम कीता; ओसो तान पास्‍कवालोर इद्रमे आस्तोर इनजोर तोहचीता. 
मति अदे सहरतगा मतोग़ लोट इनवाल देवुळतुह्‌क ओप्पनाह पिसतोग़; तना सहरतोर लजा लेवा लाग्‍वाङ कबस्क कीयनदिन ऊळिसि पका मेसेह्‌ने आस मतोग़; ओन अद पिसिह कीता! 
देवुळतुह्‌क ओप्पनाह पिसतोग़ वेग़ ओरगा जागा आस मतोग़; तना सहरतोर लाग्वाङ कबस्क कीयनदिन वेग़ ऊळिंदोग़; केंजिंदोग़; ओरिन ऊळिसि दिनम ओना जीवा मुर्तिय चुहेम आयो आंदु. 
इव सबे पोल्‍लोङ बाताल तोहतह्‌ताङ? सामि तन्क माळवालोरिन तिपलताहि बेद्रम विळ्सिह कीयना; तन्‍क ओप्पवोरिन सिक्सा ईसि, नेयम कीयनद दिया एवनाह बेद्रम तासना, इदिन पुन्ह्‌ता इनजोर तोहतह्‌ताङ. 
तमा मेंदुलता इसबता ओप्पवद उळ्बेते पिसवालोरिन कोनि पका सिक्सा ईस्ता. अद उळ्बे ओरिन कळ्‍वोग़ आनाह कीस्ता. ओर सामिना अदिकरतुन पास्किह्‌तोर. जोल पोल्‍लोङ काग़्हवालोर वेर मन्कलोर, बेदिह्‌के रेयोर; पका कैंगम आस्तोर; ओसो रेयवालेवा पोग़ोन मनदनव देवतुल्किन पास्किह्‌तोर. 
पोग़ोटाङ देवतुल्क, वेर मन्कलोरिह्‌काय एक्वा लावताङ मन्ह्‌ताङ; अव वने सामिना मुनेह वेरिन कसुर ओपोङ. 
मति वेर इतेके तमा पुनवव पोल्‍लोना लोप्पा पास्किह्‌तोर; वेर जन्‍वर्कना लेह्‌कान बुद लेवोर आंदुर; मन्कलोर पोस हव्कलाहि जन्वर्क पुटटाङ; मन्कलोर अविन हव्कना लेह्‌कान देवुळि वेरिन बूळे कीयग़ा. 
वेर ओप्पवव कबस्क कीस्तोर, अविस्कना लेह्‌कान वेरिह्‌क सिक्सा दोर्कग़ा. पियल-पोळ्द रिमाते मनदनदे वेरा गिर्दा मन्ह्‌ता. मीवा संगे कुळ्प तिनदह्‌पा वने अद्रमलेह्‌काने कीस्‍तोर. अदिनेनाह्‌क डागिल लेह्‌कान, माच लेह्‌कान मीवा मुडगा लजा वानाह मन्ह्‌तोर. 
सिड्रि आंचानके पका वेरा कोंडा मन्ह्‌ता; मुर्तिय रोमवालेवा पापम कीसोर मन्ह्‌तोर; विस्वसते मेग़्कवोरिन नाळेह कीसि पापमतके ओस्तोर; उळ्बे कीयनदिन लोप्पा कोनि वेरे पका पुतोर. देवुळि वेरिन सिक्सा ईस्‍ताये. 
वेर बेसता अग़दुन विळ्सिस लेसतोर; बहोर इनवाल मुय्तोना मग़ि बिलाम इनवाल ओप्पवद कबळताङ कोतान जीवा कीस मतोग़. वेर मन्कलोर ओना अग़दुन पोयतोर. 
देवुळि ओना पापमतेनाह्‌क बिलामिन तेर्हता. अद इद्रम कीता: बिलामना गाळ्दतुन, वळ्ह्‌क पग़वदिन, मन्कन लेह्‌कान वळ्ह्‌कनाह कीता ओसो ओग़ कबुरतोग़ मन्कन बय्तळ कबळ केवाह रोमिह कीसीता. 
जोल पोल्‍लोङ काग़्हवालोर मन्कलोर वततव चुवाना लेह्‌काडोर; दूंदते तेळिस दायनद मोयुलता लेह्‌काडोर आंदुर. वेरेनाह्‌क देवुळि अमेसाता ईकळतुन तासता. 
वेर बेराङ-बेराङ पोल्‍लोन वेहतह्‌तोर; मति अव पोल्‍लोङ बेगान अरवोङ; तमाङ जोल कबस्कना मेटे, लेसतोर मन्कलोरा मुडाहि पेसिसि सेतेमता अग़दे पूनाङ-पूनाङ वातोरिन मेंदुदाङ लालुस्कने वेर नाळेह कीस्तोर. 
मीट बेदे अडोता इळ्न इल्विर इनजोर पूना विस्वसिरिन पोल्‍लो विळ्सिह्‌तोर; मति तमय ओप्पवव कबस्‍कना इळ्न मन्ह्‌तोर. बाराह्‌क इतेके, बोग़ मन्कल, बेदिनेनाह्‌क आरेम आतोग़, ओग़ ताना कय इळ्न मन्ह्‌तोग़. 
वेर मन्कलोर, मावा सामि माक पिसिह केवाल येसु किर्स्तुन पुतोर; पुताह्‌कु, पुनवोरा लेह्‌कान पापमते कळ्‍वोग़ आयवा, पापमताहि पेसतोर. अह आस तेला ओसो अदे पापमते एग़्किस आरेम आतोर इतेके, मुने ओर बेद्रम मंदुर तान्काय एक्वा इंजेके ओप्वोर आतोर. 
बाराह्‌क इतेके, वेर देवुळता सेतेमता अग़दुन पुन्ज मनजि, तान विळ्सिस दुस्रा अग़दुन पोयना; देवुळि ईतद अडोताहि मिळ्न्दना; इद्रम कीयना वाटो, बेसतल अग़दुन बेस्केन पुनवा मतेके बेस ओप्पालि. 
नयु तना ककतदिने नाकलाह मलियह्‌ता, नोग़तद पदि चिक्लातगाने दोळ्गलाह दास्ता इनजोर मन्कलोर निटमे इन्ह्‌तोर; वेर जोल पोल्‍लोङ काग़्हवालोर वने अद्रमलेह्‌काने आतोर. तमा पाळ्ना अग़दुने ओसो वने पोयतोर.